Jau Shatai Nawku Daw Jau Ai Lamang Shai Hkat Ai Lam Hte Seng Ai

San: Chyeju madu wa jau e anhte jing hpo hte miwa Jau tai ai lam shai hkat ai kun ngai mu mada ai hku go miwa jau tai ai shaloi go no ku ton ko madu ye su a sum la ni u dang sum la ni hpa mung n nga ai hpe mu mada ai an hte jing hpo jau ni jau tai ai sha loi go madu ye su a sum la ni u dang sum la ni wan shato ni sha chyi rai n na she jau tai ai lam hpe hkam la ai hpe mu mada ai n dai lam ni hpe nau n chye na ai majo san dat ai chye ju hte no htai ya rit. Zau Bung Jau Aseng, Maria Sara Ninghtawn, Ban Hkung Yang mare kaw nga nna ya ten Miwa mung Hung Ho kaw du nga ai  RIta pau.sang bok pa a ga san hpe htai ya na nngai.

Htai: Jau Shatai Sakramentu hpe “Priestly Ordination” ngu tsun ai. Ordination ngu ai ga si gaw Latin ga “Ordines” ngu ai kaw nna yu hkrat wa ai rai nga ai. Dai hpe English ga hku “Orders” ngu tsun ai. Orders ngu ai lachyum gaw “tsang madang” ngu ai lachyum hku jai lang ai rai nga ai. Dai Majaw anhte Kahtawlik Nawku Hpung hta Kasa ni a Karai magam gun tsang madang hpe tsang madang hku masat nna galaw ai hpe shadan shadawng nga ai: (1) Saradaw Aya tsang madang “Episcopal Ordination”; (2) Jau Aya tsang madang “Priestly Ordination”; (3) Deacon Aya tsang madang “Deaconate Ordination” ni rai nga ai. Dai tsang Aya masum hpe English ga si hku “Holy Orders” “chyoi pra ai Karai magam gun ahkaw ahkang tsang madang” ngu shamying ai. Ndai tsang madang hta lawm ai ni hpe “Cleric” ngu bai shamying shaga ma ai; Jinghpaw hku chye na la ga nga yang Jau wuhpung hta lawm ai ni ngu ai rai nga ai.

Dai majaw anhte Kahtawlik Nawku hpung hta Deacon Aya shatai ai, Jau Aya shatai ai, bai Saradaw Aya shatai ai nawku daw jau magam ni (Liturgical celebrations) nga nga ai.

Ndai Aya ni hpe shatai ai Liturgical Rite ngu ai nawku daw jau lamang hte akyu hpyi ga, bai nawku htung lailen hte hkrang kumla ni gaw shi a tsang hte tsang mungdan shara shagu kaw maren sha rai nga ai. Lachyum mung maren sha rai nga ai. Raitim, htunghking, buga ginra masa ni hta hkan nna ngam da mai ai, jat bang mai ai kumla hkrang n kau ni gaw nga na rai nga ai. Madung ahkyak ai n lawm n mai ai akri madun akyu hpyi ga ni hte htung lai, kumla hkrang ni hpe gaw n mai lai ai, n mai ngam da ai. Lai yang, ngam da yang dai aya shatai ai n awng ai rai nga ai.

Ya hpu nau wa tsun ai Jau aya shatai ai nawku daw jau magam hta wudang ni n lang ai ngu ai gaw shanhte mungdan a masa lam, shing n rai, htung lai masa lam, shing n rai, kaga masa lam langai ngai a majaw n lang ai rai na nhten. Jau aya shatai nawku daw jau lamang hta wudang lawm nan lawm ra ai ngu gaw n rai nga ai.

Ndai aya masum hte hpe dang ai/shatai ai hta Ahkang aya lu ai wa e dai tsang madang aya hpe dang da ai rai yang sha dai aya hpe hkam lu ai rai nga ai. Saradaw aya hpe gaw Sarabyin e dang ai rai nga ai; Saradaw shatai ai hpe mung Sarabyin sha shatai ya ai rai nga ai; raitim, shi n du lu ai shara ni hta, shing n rai, kaga lam amyu amyu a majaw shi hkum nan shatai ya n mai byin ai shara/ aten ni hta “Delegation Power” ngu ai Saradaw shatai na ahkang aya hpe Cardinal kaba ni hpe jaw nna Saradaw shatai mai ai rai nga ai.

Jau aya hte Deacon aya hpe gaw Ginwang Up Saradaw, shing n rai, sasana wuhpung a lit hkam Saradaw kaba ni e dang da mai ai hte shatai mung mai ai; Saradaw ginwang langai ngai kaw ginwang Up Saradaw hpe shatai shangun tim mai ai. Tinang dang da ai masha hpe kaga Saradaw masha ni hpe shatai shangun na rai yang garum hpyi lit shatsam laika hte hkrak rai ra ai.

Ndai aya masum hte hpe aya dang ai lamang hpe Misa Hkungga hta sha galaw ra ai ngu mung matsun da nga ai.

Dai majaw Jau aya dang, Jau shatai ai hta tara shang ai, n shang ai; Jau shatai ai nawku daw jau lamang hpe nawku hpung kawn masat da ai akri madung ahkyak ai htung lai ni hkrak galaw ai, n galaw ai, akyu hpyi ga hte kumla ni hpe hkrak galaw ai, n galaw ai hkam la na wa kaja wa dang da hkrum sai wa re ai, nre ai hta sha madung rai nga ai. Mungdan, buga ginra, htunghking lailen ni hta hkan nna jat bang ai, shayawm da mai ai hpe shayawm da ai lam ni gaw mai ai rai nga ai. Dai zawn galaw na rai yang mung mabyin masa hte hkrak seng ang ai ni hpe tang madun nna galaw ra ai. Dai akri madung ahkyak lam n re ai ni hpe jat bang na, yet kau na ahkaw ahkang mung Seng ang ai Ginwang Up Saradaw hta sha lit nga ai rai nga ai.

By Fr. Patrick Gawmaw Hkawng Yae

#rvakachinservice