Arles mare na San Pra ai Caesarius a Poi Nhtoi (August 26)

San Pra ai Saradaw Caesarius gaw, A.D (470) ning hta, Francis Mungdan, Chalon-sur-saone mare kaw dai daw wa ai rai nga ai. Shi gaw, grai kaja ai Gallo-Raman (Francis hte Italy Amyusha kanu kawa) htinggaw kaw na rai nga ai.

Shi a asak (20) ning hta Jau jawng de shang ai hpang, A.D (503) ning hta Arles mare na Saradaw tai wa sai. Shi gaw, Dingda Francis mungdan na, Nawku hpung uphkang ai lam hta grai ahkyak ai shara kaw lawm lai wa sai; bai nna Arles Saradaw ginwang hpe Francis mungdan ting na Saradaw ginwang ni a Ginjaw shatai na matu woi awn ai masing kaw mung lawm nga ai.

Saradaw Caesarius gaw, uphkang lam hta grai ningtawn ai; Nawku Hpung hte n htan shai ai nna shut shai ai tara (heresy) ni hpe awng dang ai hte ning hkap kau lu ai atsam rawng nga ai. Shi a zinlum chye ai atsam a majaw, A.D (529) ning e, galaw ai Orange Mare na, Zup Hpawng “Council of Orange” hta Semi-Pelagianism ni a garum ai lam hpe lu la ai.

Shi gaw, Mama jawng langai hpaw ya nna, shanhte a matu sha n-ga htawm hpang de kaga Sasana Magam Gun Wuhpung ni a matu mung tai wa ai, hkansa tara mung ka da ya ai; dai jawng hpe shi a kanau jan yu gawn ya lai wa sai. Dai hkansa tara kaw, Mama ni shanhte a ningbaw hpe lata lu ai ahkaw ahkang hte laika hti, laika ka sharin la lu ai ahkaw ahkang mung shalawm da nga ai.

Sara Pra ai Caesarius gaw, akyu hpyi shaja ai, kasi kaja tai ai, jamjau hkam sharang ai, tawra jawng shang ai aten kaw nna atsawm sha tara shatup nga chye ai hte tara hkaw mung grai ningtawn ai shaman chyeju lu ai wa rai nga ai. Tara mungga htawn ai shaloi mung, ga si ga ngau loi ai hpe lang nna kadun dawk sha hkaw ai; ndai atsam ni a majaw masha law law makam masham grai kaba wa ma ai.

San Pra ai Saradaw Caesarius gaw, A.D (543) ning August shata (27) ya shani, Shi a asak (73) ning du ai shaloi, Madu hta yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe San Pra ai masha dang dat let, Shi a Poi Nhtoi hpe mung, August shata (26) ya shani masat shagrau dat ya sai rai nga ai.

Daini Nawku hpung gaw, Arles mare na, San Pra ai Saradaw Caesarius a Poi Nhtoi galaw nga ai hte maren, Wa Saradaw a mai kaja ai lam ni hpe kasi la nna, anhte hpung masha ni a prat hpe mung, shading sharai hkawmsa wa ga law.

By;

Sister Rose Angline Maran Nang Doi (SFX)

RVA-Kachin Service (Myitkyina)