Nu Maria a Shangai Nhtoi (September 8)

Chyoi Pra ai Hkawnsek Nu Maria gaw, Madu Yesu shangai ai shaning grain du shi yang, BC (16) mayan hta Galile Mung, Nazaret mare kaw Kawa Joachim hte Kanu Anna yan kawn shangai chyinghkai wa ai rai nga ai. Kanu yan Kawa gaw, makam masham grai nang ai rai nna, grai shakut ai yan mung rai nga ai.

Raitimung, asak kaba mat nna kashu kasha n lu ma ai. Shan hpyi ai hte maren, Karai Kasang gaw, shan hpe “Num Mahkra hta A Lu ai Shayi Sha” hpe mungkan ting chyam bra hkra chye shangun sai. Shangai wa ai ma ngai a mying hpe Maria ngu nna shingteng amying jaw ya masai. Shi gaw, Mesia Hkye la Madu Yesu a Kanu tai wa na shayi sha rai nga ai.

Nu Maria a shangai nhtoi, September shata (8) ya hte Npawt Shut Hpyit Mara N Kap ai Sha Na-um Na-sin rai wa ai Poi, December (8) hta re ai majaw, shata (9) hpring ai nhtoi mung rai nga ai. Sasna magam gun wuhpung ni law law gaw, daini na nhtoi hta shanhte a “Wuhpung Shang Ga Sadi” tawn ai lamang ni hpe galaw ma ai rai nga ai.

Dai lam gaw, Hkawnsek Nu Maria hpe shanhte a tsawra myit hte shanhte a hkum ting hpe ap yak au ai lam hpe yaw shada nna galaw ai lam rai nga ai. Nu Maria a shangai nhtoi gaw, shinggyim masha ni a hkye hkrang la ai labau a npawt nhpang mung rai nga ai hte December shata (8) ya shani gaw mungkan ting hta simsa lam lu la na matu, shadum ya nga ai.

Nu Maria a shangai nhtoi hpe moi nnan daw de gaw, Yerusalem mare kaw galaw hpang wa ai. Dai hpang A.D (687) ning kaw nna, Wa Sarabyin Sergius gaw, Kahtawlik Nawku Hpung ting galaw na matu masat shagrin dat ya sai rai nga ai.

Daini Nawku Hpung gaw, Nu Maria a Shangai Nhtoi hpe galaw nga ai aten hta, anhte a Myanmar Mungdan lawan ngwi pyaw simsa a lu u na matu hte Mungkan hpe jahkrit shama taw nga ai (COVID-19) hpyen mung lawan hkoi san mat u ga matu, lak san akyu hpyi nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)