Wa Sarabyin: 2022 Shaning Hta Kun Dinghku Masha Hte Seng Ai Hkrumzup Hpawng A Matu Nhtoi hte Ladat Ningnan Hpe Masat Jahkrat Da Ya Ai

July 2, bat manga  ya shani, Wa Sarabyin Francis, Video message hta 2022 shaning na kun dinghku hte seng ai hkrumzup bawngban hpawng “World Meeting of Families” (WMF) a matu format ningnan hpe jahkrat dan let Saradaw Ginwang shagu na wuhpung wuhpawng ni yawng hpe dai hkrang masa hte maren hkan galaw sa wa na matu n-gun jaw da ai lam Vatican Shiga Dap kaw nna ndau da ma ai.

World Meeting of Families hpe, nhtoi: 22-26 June 2022 hta galaw sa wa na matu masat da ya ai rai nna, mungkan ting shara shagu na Kahtawlik Nawku Hpung masha ni yawng, ndai (10) lang ngu na htuk shapraw ai ndau laika hte maren hkan sa shakut na matu mung matut n-gun jaw shadum da nga ai.

WMF lamang galaw ai hpe Roma kaw madung ahkyak la nna galaw sa wa na raitim, mungkan ting hta mung galaw sa wa na rai ga ai, ngu Wa Sarabyin Francis, bat manga ya shani, shi a Video message hta tsun ndau da nga ai.

“Chyam bra ana zingli a majaw, laning mi tup jahkring da ra mat ai hpe bai galaw sa wa lu na sharawng awng nga ga ai gaw grai nan kaba la ai sharawng awng ai lam nan rai nga ai, ngu mung Wa Sarabyin matut tsun shapraw da nga ai.

Buga kaw nna mungkan chyam hkra

Ndai WMF lamang hpe buga kaji shara shagu ni hta nga ai kun dinghku masha ni hpawng de galaw hpang ai a marang e, mungkan shara shagu de television mahkrun lam, online social media lam ni hku shachyam shabra sa wa let, n dum, n hprang shi ai kun dinghku ni mung dum chye hkan galaw sa wa lu na myit mada ai lam, ndai mahkrun lam gaw mungkan ting chyambra wa hkra sasana galaw ai ahkaw ahkang kaba mung rai nga ai lam, Wa Sarabyin sang lang shadum n-gun jaw da ai.

(10) lang ngu na kun dinghku zuphpawng gaw “Multicentered” ngu ai mungkan ting yawng kalang lata rau jawm galaw sa wa ai ladat rai nna, mungkan shara shagu na, Saradaw Ginwang shagu wuhpung wuhpawng ni rau shang lawm ai ladat rai nga ai.

Roma kaw madung da galaw sa wa na rai nna, kun dinghku hte seng ai dakkasa ni gaw kun dinghku hte seng ai poi nhtoi hta yawng rau shang lawm na ladat rai nga ai. Sagurem wuhpung ni hte rau Misa Hkungga jawm nawng rau shang lawm na ladat rai nga ai. Galaw sa wa ai lamang ni yawng hpe mung mungkan ting na shiga shapoi dap ni hta ndau shapoi ya ai ladat rai nga ai, ngu Vatican kaw nna ndau da ya ma ai.

Ndai lam hte seng nna Saradaw Ginwang kata, Jau Ginwang kata, buga mare kata ni hta tsang hte tsang tau nau baungban hkyen lajang sa wa magang ra ai lam Wa Sarabyin Francis shadum n-gun jaw da nga ai.

By Fr. Patrick Gawmaw Hkawng Yae

https://www.vaticannews.va/en/pope/news/2021-07/pope-francis-world-meeting-families-special-format.html

02 July 2021, 13:13