Nawku Hpung Shiga ( church News ) 27 August 2021

Norway Saradaw, Karai Kasang A Kabu Gara Shiga Hpe Website Hta Mara Ndau Ya Nga Sai

Norway mungdan, Trondheim na Saradaw Erik Varden gaw shi a website n’nan langai hta Kabu Gara Shiga hte rau mungga ni, myit sumru hpa ni hte kaga laika ni mara hpang nga sai hpe August 21, bat 6 ya shani, Vatican Shiga Dap kaw shachyan da ya ma ai.

Website mying gaw (www.coramfratribus.com) rai nna, August 20, bat 5, San Bernard poi shani mara hpang ai re lam chye lu ai.

“Internet, Website mahkrun lam gaw masha law law kaw du lu ai; grau nna ya na zawn chyam pra ana tsin-yam hkrum aten hta, Internet mahkrun lam gaw machye machyang ni hte Karai mungga ni hpe shachyam shabra na atsam kaba dik rai nga ai,” ngu Wa Saradaw masam maram sakse hkam da nga ai.

Website mying hpe “Coram Fratribus” ngu shamying da ai gaw, shi Saradaw tai wa ai shaloi hkam la da ai ga manoi “Coram Fratribus Intellexi” hpe la da ai re lam chye lu ai. Lachyum gaw, English ga hku rai yang, “face to face with my bretheren, I have come to understand” ngu ai rai nna, Jinghpaw ga hte rai yang, “hpu nau ni hte man hkrum hkrum shaga ai a marang e chye na wa ai” ngu ai rai nga ai.

Ndai ga manoi gaw Wa sarabyin San Gregory the Great, Myihtoi Ezekiel a chyum laika hpe lakap nna hkaw tsun da ai mungga hta na shaw la ai re lam chye lu ai. Dai mungga hpe hti hkrup ai shani hta nan shi hpe Wa Sarabyin kawn Saradaw dang dat ai lam chye lu ai ngu Wa Saradaw hkum nan sakse hkam da ai.

“Saradaw langai hku  nna ngai a sasana magam gaw Kabu Gara Shiga hpe hkaw tsun na matu rai nngai, Internet Website hpe jai lang ai mung de a yaw shada lam rai nngai, mungga hpe hpang gara taw ai ni grai law nga ma ai ngu ngai hkam sha lu ai,” ngu mung sakse hkam ga nga ai.

Wa Saradaw Erik Varden, OCSO gaw “Trappist monk,” Sehkam mung rai Saradaw mung rai nga ai. Shi gaw 1974 shaning hta shangai chying hkai wa ai rai nna 1993 shaning hta Kahtawlik makam masam hpe hkap la rai nga ai. Shaning 10 ning na ai hpang, 2002 shaning hta Charnwood nam maling hta hpaw da ai  San Bernard a Sehkam hpung de shang hpang ai rai nga ai. Jau tai ai hpang 2015 shaning hta Sehkam jawng up tai wa nna, 2019 shaning hta Wa Sarabyin Francis kawn, shaning law law Saradaw n lu byin nga ai Trondheim na Saradaw dang da, lit shatsam hkrum ai rai nga ai. Saradaw shatai poi hpe gaw Trondheim kaw 2020 October 3 ya shani galaw ai re lam chye lu ai.

Vatican Shiga Dap kaw nna ndau shana ya ai, Wa Saradaw Erik Vardan Kabu Gara Shiga ni hpe (www.coramfratribus.com) kaw shang yu let wenyi n-gun lu la mu ga yaw shada let RVA Jinghpaw Nsen Shapoi Dap kaw nna shalai ndau dat ya ga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/church/news/2021-08/norway-bishop-varden-trondheim-website-gospel-reflections.html