Villanova Mare na San Pra ai Thomas a Poi Nhtoi (September 22)

San Pra ai Thomas gaw, mungkan arung arai ni hpe tsep kawp ndang kau nna laja lana tara shadik let nga ai wa rai nga ai. 1488 ning hta Spain Mungdan, Castile mare kaw shangai chyinghkai wa ai. Kanu yan Kawa gaw, grai myit su ai ni rai nna, Thomas hpe matsan masha ni a ntsa matsan dum myit tawn na matu myit jasat dawk bang ya kau da ma ai. Villanova mare kaw laika sharin kaba wa ai majaw shi a mying kaw shalawm da ai rai nga ai.
San Pra ai Thomas Shi a asak (15) ning, du ai shaloi Cardinal Sara Kaba Zimenez hpaw da ai Alcafa mare na, Dakkasu kaw laika matut sharin la ai hpang Ildefonso College kaw na M.A Janmaw gup la lu sai. Hpang de shi gaw, Philosophy “Myit kung zet hpaji” Sara mung tai wa sai rai nga ai.
1518 ning hta Salamanca mare na, Augustinian Jau wuhpung de shang mat wa nna, 1520 ning hta Jau tai wa nu ai. Shi gaw, bungli galaw shaja ai Sara langai mi mung rai nga ai. Mungkan arung arai ni hpe koi lu ai made koi nna, matsan mayan rai shanu ngai lai wa sai. Saradaw aya dang da hkrum ai hpang mung, shi gaw grai kam ram ai wa re majaw, shi a manang Saradaw ni gaw shi hpe grai tsawra kamhpa ma ai. Shi gaw masha kaga ni a matu, sumnung shingdi myit, shagrit shanem ai myit jasat ni a kasi majing tai wa sai.
San Pra ai Thomas gaw, 1544 ning hta Valencia ginwang na Saradaw Kaba tai wa sai. Shi gaw, Hkamja lam n kaja mat ai majaw, Trent Zuphpawng kaba hta nlu lawm nna, shi a malai Huesca ginwang na Saradaw hpe lit shatsam dat wu ai.
1555 ning, September shata (8) ya shani hta Saradaw Thomas gaw, Madu kaw yup pyaw ban sa mat wa sai rai nga ai. Shi hpe “Spain Mung a Kasa, Apostle of Spain” nga nna masat shagrau ga ai.
San Pra ai Thomas n nga mat ai hpang, 1618 ning, October shata (7) ya shani hta, dai aten na, Wa Sarabyin Pawlu (V) kawn, Shi hpe A Lu ai masha hku nna masat shagaru dat ya sai rai nga ai.
Dai hpang, 1658 ning, November shata praw (1) ya shani hta, dai aten na Wa Sarabyin Alexander (VII) kawn shi hpe san pra ai masha dang dat let, shi a Poi Nhtoi hpe September shata (22) ya shani masat shagrau dat ya sai rai nga ai.
Daini Nawku hpung gaw, San Pra ai Saradaw Thomas a Poi Nhtoi hpe galaw nga ga ai hte maren, anhte a myit masin hta mung, shagrit shanem ai myit jaw ya myit ga matu, alak myit akyu hpyi la nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)