San Pra ai Bonaventure a Poi Nhtoi (July 15)

San Pra ai Bonaventure hpe Seraphic Doctor, “Hkik Hktum ai Lamu Kasa Hpaji Ninghkring” ngu nna shamying shagrau ga ai re. Shi gaw, Italy Mungdan Bagnoregio mare hta, 1221 ning hta shangai chyinghkai wa sai. Shi a asak (22) ning du ai shaloi, Franciscan Jau Wuhpung de shang wa nna, Yawhan ngu ai mying hpe Bonaventure ngu galai shamying la ai; lachyum gaw, “Htawm Hpang Kabu Na” (Happy Future) ngu ai rai nga ai.

Shi a hpaji hpe sharin shakre la na matu Paris mare de sa ai ten kaw nna, San Pra ai Thomas Aquinas hte hku hkau lai wa sai. San Pra ai Thomas Aquinas gaw, shi a hpaji machye machyang ni gara kaw na npawt nhpang la ai kun? nga nna san ai shaloi, Wudang hpe madun wu ai. Laika hpaji hkaja la na matu akyu shawng hpyi ai; laika hpaji hkaja la ai aten hta mung, matut akyu hpyi let aten shalai la ai.

“Wenyi kabu gara lu ai gaw, masha langai mi a salum kaw Karai Kasang nga nga ai, kaba di kai shaman chyeju kumla re.” nga nna San Pra ai Bonaventure ayan tsun ga ai hpe sakse hkam ya nga ai. “A spiritual joy is the greatest sign of the divine grace dwelling in soul.”

Wa Jau Bonaventure asak (35) ning hta, Franciscan Jau Wuhpung a Amu madu (General Secretary of the Franciscan) lit magam hpe gun hpai lai wa sai. Sasana magam gun ni a “Matsan Mayan Hkam ai Ga Sadi” (Vow of poverty) hte seng nna, wuhpung kata lachyum htai ai lam n jaw taw ai hpe lu shazim kau ya ai.

Lani mi hta, San Pra ai Thomas Aquinas gaw, Jau Bonaventure myit sumru akyu hpyi let, San Pra ai Francis a labau ka nga ai hpe hkuwawt hku nna yu nhtawm lai mat wa let, “San Pra ai wa hpe San Pra ai wa a bungli galaw nna nga shangun kau da ga.” (Let us leave a saint to work for a saint) nga nna tsun wu ai.

1273 ning hta, Wa Sarabyin Gregory X gaw, Jau Bonaventur hpe Saradaw Kaba Cardinal Lit shatsam ya na matu Roma mare kaw nna Dat Kasa ni hpe dat dat ai. Dat kasa ni gaw, Jau vonaventur hpe Florence mare makau na jawng langai mi kaw di, hkawan kashin nga ai hpe sa mu hkrup ma ai. Shi a hkawan kashin ai amu ni matut galaw mayu ai majaw, Dat kasa ni hpe Cardinal gupchyawp ahkyeng hte kaga seng ai arai ni hpe hpun ntsa hkring mi gan noi da ya shangun ai.

Saradaw Bonaventure gaw, 1274 ning, July shata (15) ya shani hta, Fransik mung, Lyons mare kaw galaw ai, Lahkawng lang ngu na Lyons Zuphpawng kaba, “Second Council of Lyons” kaw shang lawm taw nga yang, Madu kaw yup pyaw ban sa mat wa sai rai nga ai.

Saradaw Bonaventure n nga mat ai hpang, 1482 ning, April shata (14) ya shani, dai aten na Wa Sarabyin Sixtus (IV) kawn, shi hpe  San Pra ai masha hku nna dang dat let, shi a Poi Nhtoi hpe mung, July shata (15) ya shani masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)