Wa Sarabyin: Hpung Shawa Masha Ni Hte Hkrum Shaga Ai Lamang Hpe San Paawlu VI Hkaw Hta Kadun Ai Hku Sha Galaw

August 3, bat 2 ya shani, lani mi tau nau shana shabra da sai hte maren, August 4, bat masum ya shani, Wa Sarabyin Francis, Hpung shawa masha ni hte hkrum shaga ai lam hpe San Pawlu VI hkaw hta, kadun ai hku sha galaw ai lam Vatican kaw nna sha August 4 ya shani matut ndau da ma ai.

Dai zawn kadun ai hku galaw ai gaw, Wa Sarabyin Francis Gemelli Tsi Rung kaw kan ga tsi lajang ai lam galaw ngut ai hpang hkring sa la ra ai majaw mung rai nga ai lam sang lang ndau da ma ai.

Dai shani Wa Sarabyin a mungga hpe “Kabu Gara Shiga gaw Langai Sha Re Ai” ngu ai gabaw hte Vatican kaw nna ndau da ma ai.

San Pawlu Galati Hpung masha ni kaw shagun dat ai laika hte shi a mungga hpe hkaw tsun da nga ai re lam mung chye lu ai.

Kabu Gara Shiga yawng gaw Madu Yesu a lam hpe madung tsun madi da ai; Kabu Gara Shiga hta grau myit lawm ai lam kaga hpa n nga ai, ngu Wa Sarabyin sakse hkam da ai.

Galati Hpung masha ni shut shai ai lam hta hkawm sa ma ai majaw San Pawlu myit tsang myit yawn nga ai lam, shanhte ni teng man ai lam de bai gayin wa na matu myit ra myit sharawng ai lam Wa Sarabyin anhte tsun dan da nga ai.

San Pawlu tsun ai hte maren, Kabu Gara Shiga gaw ahkyak dik yaw shada lam mali hpe madi madun tsun da ai; (1) Yesu Madu anhte a shut hpyit mara a matu si hkam ai, (2) Shi gaw anhte a shut hpyit mara a matu lup makoi hkrum sai, (3) Shi gaw si ai kaw nna bai hkrung rawt wa sai, (4) Shi a Kasa ni kaw sa dan dan let shanhte hte rau nga nga ai, ngu ai lam hpe madung da tsun shana ya nga ai; ndai Kabu Gara Shiga gaw shinggyim masha yawng hpe jaw ya na hkye hkrang la ga sadi hte hpring tup rai nga ai, ngu Wa Sarabyin sang lang da ai.

San Pawlu gaw shi hkaw tsun ai Kabu Gara Shiga gaw grai nan laklai dik htum ai lam nan re ai hpe chye ai, hpa majaw nga yang dai gaw Madu Yesu a lam re ai majaw re; Sak prat ram Hkristan ni shoihpa dutdang ai lam ntsa hkawm ai hpe Shi mu nga ai; ndai zawn re masa hta rai nga ai ni yawng gaw Karai Kasang a teng man ai lam hta hkawm sa let Yesu Madu hte Shi a shingran rai nga ai Karai Kasang a tsawra myit hte rau rai nga ra ai, ngu San Pawlu a teng man jaw ang ai hte daw dan nna shadum ai ga hpe hkungga manu shadan shakawn let anhte mung hpe San Pawlu a sharin shaga ai hta hkawm sa nga na matu n-gun jaw shadum da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-08/pope-at-audience-there-is-only-one-gospel.html