Hkungran Sakramentu HKam La Da Let, Masa Lam Yen Amyu Myu A Majaw Hka Bra Nga Ai Yen Mara Raw Sakramentu Mai Hkam La Ai Kun ?

San: ya anhte hkahtawlik hpung masha shada hkungran ga shaka sakramentu hpe hkam la da let kun dinghku de taw nga nna num la n myit mada ai sha mabin amyu myu a majaw dinghku hka bra mat wa ai rai tim Num wa mung nnga la mung nnga hka bra mat ai hpang e num wa mung kaga de garai num nwa ai, la wa mung kaga num garai nla shi ai rai na tinang hkrai nga naw nga yang mara raw na ahkang naw lu ai kun nlu ai kun chye mayu na wa jau ni hpang de ndai ga san san dat lu ngai chyeju hte naw htai ya rit. Shata pru Jau Gingang Rosana kaw nga nna ya miwa mung hting shung kaw du nga ai Anna Ding Rin lu Awng a ga san hpe htai ya na nngai.

Htai: Kahtawlik nawku hpung tara upadi “Canon law” a sharin shaga ai hte maren, lama na “excommunication” (shrn) interdict (shrn) “Obstinately persist in mani fest grave sin” masa lam hta rai yang Chyoi Pra Hkum Sacramentu n mai hkam la sai rai nga ai.

“Excommunication” ngu ai lachyum gaw Kahtawlik Nawku Hpung a tara hte nhtan shai ai lam ni hta na Canon law tara hta tsun da ai mara ni hpe shut hpyi ai rai yang Nawku Hpung a tara hte maren nawku hpung a shinggan de shale da hkrum ai ni hpe tsun ai rai nga ai.

“Interdict” ngu ai gaw Kahtawlik nawku hpung a tara upadi Canon law tara kawn pat shingdang da ai lam ni hpe shut hpyit ai a majaw Nawku Hpung a Canon law tara hte maren jeyang hkrum ai lam hpe tsun ai rai nga ai.

“Obstinately persist in manifest grave sin” ngu ai gaw Nawku Hpung Canon tara upadi hta tsun da ai mara kaba ni hpe shut hpyi ai hpe tsun ai rai nga ai.

Canon 916:

Mara kaba galaw hkrup ai Kahtawlik Nawku Hpung masha shagu gaw “Sacramentu of Reconciliation” ngu ai teng man myit malai majing hte mara raw sakramentu hpe shawng hkam la nna she Chyoi Pra Hkum Sakramentu hpe hkam la mai ai lam Can masat 1385 hta tsun da nga ai.

Ndai zawn re ai masa hpe Kahtawlik Hpung masha langai mi hku nna, shi hkum shi, wenyi lam hta myit masin kraw lawang kata lam hku mung, nawku hpung masha ni e mu mada ai shinggan ntsa lam hku nna mung dan dawng ra ai. Dai majaw nawku hpung gaw (1) tinghkrai kahtawlik masha a wenyi lam a matu lam woi ya ai, (2) Chyoi Pra Hkum Sakramentu hpe masan sa ai hku hkam la lu hkra lam madun ya ai, (3)makau grupyin masha e mu shut na lam hpe koi yan na matu sharin shaga ya ai.

Kahtawlik Nawku Hpung a sharin shaga ai hta Hkungran Sakramentu hkam la da sai Num hte La shada hka nna nga ai gaw mara kaba n rai kun?

Kahtawlik Nawku Hpung a tara laika hta gaw, Karai hpaji masa lam hku yu yang, hkungran sakramentu hkam la da sai yan hka mat ai gaw Karai Kasang jaw da ai n’pawt tara hpe tawt lai ai rai nga ai. “Karai Kasang matut da nu ai hpe, masha gaw n jahka kau mu ga!” ngu Marku 10: 9 hta asan sha tsun da nga ai.

Hkungran matut da sai ni hpe jahka ai lam gaw Can masat 2384 hte maren hkye hkrang la ai ga shaka hpe tawt lai ai rai nga ai. Hkungran matut da ai num hte la gaw si du hkra rau kanawn mazum na ngu ga sadi hkam da ma ai rai nga ai.

Rai ti mung, hkungran matut da ai yan hka mat nna rau nnga ai hta mara n tai ai lam mung nga nga ai. Hkungran la (shrn) num, maga mi na masha e jahka da hkrum ai rai yang dai jahka da hkrum ai wa rau nga na matu kade shakut ai rai tim, n mai byin ai masa lam hta rai yang gaw mara n nga ai rai nga ai.

Dai zawn re ai masa hta rai nga ai wa gaw mara raw sakramentu hkam la mai ai hte Chyoi Pra hkum sakramentu mung, bai kaga sakramentu ni hpe mung myit san seng ai hte hkam la mai nga ai.

Jahka da hkrum ai Kahtawlik hpung masha gaw dai zawn jahka da hkrum ai aten ladaw tup hta mai byin ai made rau bai kanawn mazum lu hkra ladat amyu myu shaw let shakut ra ai.

Mala la yak ai masa lam ni nga wa ai aten ni hta ningrum ningtau hte gan jahka nna nga ra ai aten mung nga wa chye nga ai. Shinggyim lailen hta akyang hten run taw ai ningrum ningtau a majaw kasha ni hte dinghku hpe hkra machyi kaba byin shangun na masa nga wa ai aten ni hta jahka nna nga ra wa chye ai. Ga shadawn madu wa (shnr) madu jan langai ngai lu lai sha lai, nang be nna, madu jan hte kasha ni hpe zingri ai hte hpai da da nna gumhpraw shama ai zawn re ai rai yang, ngam ai nta masha ni a shimlam hte rawt jat lam a matu jahka da mai nga ai.

Kahtawlik nawku hpung gaw hkungran matut da sai ni hka na lam n-gun n jaw ai. Dai zawn hka bra mat ai hkungran num hte la hpe mung Chyoi pra hkum sakramentu hkam la na n-gun n jaw ai.

Rai ti mung, shawng de tsun dan sai yak hkak ai masa lam hte hkrum ang ai ni a matu “annulment of the first marriage” ngu ai shawng na hkungran sakramentu hpe shaprai kau sai lam nawku hpung kawn masat shagrin ya ai hpe n lu ding sa gaw chyoi pra hkum sakramentu n mai hkam la ai.

By Fr. Patrick Gawmaw Hkawng Yae

https://canonlawmadeeasy.com/2012/01/03/divorced-catholics-and-the-eucharist/