Madu Jan Naw Lu Nga Ninglen, Karat Hpe Bai Hta Ai Lam Hta,Dai Hpe Hkristan Maga Mi Hku, Dai La Hte Dai Num Mara Lu Ai Rai Kun ?

San: La langai madu jan naw lu nga ning len lawu lahta rai nga ai kahpu daw ai wa si mat ai shaloi dai la wa gaw jinghpaw htung hkying re nga nna dai karat ngu na wa hpe mung makawp ra ai nga nna dai karat hpe mung shi a ningrum ningtau bai shatai la ai. Dai hpe Hkristan maga mi hku, dai la wa hte dai num jan mara lu ai kun, N lu ai kun chye mayu ai. Panghkak Jau Ginwang, San Pio Sara Ninghtawn, Seng Mai Pa Mare kaw na Anna Jangma Roi Ji a ga san hpe htai ya na nngai.

Htai: Kahtawlik Nawku Hpung a tara upadi laika buk rai nga ai Canon law laika buk a Can masat (1) hta tsun da ai, “The canons of this Code concern only the Latin Church.” Nawku Hpung a tara upadi Canon law gaw Latin Kahtolic nawku hpung masha ni a matu laksan rai nga ai ngu tsun ai rai nga ai.

Jinghpaw Wunpawng myu sha re majaw Jinghpaw wunpawng htung hking hkan ai teng na re. Dai hte maren sha Kahtawlik makam masham hpe hkap la ai wa gaw Kahtawlik Nawku hpung a htung lai tara hpe mung hkan ra ai. Mungdan masha langai mi Shi nga ai mungdan a tara hpe mung hkan ra ai. Galang marang hpu nau myu sha ni hte rau nga yang shanhte a htung lai hpe mung jahtuk la ra ai lam ni nga wa ai. Dai zawn sha hpu nau makam hpung ni hte kanawn mazum lam ni nga yang mung shanhte a makam htung lai hte jahtuk la ai lam ni mung nga wa ai.

Ndai zawn re ai masa lam ni hta yawng gaw kaja ai ngu myit nna jahtuk da ai htung lai ni sha rai na re. Raitim, anhte shinggyim masha ni jahtuk da ai htung lai ni hta ningra ai lam ni law law nga nga ai. Karai Kasang a tara hpe pyi ningra ai ngu anhte shinggyim masha ni myit la shut chye ga ai.

Kahtawlik makam masham a sharin shaga ai hta, gara htung tara hte mi shing daw daw, gara mungdan tara hte mi shing daw daw, gara nawku hpung tara hte mi shing daw daw, kaja wa langai hpe sha lata ra wa ai lam ni nga yang Karai Kasang a tara hpe madung da lata hkan sa ra ai ngu sharin shaga da ai re.

Hpa majaw dai hku sharin shaga ai rai? Asan sha rai nga ai. Karai kasang a tara hpe gara tara mung n dep lu ai. Karai Kasang gaw tara agyi na a tara agyi rai nga ai. Hkawhkam ni a Hkawhkam rai nga ai. Hkingjawng ni a Hkingjawng rai nga ai.

“Rai ti mung, Chyum Laika ni hta tsun da nga ai hte maren, lamu ga nnan lat kaw nna lasha hte numsha hpe shi hpan da nu ai. De a majaw lasha gaw kanu yan kawa hpe kau da nna shi a madu jan ht rau kanwn mazum nga na ra ai rai nna, shan lahkawng gaw hkum shan langai sha tai na mara ai. Shing rai shan gaw, lahkawng rai nga ma ai n rai, hkum shan langai sha rai nga ma ai. Dai rai nna, Karai Kasang matut da nu ai hpe, masha gaw n jahka kau u ga, ngu Madu tsun ai,” (Mk 10:6-9).

Kahtawlik Nawku Hpung a sharin shaga ai gaw chyum a sharing shaga ai hpe lakap nna sharing shaga da ai. Dai majaw gaw Hkungran matut da ai madu jan nga ning len kaga kadai num hpe mung n mai hkung ran la sai. Hkungran Sakramentu hkam da ninglen kaba num hpe bai woi nga ai raitim dai ningrum ningtau/ num kaji ni gaw tara n shang ai.

Dai zawn woi nga ai ni gaw nawku hpung a tara upadi hte nan Sakramentu kaga ni hkam la na ahkaw ahkang ni yawng hpe pat shingdang da hkrum sai rai nga ai. Dai la wa hte num kaji ni sakramentu chyeju kumla ni n mai hkam sai. Kahtawlik Nawku Hpung hku tara shang hkungran da sai num kaba mung dai num kaji hpe la ai hta n-gun jaw ahkang jaw ai masa rai yang Sakramentu chyeju kumla ni n mai hkam sai.

Ga shadawn, num n la shi a la wa shi a kahpu a madu jan, karat hpe hkung ran la na rai yang Ginwang Up Saradaw a ahkang lu jang she mai hkung ran la ai. Hkungran Sakramentu chyeju kumla hkam la na ahkang lu na matu Nawku hpung matsun hte maren mahkrun lam hkan nna hpyi shawn tang shawn la ra ai.

Hpa majaw nga yang sai grai ni ai majaw rai nga ai. Canon masat 1091, hte maren sai ni ai ni hte dinghku n mai de ai ngu tara jahkrat da ai. Dai hpe english ga hku “up to forth degree” daw ai ni hte n mai hkung ran ai ngu tsun ai. Kasha hte kanu yan kawa majing daw ai hpe diricet line, shing n rai first degree ngu shamying ai. Kasha hte kanu yan kawa a kahpu kanau majing rai yang, bai kahpu kanau majing ni hpe gaw second degree ngu shamying ai. Kanu majing, shing n rai, kawa majing a kahpu kanau majing ni a ningrum ningtau ni hte kahpu kanau majing ni a ningrau ningtau ni hpe gaw third degree ngu shamying ai. Kanu majing, shing n rai, Kawa majing hte kahpu kanau ni a kasha ni hte kahpu kanau majing ni a kasha ni hpe gaw forth degree ngu shamying ai.

Ndai forth degree madang hta na masha ni dinghku de nan de ra ai masha hta nga wa yang Ginwang up Saradaw kaw nawku hpung a matsun da ai mahkrun lam hte maren hpyi shawn da nna ahkang lu jang she tara shang hkungran sakramentu hkam la mai ai.

Can. 1091 §1. In the direct line of consanguinity marriage is invalid between all ancestors and descendants, both legitimate and natural.

§2. In the collateral line marriage is invalid up to and including the fourth degree.

§3. The impediment of consanguinity is not multiplied.

§4. A marriage is never permitted if doubt exists whether the partners are related by consanguinity in any degree of the direct line or in the second degree of the collateral line.

Nawku hpung shinggan de shale da ai dam hkrum ai ni, shing n rai, sakramentu hte nawku daw jau lam pat da hkrum ai ni ngu Nawku hpung a Canon upadi hta lawm ai tara hta hkra ai ni gaw Chyoi pra hkrum sakramentu chyeju kumla hpe n mai hkam la ai.

Kahtawlik Nawku Hpung masha shagu gaw Kahtawlik nawku htung makam hte maren sak hkrung nga sat nga sa ra ai. Kahtawlik nawku hpung masha shagu gaw Kahtawlik Nawku Hpung a sarin shaga ai hte maren kun dinghku de sa wa ra ai. Kahtawlik makam hte maren hkungran Sakramentu Chyeju kumla hpe hkam la ra ai. Kahtawlik Nawku htung hte maren hkungran sakramentu n hkam ai sha dinghku de rau nga ai ni kadai raitim, chyoi pra hkum sakramentu n mai hkam la ai.

Hkungran Sakramentu n hkam la ai sha arau nga ai rai yang gaw n mai hkam la ai. Lama na nang dinghku de na nga ai wa hpe jahka kau nna, hpang de galoi mung arau n nga sana ngu teng man sakse ni hte ga sadi hkam nna shi hpe jahka kau ai rai yang gaw mara raw sakramentu hpe bai hkam la nna, Chyoi Pra Hkum Sakramentu hpe bai hkam la mai ai. Raitim, ndai zawn masa hpe galaw lu na matu gaw dai masha hkun nan a myit hte tatut hkan shatup ai lam gaw grai nan ahkyak na re. Ga san san ai nau na wa nawku hpung a hkang da ai lam hpe hkan shatup let chyoi pra hkrum sakramentu alawan hkam la lu u ga akyu hpyi ya let ga san hpe ndai kaw naw jahkring na nngai. Chyeju kaba sai!

Hkungran Sakramentu hkam la ai madung yaw shada ai gaw (1) Karai Kasang a wenyi hte bung ai dai Num hte La shada tsaw ra kanawn mazum, madi shadaw hkat na matu rai nga ai, (2) Karai Kasang a hpan da magam rai nga ai kashu kasha mayat maya lam hta ta tut shang lawm na matu rai nga ai, (3) hkam la lu sai kashu kasha ni hpe mbau sin makawp maga na hte, makam masham lam hta wenyi lam hta, machye machyang lang ni hta shakung jahpan ya na matu rai nga ai.

Hkungran Sakramentu hkam nna dinghku de ai ni gaw (1) Karai Kasang hpe dingman dinghpring san seng san pra ai hte nawku daw jau na matu, (2) Tinang hkung ran ta matut da sai ningrum ningtau a ntsa sadi dung let tsaw ra nga na matu, (3) hkam la lu sai kasha ni hpe htep lahti bau kaba na matu, hte (4) shinggyim wu hpung wuhpawng hpe rawt jat kalu kaba shangun na matu rai nga ai (Role of the Christian family, No. 56).

#question