Wa Sarabyin: Myit Masin Salum Hpe Shamai Shatsai Na Gaw Madat Hkam Sha Lawm Ai Kaw Na Hpang Ai Ngu Tsun Dat Ai Shiga

Wa Sarabyin Francis gaw, September 5, laban shani, “Madu A Lamu Kasa Akyu Hpyi” ten, dai shani hti ang ai Kabu Gara Shiga Chyum Laika daw hpe sumru woi da let, myit masin salum hpe shamai shatai ya na matu gaw madat hkam sha lawm ai kaw na hpang ai ngu sharin shaga da nga ai.

Kabu Gara Shiga hta Madu Yesu gaw na n na ai wa a nsen hpe shawng madat hkam sha lawm ai hpang she shi a na hpe masawp shamai shatai ya ai. Dai gaw salum hpe shamai ya na gaw shawng madat hkam sha lawm jang she mai byin ai ngu ai lachyum rai nga ai.

Yesu tsun ai “Ephphatha” ngu ai lachyum gaw “hpaw wa u” ngu ai rai nga ai. Dai na n na ai wa gaw anhte ni na tu ga ai raitim, n na lu byin chye ga ai hpe kumla madun ai mung rai nga ai.

Dai gaw kata kaw nna nan na n na ai hpe Yesu Madu shamai shatsai ya ai kumla mung rai nga ai. Hkum hta kap ai na hte n na lu ai hta masin salum kaw na n hkam sha chye ai, n na lu ai gaw grau nna sawng ai na lahpang ai lam rai nga ai. Hpa majaw nga yang, anhte ni masha kaga kadai hpe mung n madat ya lu wa ai, n hkam sha lawm ya lu wa ai majaw rai nga ai. Yawng gaw anhte a matu, ngai a matu sha myit wa ai hte Karai Kasang kaw na, hpu nau ni kaw na, masha kaga ni kaw na sharin hkam la na n myit wa chye ai, san san nga na myit wa chye ai majaw rai nga ai. Masha ni a sak hkrung prat hte anhte hpe madat chye shangun, hkam sha shangun ai rai yang gaw anhte ni gara hku sak hkrung nga pra na, makam masham hta gara hku kung hpan rawt jat wa na hpe chye na hkap la sung lang lu na rai nga ai, ngu mung Wa Sarabyin sang lang sharin shaga da ai.

Anhte hte nihtep ai ni rau aten jaw let madat hkam sha lawm shaman ai gaw kaga masha ni hpe gara hku madat hkam sha lawm na mahkrun lam grau chye wa na rai nga ai. Kun dinghku masha ni a lapran hta sha tsun shaga nga ga ai rai yang, mi shawng de tsun sai hpe sha kahtap kahtap nna tsun nga ai majaw gaw madat hkam sha lawm ai lam ningra wa chye nga ai. Shada tsun shaga ai ladat hpe ga si hte tsun shaga ai hku n rai, simsa ai hku nga let tsun jahta ai kaw nna hpang chye ra ai. Masha kaga ni a mayak manghkang ni, jam jau lam ni, myit mada lam ni hpe myit galu kaba ai hte hkam sharang let madat hkam sha lawm chye na gaw grai ahkyak nga ai, ngu mung Wa Sarabyin Francis sakse hkam da nga ai.

Karai Kasang hte rai tim dai hku sha azim shim nga nna Karai Kasang hpe madat hkam sha chye ra ga ai. Anhte hpyi mayu ai akyu ara ni n hpyi shi yang Shi a nsen hpe shawng madat hkam sha ra ga ai.   Kabu Gara Shiga hpe madat hkam sha lu na matu aten hpe tam la chye ra ga ai. Anhte a hkum hpe ndai shara kaw Karai Kasang hpe madat na matu du nga ai rai ga ai hpe dum shai ra ga ai. Yesu Madu gaw Mungga rai nga ai. Kabu Gara Shiga hpe madat na aten jaw ai a marang e wenyi hkam ja lam lu la na ga ai. Anhte a matu tsi kaba gaw, shani shagu azim shim nga nna Karai Mungga hpe madat hkam sha ai rai nga ai.

Hpang jahtum mungga hta, Yesu Madu tsun ai “Ephphatha” hpaw wa u, ngu ai ga hte maren Shi a mungga hpe madat hkam sha sak hkrung lu na matu anhte a masin salum hpe hpaw tawn da ga, ngu Wa Sarabyin Francis sharin shaga let Kanu Nu Maria gaw Shi a kasha Yesu hte hpu nau ni hpe hkam sharang myit kaba hte myit lawm hkawm lawm madat hkam sha lawm chye na matu garum ya u ga, akyu hpyi let gin chyum dat da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-09/pope-at-angelus-healing-of-the-heart-begins-with-listening.html