San Pra ai Denis a Poi Nhtoi (October 9)

San Pra ai Denis gaw, tsa ban (3) laman hta Italy mungdan kaw nga lai wa sai rai nga ai. Shi hpe Fransik Mungdan (Ya na Pin-Tit) a matu laksan shamyet shanat kamhpa mai ai san pra ai masha ngu nna shagrau masat hkrum ai wa rai nga ai. A.D 250 ning hta dai aten na Wa Sarabyin Fabian gaw, Saradaw Denis hpe manang Saradaw (6) hte rau Francis mungdan de sasana magam gun shangun dat wu ai. Francis mungdan a mare a daju rai nga ai, Paris kaw Saradaw Denis hpe dai mare kaw na shawng nnan na Saradaw aya dang da ya hkrum sai.

San Pra ai Saradaw Denis gaw, Jau Rusticus hte Deacon Leuterius yan a garum ya ai majaw, Hpung magam hpe grai awng dang hkra galaw lu sai. Shanhte a san seng san pra ai myit jasat, shakut sharang myit jasat hte magam bungli ni hpe gun hpai ai majaw, masha law law Hkristian makam masham hpe hkap la ma ai. Shanhte kaw na nkau mi gaw grai nan shakut shaja ai Jau ni byin tai wa ma ai. Shanhte a Hpung jashawn ya lu ai chyeju atsam a majaw, nat dumsa ni gaw grai mau ai hte tsang ai myit ni rawng wa ma ai.

Ndai Nat dumsa ni e, gunglau ai majaw, Roma amyusha ni rai nga ai uphkang du wa gaw, Nawku Hpung magam gun ni hpe hkan rim wu ai. San Pra ai Denis hte Jau lahkawng hpe mung htawng kata e, aten grai na hkra sharawng da ai hpang, shanhte masum tinang a du ni hpe kahtam di sat kau ya ma ai. Shanhte a hkum tsawp ni hpe gaw, Seine Hka kata de kabai bang kau ma ai. Raitimung, dai hkum tsawp ni hpe bai sai la nhtawm, ya aten hta San Pra ai Denis a Nawku Htingnu gap da ai shara kaw makoi mayang da nga ai. Dai shara gaw, daini e Fransik amyu sha ni a lupwa byin tai wa sai mung rai nga ai.

San Pra ai Denis a Poi hpe, Kahtawlik Nawku Hpung Shata hti laika hta 1568 ning, Wa Sarabyin Pius (V) a lak htak shaloi, bang shalawm dat sai rai nga ai. Dai majaw, San Pra ai Denis a Poi hpe lai wa sai A.D (800) ning daram kawn galaw hpang wa sai lam shi a labau hta mu lu nga ai.

Daini, Nawku hpung gaw, San Pra ai Denis a Poi Nhtoi galaw nga ga ai hte maren, anhte a myit masin hta mung, tinang a buga ginra a matu sha n rai, Karai Kasang Wa a myit ra sharawng ai magam rai jang, kaning re ai shara de raitim, sa du nna, tinang a makam masham hpe sakse hkam lu ai ni byin tai wa lu na matu, akyu jawm hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)