Wa Sarabyin: Tara Upadi Npu Kaw Sha Nga Ai Ni Rai Kun, Karai Kasang A Kasha Ni Hku Nga Ga Ai Ni Rai Kun?

August 18, bat masum ya shani, Hpung shawa masha ni hte rau hkrum shaga ai lamang hta, Wa Sarabyin Francis gaw, anhte ni tara upadi a npu hta sak hkrung nga sa ra ai kun, dai tara lam hte seng nna chye na ai rai yang, Karai Kasang a kasha ni tai wa let tsaw ra hte sak hkrung sa wa na matu shaga la hkrum ga ai, ngu tsun da ai.

San Pawlu Galati hpung masha ni kaw shagun dat ai laika hta na, Hkristan masha ni a matu jaw tawn da ai tara hpe San Pawlu azing ayang sumru nna chye na da ai hpe sang lang da ai.

San Pawlu gaw anhte ni Karai Kasang ga sadi tawn da ai kashu kasha ni rai nga ai hpe tsun da ai; dai gaw Yesu Hkristu hta jahkrum shatsup shagrin da ai. Tara e gyit hkang da ai n re ai; Kabu Gara Shiga hku nna anhte hpe shalawt ya ai prat masa lam hta hkan sa na hpe shaga la ai she rai nga ai. (Ndai kaw tsun mayu ai gaw tara upadi ngu ai gaw Karai Kasang e jaw da ai mai kaja lam a matu rai nga ai; Karai Kasang hpe madung myit ra ai hpe tsun ai rai nga ai.)

Makam masham a akri madung gaw Madu Yesu hta kam sham let si hkam nna, Shi hte rau bai hkrungrawt ai lam rai nga ai; dai gaw San Pawlu hkum nan hkaw tsun ai Karai Kasang a kashu kasha ni Shi hta kam sham ai a marang e hkye hkrang la lam a ru pawt madung rai nga ai.

Hkristan masha ni gaw kam sham ai ni n tai shi ai aten ladaw, makam masham lu la ai hpang na aten ladaw ngu ai nga ai. Dai majaw dai ladaw lahkawng hta hkan sa ra ai tara ngu ai nga nga ai.

Makam masham hpe n hkam la shi a aten ladaw ni hta makam masham hpung a tara hkan shadik ra ai ngu shanhte hpe sa hting hkang na gaw n htuk nga ai; dai masa rai yang gaw, shanhte a ahkaw ahkang hpe pat shingdang ai tai nga ai; jahten sharun ai pyi tai wa chye nga ai; dai aten ladaw gaw shanhte ni mara hta sak hkrung nga ai ladaw mung mai rai na re.

Tara upadi gaw Sara zawn mung, sin makawp maga ai wa zawn mung rai ra ai.

Tara upadi ngu ai gaw tara hpe tawt lai ai hpe myit dum shangun ai hte shinggyim masha ni shanhte a mara hpe myit dum lu shangun ai rai ra ai. Tara ngu ai gaw, hpang jahtum hta, masha ni tawt lai ai lam hpe jahkring kau da shangun ai.

San Pawlu tsun ai tara upadi gaw, gawng kya ai shinggyim masha ni hpe hpaji jaw ai, hting hkang ya ai, garum shingtau ya ai tara rai nga ai.

Dai majaw gaw tara upadi hta mai kaja akyu ara, apu asi ni gaw nga nga ai; Raitim aten ladaw shadawn shadang masat jarit ngu ai gaw nga nga ai; Sasana ma ni Ramma tai wa ai shaloi, shanhte hpe sasana ma prat shaloi na zawn aten tup sin lanu lahku n ra mat sai; dai hte maren sha, masha langai mi makam masham hpe lu la wa ai shaloi, makam n lu shi ai makam hpe hkap la na matu hkaja nga ai masha ni a matu tawn da ai tara ni, dai wa a matu n ra sai tara ni nga nga ai; kaga tara jat wa ai lam ni gaw nga na re. Makam n lu shi ai wa hpe mung makam lu sai masha ni a matu tawn da ai tara hte jep hkang da n mai nga ai.

Gara hku mi rai rai, tara ngu ai gaw ahkyak ai rai nga ai. Tara dawsang ngu ai tara masa hpe sadi shahka sawn sumru jai lang na gaw grai ahkyak ai; dai rai yang she shut shai ai hku chye na ai lam n tai na re, n jaw n ang ai hku jai lang hkrup ai mung n nga na re, ngu Wa Sarabyin Francis sang lang shadum da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-08/pope-are-we-under-the-law-or-do-we-live-as-children-of-god.html