Tara hkaw sara/num ni la shaw num shaw mara galaw da ai ni hpe hpung a rip kawp tara hku na hpung magam nmai gun hpai na matu kade ning jahkring masat da ya ai tara nga ai kun.

 San: Wa Jau e Tara hkaw sara/num ni la shaw num shaw mara galaw da ai ni hpe hpung a rip kawp tara hku na hpung magam nmai gun hpai na matu kade ning jahkring masat da ya ai tara nga ai kun. Hpang de hpung magam n mai gun hpai mat ai hpan kun? Bai nna Tara hkaw sara ni a ningrum ningtau jan, sara jan ni ma shabrai ai mara kaba galaw da ai rai yang mara kaba n lu ai kun? Wa Jau, chyeju hte naw htai ya rit. Shut shai ai hta sharai n na htai ya marit ngu hkungga let hpyi nem dat ai. Waimaw jau ginwang Jamga mare kaw nga nna ya ten Miwa mung Thin Chung kaw du nga ai Easter Dashi Hkawn Ra a ga san hpe htai ya na nngai.

• Shawng ningnan chye da ra ai, shadi maja let htauli htaula myit hte galaw sa ra ai gaw, num shaw la shaw ai gaw teng sha re kun shagawn ra ai; nawku hpung woi salang ni hpe shana ya let shanhte hku nna sagawn sa wa yang mung grau kaja ai. Teng ai rai yang gaw shanhte hku nna shadi shahka, htauli htaula myit kaba hte ladat jaw jaw rai nna shawng shadum shading sharai la ya ra ai.

San Pawlu ndai hku shadum da ai, “Hpu nau ni e, masha langai ngai n dum shami e shut hpyit mara galaw hkrup a yang gaw Wenyi e lam madun ai hku asak hkrung nga ai ni nanhte gaw, shing re ai wa hpe sumnung shingdi ai myit hte shading sharai ya na rai myit dai. Nanhte nan mung agung alau n hkrum u ga, tinang dai sadi nga mu” (Gal 6:1).

Masha kaga ni shut hpyi mara galaw ai hpe mu ai ni hkum nan a myit hta byin wa ai myit masa ni hpe tinang hkum tinang bai masam maram ra ai gaw grai nan ahkyak dik ai. Dai zawn re masa hpe mu chye ai wa a matu gaw n mu jahpai, n na jahpai, n chye jahpai da mung n mai; grai rai nna tsun kajai nna, shi hpe hkrp mara jahte tam, mara tam jahkrit ai lam ni hpe mung n mai galaw nga ai. Mu, chye, na da ai dai shut hpyit ai wa hpe mara hta, mara shagun, jahpoi asawng ai galaw yang mung n htuk nga ai. Grai si mani ai hku hparan ra ai bungli rai nga ai ngu mu mada ai. Hpa majaw nga yang, ahkyak la shadum jahprang, shading sharai lam n galaw yang mung dai mu ai ni hta mung mara nga wa chye ai zawn, n kaja ai hku, n hkru ai, zai ai myit masa ni hte ahkyak la hparan sa wa yang mung tinang hta mara shalaw jat la ai tai nga ai.

Shut hpyi mara lu ai ni hpe shading sharai sa wa na lam hpe Madu Yesu hkum nan matsun da ai. “Na nhpu nnau wa nang hpe shut hpyi kau yang gaw, shi hpang de sa nhtawm shi a mara hpe madun u. Rai ti mung nan lahkawng hkrai chyaw rai nna jahkrum kau u. Na a ga hpe madat la yang gaw na a nhpu nnau wa hpe nang mawai la lu nit dai. Na a ga hpe n madat la yang gaw, marai langai lahkawng hpe naw shaga la nna hpa hku hpa lam rai ti mung nang mara madun ai lam teng nga ai lam dai Chyum laika hta tsun da nga ai hte maren, sakse lahkawng masum a n-gup ga hte daw dan ya mu. Shanhte a ga hpe shi n madat hkraw a yang gaw, dai lam yawng mayawng dai hpung hpe sa shana ya mu. Hpang jahtum dai hpung hpe mung n madat hkraw a yang gaw, tara maigan wa shing n rai, kang hta ai wa hpe zawn na a man e shi rai u ga,” ngu Yesu Madu hkang da nga ai (Mt 18:15-17).

“Chyum laika hta tsun da nga ai hte maren”, ngu Yesu Madu tsun da ai gaw dai chyum laika hpe mung kung kyang, tara shang mung tai na mahkrun lam hpe anhte tam sa ra ai hpe tsun ai rai nga ai.

Hpung Sara/num ni hpa mara shut yang, kaning re mara dam jaw ra ai ngu ai gaw n tsun da ai. Hpung masha yawng hte seng ai hpe gaw tsun da ai lam ni nga ai. Karai Kasang a magam gun ni hte seng ai hpe gaw Jau ni hte prat tup ga sadi hkam da ai Deacon, Brother, Ma Ma ni hte seng na tsun da ai gaw nga ai. Dai mung dinghku de num la mat jang sakramentu n mai hkam ai lam hte seng na rai nga ai.

Saradaw, Jau, Deacon, Brother, Mama, Bai, Hpung masha ni yawng hte seng ai gaw, masha num shaw masha la shaw ai rai yang mara kaba rai nga ai. Nawku daw jau, lam woi n htuk sai; masha ni hpe mu shut hkam la shut shangun ai lam shabyin ai tai nga ai majaw nawku daw jau lam n woi shangun na matu Nawku Hpung kawn sadi jaw da nga ai.

Hpung Sara/num langai mi masha num shaw, masha la shaw ai teng ai, dan dawng ai rai yang gaw, shawng de tsun dan sai hte maren, ginwang up wa jau gaw, dai wa hpe shadum jahprang shading sharai na lam hpe galaw woi na ra ai. Dai lam hpe shi n hkap la ai. Matut shut shai nga ai rai yang, Ginwang Up Wa Jau gaw, tara hkaw sara/ num magam lit hpe dawm la ai hpe galaw wa na rai nga ai.

Dai zawn rai magam lit jahkring ai hpe mung ginwang up Wa Jau e, masam maram nna, prat tup rai yang rai mat na, shing n rai, dai shut hpyit ai wa galai shai na myit nna hpyi nem, hpyi shawn ai lam hta hkan nna, shi a masa hpe masam maram let lit magam hpe jaw grin ai, kam grin ai rai yang bai jaw yang bai jaw na; Hpung masha ni a hpyi shawn ai hte ra kadawn ai lam ni hpe yu nna daw dan ai raitim, Karai Kasang a tara kanu lam (10) hta na ndai masha num shaw, masha la shaw ai hte seng ai shut hpyi mara gaw kaga sakramentu ni hpe mung pat shingdan la ai re majaw gaw, dai shut hpyit mara n galaw sai, lawt lu sai rai yang she shi a matu tara hkaw sara/num lit magam myit mada shara nga ai rai nga ai.

Magam lit hpe jahkring da ai gaw, shata kade, shaning kade ngu ai gaw, dai shut hpyi mara galaw ai wa a myit malai lu, galai shai ai hta hkan nna, Ginwang up Jau e, Nawku Hpung a tara hte maren masam maram daw dan ai hta hkan na nhten; Shi hta galai shai ai lam n nga ai rai yang gaw tara hkaw sara magam lit hpe tsep kawp n mai ap jaw sai rai nga ai.

Ma shabrai ai magam hta shang lawm ai ni yawng gaw mara kaba rai nga ai. Gara masa hku shang lawm ai rai tim mara kaba ai rai nga ai. Tara hkaw sara jan ni sha n re, shinggyim masha shagu ma shabrai ai hta gara masa hku mi shang lawm lawm mara kaba ai rai nga ai. Hpa majaw nga yang, Karai Kasang a hpan da magam hpe ninghkap ai. Grau nna gaw masha sat ai amu rai nga ai majaw rai nga ai.

Shut hpyi mara lu ai ni hpe shading sharai lam woi la na hte seng nna Chyum Laika hta tsun da ai chyum daw n kau ni hpe tsun dan na n ngai.

(Jaw Jau 19:17; Ga shagawp 3:10; 9:8; 10:17, 11: 9; 12:1, 15; 17:17; 18:13, 24, 19; 19:11; Ezek 3:17-21; 33:7-12; Yemiah 7:28; Sk.kd 141:5; 46:10; Mt 5:23-24; 7:1-5; 11:19; 18:3, 15-18, 21; Lk 6: 17; 17:3-4; Yh 7:24; Kasa 17:10-11; 20:28, 31; 1Kor 4:14; 5:1-13; 10:12; 2Kor 10:1; Kol 1: 28; 3:13, 15, 16; 1Htesa 5:14, 15; 2Htesa 1: 19; 2: 7; 3:6, 15; Roma 12:10; 13:14; 14: 1-23; 16:17;Gal 2:11-14; 5:23, 26; 6:2; Eph 4:2, 29, 32; Yaku 1:2-4, 19; 5:19, 20;Heb 12:6; 13:17;1Yh 1:8, 9; 5:16; 1Tim 1:3-7; 5:1-2, 19, 20; 2Tim 2: 23-26; 3:16-17; 4:2; 1Pt 2:1-12; 3:8,11; 2Pt 2:24-25; 3:9; Titus 2:15; 3:10-11; 1:3; Shingran 1:1)

By Fr. Patrick Gawmaw Hkawng Yae

#rvakachinservice