Wa Sarabyin: Kam Sham Mu, Karai Kasang Hpe Tam Ai Hta Galoi Mung Hkum Pu Ba Dum U!

June 20, pranwan ladaw (12) ngu na laban shani, “Madu A Lamu Kasa Akyu Hpyi Ga” tsun ngut ten, dai shani hti ang ai Kabu Gara Shiga Chyum Lai ka hpe lakap nna Wa Sarabyin Francis mungga htawn da nga ai.

Madu Yesu nbung laru hte rau hka len hpe shazim kau ai hte Kasa ni makam hta ngang kang nga na matu shadum n-gun jaw ai lam rai nga ai. Karai Kasang hpe tam ai hta galoi mung hkum pu ba ga ngu Madu Yesu Shi a kasa ni hpe shadum n-gun jaw ai rai nga ai, ngu Wa Sarabyin Francis sang lang da nga ai.

Yesu Madu shani tup sasana magam bungli galaw da ai majaw pu ba ai hte hka li mai maga de yup yaw taw nga ai ten, nbung laru kaba wa nna, hka len kaba hta wa ai majaw kasa ni hkrit kajawng let dai hkrit tsang hpa kaw nna lawt lu na matu masha atsam hte shakut nga ma ai. Raitim, lawt lam n nga ai sha, hka li lup wa ai majaw Yesu Madu hpe jasu ma ai.

Yesu Madu mung rawt wa nna hka len hte hkanawng hpe shawng shazim kau nna kasa ni a makam yawm ai lam hpe shadum let makam hta ngang gring nga na matu shadum da nga ai.

Kasa ni zawn hkrit tsang hpa lam ni hte hkrum katut wa ai shaloi, anhte ni mung Karai Kasang hpang de hpyi jahtau ra ai, Karai kasang zim sha nga ai zawn raiti mung, anhte hpe galoi mung yu lakawn nga ai rai nga ai, ngu Wa sarabyin Francis n-gun jaw shadum da nga ai.

Madu Yesu Yup pyaw taw ai zawn re anhte hte kasa ni hkam sha ai aten gaw Shi anhte a makam hpe chyam dinglik yu ai aten rai nga ai; Anhte Karai Kasang hta kam sham ai hte sha n ngut ai; Shi hte rau rai nga ra ai; anhte a mahkrum madup ka-ang kaw Shi hpe tawn da ra ai; Anhte a nsen hpe Shi kaw shapraw dan ra ai, ngu mung n-gun jaw shadum da nga ai.

Anhte a prat hta nbung laru hte hka len zawn re ai hkrit tsang lam ni hpe hkrum katut chye ai hpe sumru dum shai nga ra ga ai; ndai hkrit tsang lam mahkrum madup ni yawng hpe Karai kasang hte garan gachyan hkam sha chye ra ga ai; Shi hpe yawng tsun dan chye ra ga ai; shaloi she Shi anhte hpe makawp maga ya na, shalan shabran ya na, garum shingtau ya na rai nga ai. Anhte gaw Yesu Madu hta kam sham myit kaba tawn da ra ai; Shi a chyeju kumhpa gaw anhte a makam matu ningpawt ninghpang daju rai nga ai; Shi anhte hta mau hpa magam hpe shabyin ya lu ai; si mani ai hte laklai ai hku akyu hpyi nga ga, ngu Wa Sarabyin Francis sang lang n-gun jaw da nga ai.

Hpang jahtum mungga hta, Yesu Madu kasa ni hpe tsun ai ga “Nanhte hpa rai hkrit kajawng nga myit ta?” ngu ai ga san hte, “Nanhte kam sham ai myit garai n rawng nga myit ni?” ngu ai ga san gaw anhte hpe mung san taw nga ai; grau nna anhte yak hkak jam jau hkrum nna hkrit kajawng nga ai aten ni hta anhte hpe mung san nga ai; anhte a makam Karai Kasang hta ngang gring nga ra ga ai; Shi hpe jasu sharawt ra ga ai; Shi a Salum hpe sa akawk ra ga ai, ngu tsun shadum da let Kanu Nu Maria anhte a makam hpe shangang shakang ya u ga matu mung akyu hpyi htinglu htinglai nga ga ngu saw shaga da nga ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-06/pope-at-angelus-have-faith-and-never-tire-seeking-the-lord.html