Ramma Hte Tsawra Myit ( 06 Dec 2018 )

Ramma Hte Tsawra Myit

          Tsawra Myit ngu ai ga hpe na dat ai hte rau Ramma ni gaw hprang maja nga ga ai.Myit gumhtawn ai, tsawra myit gaw masha hpe rim sha lu ai atsam nga ai lam langai re,bai tsawra myit ngu ai ga hkaw hpe na dat ai hte kanu kawa ni gaw salum gahpra byim n-na, Myi ni shagan wa nga ai Wa Karai Kasang e nye kasha kadai wa hte sum tsaw byim taw ai kun? Nga let myit tsang ra ai lam gaw grau nga ai. Bai nna tsawra myit ngu ai ga hpe na dat ai hte Nawku hpung gaw Ja Chyum Ga hta lawm ai tsawra myit a lachyum hpe madi madun na shajin nga ai dai hta grau ai gaw Shingyim masha ni gaw shada da teng teng man man hte tsaw ra chye na madung ahkrak nga ai.Nawku hpung kaw na gaw tsawra myit hta sara ngu mai tsun nga ai.

          Tsawra myit ngu ai gaw Karai Kasang rai nga ai ‘God Is Love’ dai majaw “Love Is God” nga yang mung maren sha rai nga ai Karai Kasang ngu ai amying shing teng gaw nawku hpung a madung ga hkum rai taw nga ai majaw ndai tsawra myit ngu ai mung karai hte matut manoi nna  madung  gahkum ngu na sha mai tsun nga ai lai wa sai ten ni hta tsawra myit hpe lachyum hpaw ai shingyim masha ni gaw nawku hpung hpe madat mara nga ai, dai ni na ten gaw moi moi na Ga dingsa ni shalai nga ai ngu na sha shadu nga ai . Tsawra myit a lam ndai hta grau myit shang sha hkra tsun lu, madun lu ai lam ni hpe hkan shachyut lu sai prat rai wa sai majaw nawku hpung gaw hkan ndep mat wa ai zawn byim nga ai.Bai tsawra myit ngu ai gaw Nat langai zawn sha rai nga ai, shingyim masha ni tsun gajai nga tim kadai mung n-mu lu nga ai bai nna mungkan hta tsawra myit a lam sara kaba zawn tsun taw nga ai ni kaja wa nga yang tsaw ra myit mat nna hkan tam nga ai myitsawn sara ni byim wa ai ni law nga ai re.

Tsawra myit hte hkam sha taw ai ni gaw kara shingnip, tara shingnip ni hpe sha jahtum tam nga ai hpe mu lu ai.Daire majaw ndai lam hta ramma ni hku nna tsawra myit a matu salum duk htak ai lam hta nawku hpung gaw lawm nra ai ngu n-mai tsun shadu kau nga ai ngu madi madun mayu nngai. Makaji ai ten hta kanu gaw ma langai a matu ahkrak nga ai , malu masha nsha lu tim nra nga ai, kanu hpe mu na sha madung rai nga ai re.Sak prat ram wa ten tsawm htap mayu wa ai sha n-ga salum ni ginsup chye wa nga ai,bai kanu hpe koi gam chye wa nna kanu makau kaw nga ai pi shuk ai zawn hkam sha wa nga ai salum gum htawn chye wa ai hte kanawn mazum lam ni mung dam lada wa nga ai,jawng, makau grupyin, htingbu grupyin, nawku hpung grupyin ni a lapran myi hpaw na jawng rai chye wa nga ai

          Ndai zawn si mani ai mayak mahkak hpe hpran lu na gaw langai sha nga ai Ramma ni ntsaw rau na matu akyu grai hpyi shakut shangun ai lam rai nga ai. Madu karai kasanga  tsawra myit hpe teng sha chye na hkam sha chye na matu sharin ya  ra ai.Nu Maria hte sanpra ai ni a kabai kau da ai lam hte shagrip shanem ai hte tsawra chye ai lam ni hpe katsi chye la hkra sharin jaw shrin hkam la ra nga ai. Langai hte langai manu shadan chye na matu sharin ya ra ai. Langai a ntsa langai Amyet n-htuk na matu sharin ya ra ai. Akyu hpyi ai lam hta myit shang sha wa hkra sharin jaw ra ai chyoipra hkum hkam la ai lam hte mara raw ai lam ni a manu hpe chye na hkra shakut ra ai.Ya prat na ramma ni gaw myit hte ga shaga ai lam ni ngalaw nga masai.Message zawn re ai bai phone zawn re ni hte sha galaw ga sai re majaw nanhte a myi hpe yu nna nanhte myit hta hpa rawng ai ngai chye ai ngu n-mai tsun nga sai prat rai wa nga ai re.

Dai re majaw tsawra ai nu wa ni mung ramma ni hpe tsawra myit a lam nmyit shi yang karai a lam hpe chye na hkra shawng sharin jaw na lam hta n-gun dat ra nga ai. Ramma ni hku nna mung  ten ndu shi yang tsawra myit hpe lata ai lam hta myit nlawm na matu shadum n-gun jaw mayu ai.Tsawra myit ngu ai lam gaw Bus mawdaw zawn sha rai nga ai Bus mawdaw langai shalai kau nna,  yawn ka-un hkum rai taw, matut nna la taw u, hpang na Bus langai gaw ten du yang du wa na sha rai nga ai. Ramma ni hku nna tsawra myit hpe ginsup hpa langai zawn ahpa atang sha nmai myit sawn da nga ai.

          Ndai tsawra myit  ngu ai lam gaw nang ngai n-shangai  shi ai shaning law law ten kaw na, sak hkrung nga sai lam langai rai nga ai tinang hta grau kaba nga ai majaw hkungga manu shadan ra na gaw teng sha rai nga ai ngu tsun shadum ngun jaw mayu ai .Tinang gaw shi hpe ginsup hpa langai zawn galawa tim shi gaw hpa nbyim nga ai Tsawra myit gaw nang hpe mana hkra galaw ai ten sum tsaw mana langai zawn awra ndu ndai ndu prat de du mat chye nga ai tsawra myit a majaw ngwi pyaw simsa mat wa nu ai ngu ai gaw maumwi sha rai nga ai tsaw ra myit  a majaw myit tsang hkam sha marit nga ai lam ni gaw teng sha rai nga ai ngu tsaw ra ai ramma ni e, tsawra myit hte seng nna ngwi pyaw sim sa ai lam hpe hkam la lu u ga ngu yaw shada let, gam garan ya dat n ngai.

Ka lajang ai

John Nnye Seng Tu

RVC, Ginjaw Rung

Myitkyina.