Wa Sarabyin: Yawng A Hkamja Lam Hpe Yu Lanu Lakawn Ai Gaw Grai Nan Ahkyak Dik Ai

July 11, laban ya shani, “Madu A Lamu Kasa Akyu Hpyi” ten, Wa Sarabyin Francis, “Yawng A Hkamja Lam Hpe Yu Lanu Lakawn Ai Gaw Grai Nan Ahkyak Dik Ai,” ngu tsun da nga ai lam Vatican Shiga Dap kaw nna ndau da ma ai.

Dai laban gaw, Wa Sarabyin Tsi Rung rawng ai rai nna shi tsi tsi hkam la ai Tsi Rung htap shi (10) ngu na hku wawt chyinghka kaw nna shawa masha ni hpe Madu Akyu Hpyi Ga akyu hpyi ten video live mahkrun lam hku mungga hkaw tsun ai rai nga ai.

Dai shani Wa Sarabyin Francis gaw shi a hkam ja lam a matu akyu hpyi ya nga ai ni yawng hpe mung chyeju dum ga tsun da nga ai.

“Nanhte ngai hte nihtep ai hku akyu hpyi let rau nga ya ai, garum ya ai majaw nye a myit masin kraw lawang kaw nna nan chyeju dum dik nngai,” ngu Wa Sarabyin Chyeju dum ga tsun da ai.

Dai shani na Kabu Gara Shiga hta na Madu Yesu a kasa ni pru sa nna machyi masha ni hpe sau chya ya let shamai shatsai ya ai lam hpe mung sumru woi da nga ai. Chyoi pra ai sau gaw machyi ai ni hpe chya ya ai namman sau rai nga ai; wenyi hkum hkrang lahkawng yan hpe n-gun atsam jaw ya, jat ya ai rai nga ai; dai sau gaw machyi ai ni hpe yu lakawn ai ni, shanhte hpe madat ya ai ni, nihtep ai hku nga ya ai ni, tsawra shawang myit madun ai ni a matu chya tsi kaba mung rai nga ai; ana hpe shamai ya ai hte nga pyaw hkra, hkam ja hkra shabyin ai tsi mung rai nga ai, ngu tsun sang lang da nga ai.

Matut nna mung, yawng a hkam ja lam a matu mungdan shagu na mung shawa masha ni shada yu gawn, yu lakawn hkat ra nga ai lam, dai zawn yu lakawn ai a kyu gaw kaba la nga ai rai nna dai akyu chyeju hpe n mai shamat kau ai lam, galoi mung dai akyu hpe hkam la ra ai lam, masha shagu gaw masha shagu a garum shang lawm ai hpe ra kadawn ai lam, machyi masha ni hpe ra ahkyak dik hku yu lakawn ai hta sut masa lam masa hku sha yu nna, manu shatsaw, manu dara htingram jahtuk ai ladat hte n mai ai lam mung shadum da nga ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-07/pope-francis-prays-angelus-with-faithful-from-gemelli-hospital.html