Radio Veritas Asia Buick St., Fairview Park, Queszon City, Metro Manila. 1106 Philippines | + 632 9390011-15 | +6329390011-15
Kasa Thomas A Poi Nhtoi (July 3)
Kasa Thomas hpe Tsaban Langai hta, Galile kaw e shangai chying hkai wa ai rai nga ai. Madu Yesu a hpang hkan Kasa Langai mung rai nga ai.
Shi gaw, Galile ginwang kaw na shagrit shanem myit kaba dik ai wa mung rai nga ai. Madu Yesu Wudang ntsa Jen noi sat hkrum ai hpang shi gaw, Kaga Kasa ni hte rau n nga ang ai aten hta, Madu Yesu bai hkrung rawt sai nga nna tsun dan ai hpe nkam kau wu ai. Ndai mabyin a majaw, shi hpe “Aloi sha nkam hkraw ai Thomas, Doubting Thomas” nga nna shamying kau hkrum wu ai. Ndai mabyin a hpang bat mi na ai shaloi, Thomas gaw, kaga kasa ni hte arau nga nga yang Madu Yesu bai dan pru dan ai.
Dai shaloi Yesu gaw, Thoams hpe shaga la nna, “Nye a garep kaw na a layung jahsawn yu u ngu tsun ai hte maren, Thomas hkan galaw ngut ai hpang, “Nye a Madu, Nye a Karai Kasang” nga nna shi a kam sham ai myit hpe tsun ai. Shaloi Yesu gaw, “Thomas e, nang mu lu nna kam ndai, N mu lu timung kam sham ai ni gaw, alu ma ai” ngu nna tsun dat wu ai. (Yawhan 21:24-29)
Matsun hkai hkrat wa ai labau hta, Pentecost poi hpang kasa Thomas hpe mayam shatai nna India mung na Gundafor mying ai hkawhkam kaw dut jaw kau ai rai nga ai. Kasa Thomas dum nta gawgap ai lam hta ning tawn ai lam chye lu ai shaloi hkawhkam wa gaw, shi hpe grai hkyik ai hkawhkam hkaw shachyaw shangun ai nga ai. Raitim, Kasa Thomas gaw, hkawhkam wa n nga ai aten, hkaw gap na matu jaw ai ja gumhpraw ni hpe matsan masha ni hpe garan gam jau kau kau rai nga ai. Hkrun lam kaw nna hkawhkam wa bai du wa ai shaloi shi gap da shangun ai hkawhkam hkaw mu mayu ai ngu wu ai.
Shaloi Kasa Thomas gaw, Hkawhkam wa e, hkaw dai hpe ya yang nang rai nmu lu ai, ndai Mungkan ga hpe nang kau da ai hpang she wa lu mu na rai ndai ngu nna bai htan ya ai. Hkawhkam Gundafor gaw, nau pawt mayu nna Kasa Thomas hpe wan mang kaw jahkrung kakang kau maw nga wu ai. Shaloi hkawhkam wa a kahpu gaw, hkawhkam wa hpe, “Hkawhkam wa e, na a matu sumsing ja mungdan kaw Thomas gap tawn ai hkaw hpe ngai shingran mu da ni ai” nga nna tsun wu ai.
Dai majaw, hkawhkam Gundafor gaw, Thomas hpe shalawt kau ai sha n-ga, hkawhkam wa hkum nann hte shi a masha law law wa kashin kamun Sacramentu hkam la ma ai. Kasa Thomas gaw, India mung ting hta, kabu gara mungga hkaw hkawm sanu ai. Aten kade nna yang Kasa Thomas hte Hkawhkam Mazday a lapran mang hkang kaba pru wa ai. Hkaw Mazday gaw shi a madu jan hpe makam masham de Kasa Thomas woi gale la ai majaw kawng ntsa kaw, Thomas hpe baw htau sat kau nu ai.
San Thomas gaw, A.D 72 Ning, December shata (21) ya shani, India Mungdan, Maypore hta e, Madu Kaw yup pyaw ban sa mat wa sai rai nna, shi a Poi Nhtoi hpe shaning shagu July Shata Praw (3) ya shani hta galaw ya ai rai nga ai. Kasa Thomas hpe, “Dum nta gap ai ni laksama ni a kam hpa mai ai San Pra ai Kasa” langai hku nna Nawku hpung masat da ai rai nga ai.
By;
Sister Rose Angeline Maran Nang Doi (SFX)
RVA-Kachin Service (Myitkyina)
Add new comment