San Pra ai Rosalia a Poi Nhtoi (September 4)

Saint Rosalia (September 4)

San Pra ai Rosalia gaw, Italy Mungdan, Palermo mare kaw, 1130 ning hta dai daw ai rai nga ai. Shi a kawa gaw, Charlemagne hkawhkam kaba, Sinnibald, Lord of Roses hte Quisquina ni a shu mashi shu masha langai munag rai nga ai. Kaji ai ten kaw nna, Karai Kasang kaw shi a hkum ap ya kau ai; lungpu hku langai mi kaw tinang a myit ra hpe nyet kau n htawm tara shadik let nga ai; aten tup shi hkum hpe Karai Kasang kaw ap da ai.

Dai hpang Mount Pellegrino shara de htawt nna, tara shadik ai, akyu hpyi shaja ai, n dan  ndawng ai shara nga ai; jam jau hkam sharang ai; “Madu Yesua a nni nkri yubak hkam ai lam, matsan masha ni a matsan mayan sak hkrung prat hte mungkan ting na kabai da hkrum ai hpu nau ni hkam sha ai yawn hkyen lam ni hpe” aten tup shi myit sumru let dai ni a matu akyu hpyi ya ai hte bungli galaw shaja ai lam ni galaw ai.

San Pra ai Rosalia hkawn ji gaw, 1166 ning hta kadai mung n chye kau dat ai, nsa hti mat ai. Shi a moimang hpe gaw, shaning tsan na ai hpang, San Pra ai Masha ngu masat shagrin shagrau ya ma ai. Shi a dai moi mang hpe, Wa Sarabyin Urban (VIII) aten hta she mu lu ma ai.

San Pra ai Rosalia hkawnsek a labau gaw, masha kaga a wenyi lam hta tang du hkra, anhte galaw ya lu ai lam hpe shadum ya ai. Shi a sak hkrung aten ladaw ting hta Karai Kasang hta manoi manat let akyu hpyi shaja ai, jam jau jam hkau ni hkam sharang nna nga lai wa sai.

Daini, San Pra ai Rosalia a poi hpe galaw nga ga ai aten, anhte a myit masin hta mung, kaga masha ni a matu akyu hpyi garum ya lu hkra shakut lu na atsam jaw ya myit ga matu akyu hpyi la nga ga law.

 

By;

Sister Rose Angeline Maran Nang Doi (SFX)

RVA-Kachin Service (Myitkyina)

Add new comment

13 + 0 =