Wa Sarabyin: Anhte A Makam Masham Prat Hta Gara Hku Sak Hkrung Nga Ga Ai Kun? Sumru Na Aten Jaw Ga

Akyu hpyi bu hkawm ai ni hpe Vatican, San Pawlu VI hkaw hta hkap hkalum la let bat shagu, laban bat masum (3) ya shani hpung masha ni hte hkrum shaga ai lamang hpe Wa Sarabyin Francis woi awn galaw lai wa sai hpe Vatican Shiga Dap kaw nna ndau da ma ai.

Shi a tara mungga hpe gaw San Pawlu Galati hpung masha ni hpang de shagun dat ai laika hta na rai nna, “anhte a makam masham prat hta gara hku sak hkrung nga sa ra ga ai hpe aten la nna sumru chye ga, nga nna n-gun jaw da ai rai nga ai.

Hkristan nnan sha naw tai wa ai Galati hpung masha ni shanhte a makam kaw nna shut shai ai lam de hpa majaw bai gale mat chye ai hpe sumru let dai n jaw n ang ai lam hta hkawm sa ai rai yang Karai kasang a chyeju ningra wa na hpe dum hprang nna Karai Kasang hta ngang grin ai makam masham tawn da na matu San Pawlu Galati hpung masha ni hpe shadum da ai lam rai nga ai.

Madu Yesu a kasa ni mung shawng daw hta shanhte a shut shai ai mungkan kyang lailen sat lawat ni hte Yesu a hpang hkan ni ngu sakse hkam lai wa ma ai hta hkrat sum lam law law nga lai wa ma ai raitim, Yesu Madu hta kam sham ai myit kaba a majaw sha shanhte a makam masham n shamat kau ai rai ma ai; ningnan re ai makam masham sakse ni tai wa ma ai, ngu mung Wa Sarabyin Francis sang lang da nga ai.

Hkristu A Tsaw Ra Myit Gaw N Htum Ai Hkye Hkrang La Lam Rai Nga Ai

San Pawlu Galati hpung masha ni hpe hkaw tsun ai hta Karai Kasang a tsaw ra myit hpe madung da sumru chye na matu rai nga ai: Yesu Madu a nni nkri hkam, si hkam ai nna, bai hkrungrawt wa ai hte sumsing lamu de lung wa ai gaw anhte a matu chyeju rai nga ai; San Pawlu a yaw shada ai gaw Galati hpung masha ni satan a mahkam hta n lup si mat na hte Hkristu a tsaw ra myit madun ai wudang ntsa si hkam nna bai hkrungrawt ai hpe akri madung da nna shani shagu na sak hkrung lam hpe jaw ai n htum n wai mat ai hkye hkrang la lam hta hkawm sa na matu rai nga ai.

Galati hpung masha ni mung San Pawlu shadum sharin shaga ai hpe chye na hkap la wa ma ai. Dai gaw shanhte wuhpung wuhpawng hta Chyoi Pra ai Wenyi bungli galaw nga ai majaw rai nga ai.  Shanhte ni gaw Chyoi Pra ai Wenyi a chyeju hkum sum hpa hpe hkam la let shada garum shingtau ai magam hpe shanhte a lapran shada daw jau nga ma ai. Dai gaw Chyoi pra ai Wenyi a chyeju kumhpa nan rai nga ai.

Karai Kasang gaw shanhte a matu makam masham hpe gun sa ya ai. Chyoi Pra ai Wenyi gaw shanhte hkam la lu ai mahkrum madup a npawt daju rai nga ai. Galati masha ni gaw shanhte naw ai nat ni hpe kau da nna Karai Kasang hpe kam sham nawku wa ma ai.

Labau hta na kam sham ai Galati hpung masha ni a mabyin mahkrum madup ni gaw daini na anhte Hkristan ni hta mung byin chye nga ai; makam masham hpe jashuk, lam shadam hkrum ai hta lawm mat chye ai hte dai shut shai ai makam hta hkawm sa shakut chye ma ai; ndai zawn re ai mabyin ni hpe anhte ni galoi mung sadi maja nga ra ga ai ngu Wa Sarabyin Francis shadum da nga ai.

Hkristu a tsaw ra myit gaw anhte prat a madung daju rai nga ra ai

Anhte a makam gaw gade madang kaw rai taw ai, dai makam hta gara hku sak hkrung nga ga ai, anhte a hkye la Madu Hkristu a tsaw ra myit gaw anhte prat a akri madung daju kaw rai nga ai kun, ngu ai ni hpe shani shagu sumru nga ra ga ai; manu dan sumsing sutgan hpe galoi mung tam sawk sagawn madu la nna kyem da ra ga ai; dai gaw Hkristu hta ningnan re ai tsawm htap lam hpe hkam la ai rai nga ai; ntsa lam sha n myit ga ai; tinang maga de mawng la na matu, tinang hpe myit lawm wa na matu, shagrau hkrum na matu sha n mai myit ga ai; agung alau hkrum ten hta raitim, ruyak jam jau hkrum ten hta raitim, Karai Kasang a chyeju kumhpa ni hpe matut manoi rai nna hkam la lu hkra shakut ra ga ai; Karai Kasang a tsaw ra matsan dum myit gaw anhte hta galoi mung anga nga ra ai, ngu hpang jahtum n-gun jaw let Wa Sarabyin Francis, shi a mungga hpe ginchyum dat da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews #rvakachinservice

Source : Vatican News