Kahtawlik Nawku Htung Hte Marem Hkungran Lekmat Mung Nlu Ai, Dai Rai Yang, Chyoipra Hkum Hpe Mai Hkam La Ai Kun?

San: Ngai gaw hpung n bung, myu n bung ai miwa jan tai nga ai rai nna Hkatawlik naw ku htung hte maren hkrung ran lakmat mung n lu la ai. Dai rai n na nawku jawng hta chyoi pra ai hkum hpe mai hkam la ai kun? Ngai a madu wa hte rau hkungran lakmat mai la ai kun? Chye mayu n ngai. Chyeju hte naw htai ya marit. Daw Hpum Yang Gagam lawk (3) shanu nga ai Myi Tung Bawk Mai a ga san hpe htai ya na nngai.

(Practices and Sacraments)

• Chyoi Pra Hkum Sakramentu gaw Sakramentu sanit (7) hta na ahkyak dik htum daju rai nga ai. Hpa majaw nga yang Madu Yesu Hkum nan hpang jahtum daw sha poi hta shabyin da ai Shi a Hkum hte Sai nan re ai majaw rai nga ai.

“Ngai nanhte hpe kaja wa teng teng tsun made ga, Masha Kasha a ashan nanhte n sha, shi a asai hpe mung n lu myit yang gaw, nanhte hta asak n rawng lu ai. Nye a ashan sha nna, nye a asai lu ai wa kadai mung, htani htana asak lu la nu ai. Ngai mung dai wa hpe hpang jahtum na nhtoi hta sharawt la na we ai. Hpa majaw nga yang, nye a shan gaw tneg man ai shahpa majing rai li ai, nye a asai mung teng man ai lu hpa rai li ai. Nye a ashan sha nna, nye a asai lu ai wa kadai mung ngai hta rawng nga ai rai nna, ngai mung dai wa hta rawng nga nngai. Ahkrung nga ai nye Wa gaw, ngai hpe shangun dat ai rai nna, ngai gaw Wa a majaw hkrung nga nngai. Dai hte maren, ngai hpe sha ai wa mung, nye a majaw hkrung nga na ra ai. Da ndai gaw, sumsing lamu de nna yu wa ai muk rai nga ai; nhi nwa ni sha nna si wa ai muk zawn n rai nga ai. Ndai muk sha ai wa gaw, htani htana asak hkrung nga na ra ai,” (Yh 6:53-58).

Teng ai, Kahtawlik nawku daw jau lamang hta gaw kahtawlik hpung n re ai ni mung shang lawm mai ai. Shang lawm mai ai raitim Kahtawlik hpung masha n re ai ni hte Kahtawlik nawku hpung kawn dam jaw da hkrum ai ni gaw Chyoi Pra Hkum Sakramentu hpe hkam lan mai ai. Kahtawlik hpung masha langai mi kashin kamun hkam mara raw shakramentu hkam la ai wa kadai raitim, chyoi pra hkum sakramentu hkam la mai ai; hkam la na matu mung n-gun jaw da ai; mawn mawn hkam la na matu mung n-gun jaw ai. Mara kaba n shut na matu mung shadum n-gun jaw ai. Mara lu ai ni hpe mung mara raw sakramentu chyeju kumla hpe hkam la na matu mung shadum n-gun jaw da ai. Kahtawlik Nawku Hpung a tara upadi laika buk Canon masat 916 hta ndai hku ka da ai.

“Anyone who is conscious of grave sin may not celebrate Mass or receive the Body of the Lord without previously having been to sacramental confession, unless there is agrave reason and there is no opportunity to confess; in this case the person is to remember the obligation to make an act of perfect contrition, which includes the resolve to go to confession asa soon as possible.” (Can 916)

Tsun mayu ai gaw, kadai raitim, mara kaba shut hpyit ai rai yang, Mara raw sakramentu shang n hkam la ai sha, Chyoi Pra hkum sakramentu hpe hkum hkam la mu ga; lama na mara raw sakramentu hkam la na ahkaw ahkang n lu ai rai yang gaw, myit malai tawng ban nna hkam la mai ai raitim, ahkaw ahkang hte ahkring aten lu ai shaloi mara raw sakramentu tu hpe alu sha hkam la mu ga, ngu ai lachyum rai nga ai. Mara raw sakramentu hpe chyahkring hkring hkam la na matu nawku hpung masha yawng hpe n-gun jaw da ai.

“Those upon whom the penalty of excommunication or interdict has been impsed or decared, and others who obstinately persist in manifest grave sin, are not to be admitted to Holy Communion.” (Can 915)

Nawku hpung shinggan de shale da ai dam hkrum ai ni, shing n rai, sakramentu hte nawku daw jau lam pat da hkrum ai ni ngu Nawku hpung a Canon upadi hta lawm ai tara hta hkra ai ni gaw Chyoi pra hkrum sakramentu chyeju kumla hpe n mai hkam la ai.

Kahtawlik Nawku Hpung masha shagu gaw Kahtawlik nawku htung makam hte maren sak hkrung nga sat nga sa ra ai. Kahtawlik nawku hpung masha shagu gaw Kahtawlik Nawku Hpung a sarin shaga ai hte maren kun dinghku de sa wa ra ai. Kahtawlik makam hte maren hkungran Sakramentu Chyeju kumla hpe hkam la ra ai. Kahtawlik Nawku htung hte maren hkungran sakramentu n hkam ai sha dinghku de rau nga ai ni kadai raitim, chyoi pra hkum sakramentu n mai hkam la ai.

Hkungran lakmat mai la ai kun i?

Mai la ai. Kahtawlik nawku hpung hta hkungran sakramentu hkam la mai ai lam masum hpe Canon upadi hta tsun da ai. (1) Kahtawlik makam bung ai hpung masha shada hkrungran ai; (2) Kahtawlik makam hkan ai wa hte Yesu hpe kam ai hpu nau Hkristan hpung masha hte hkungran ai; (3) Kahtawlik makam hkan ai wa hte makam nbung ai, buddah, muslim, Hindu zawn re ai kaga makam hpung masha ni hte hkungran ai. Hkungran ya ai lam gaw Kahtawlik Nawku hpung matsun hte maren Kahtawlik nawku htung hku jau ni a lata hta hkungran hkam la ra ai.

Chyoi Pra Hkum hkam la mai ai kun?

Shawng de tsun sang lang sai hte maren, Kahtawlik Nawku htung lai hte maren ahkaw ahkang lu ai jau ni kaw hkungran sakramentu hpe hkam la sai rai yang Chyoi Pra Hkum hkam la mai sai.

Hkungran Sakramentu n hkam la ai sha arau nga ai rai yang gaw n mai hkam la ai. Lama na nang dinghku de na nga ai wa hpe jahka kau nna, hpang de galoi mung arau n nga sana ngu teng man sakse ni hte ga sadi hkam nna shi hpe jahka kau ai rai yang gaw mara raw sakramentu hpe bai hkam la nna, Chyoi Pra Hkum Sakramentu hpe bai hkam la mai ai. Raitim, ndai zawn masa hpe galaw lu na matu gaw dai masha hkun nan a myit hte tatut hkan shatup ai lam gaw grai nan ahkyak na re. Ga san san ai nau na wa nawku hpung a hkang da ai lam hpe hkan shatup let chyoi pra hkrum sakramentu alawan hkam la lu u ga akyu hpyi ya let ga san hpe ndai kaw naw jahkring na nngai. Chyeju kaba sai!