Myanmar Mungdan Ngwi Pyaw Simsa Lam Lu U Ga Philippine Mungdan Na Nawku Hpung Masha Ni Yawng Akyu Hpyi Na Matu Saradaw Hpawng Kawn May 30 Ya shani Hpe Masat Da Ya

Philippine Mungdan na Saradaw Hpawng “the Catholic Bishops’s Conference of the Philippines” (CBCP) kawn Myanmar mungdan ngwi pyaw simsa lam lu la u ga matu mungdan madang hku akyu hpyi ai nhtoi hpe May 30 ya shani hpe masat da ya ma ai lam chye lu ai.

Philippine Mungdan Saradaw Hpawng a hpa-awn, Saradaw Kaba Romulo Valles gaw May 30 ya shani hpe masat ai lam hte seng nna “Myanmar mung shawa masha ni hte Myanmar mungdan kata Nawku Hpung masha ni hta hkra machyi kaba lam ni hte yak hkak jam jau kaba ni law law hkrum nga ai majaw ya na zawn akyu hpyi nhtoi hpe masat ai re” lam tsun da nga ai.

Nhtoi mung Karai Langai Atai masum Chyoi Pra ai Trinita poi laban nhtoi hta ang ai rai nga ai.

“Gumshen ai lam ni htum mat u ga hte simsa lam de lam woi ya u ga matu Karai Kasang kaw hpyi nem tawng ban ga” ngu Wa Saradaw kaba Valles May 26, bat masum ya shani na ndau laika hta ndau shabra da nga ai.

Mung shawa makawp hpyen la ni hte Myanmar Hpyen hpung ni lapran gasat gala byin ai majaw Kayanthayar Jau Ginwang na mung shawa masha marai 300 ram machyu nga ai Yesu a Salum Ningsang Nawku Jawng hta, Chyoi Pra ai Wenyi Yu hkrat wa ai laban, May 23 ya shani, Myan Hpyen hpung kawn amyawk laknak kaba ni gap bun ai majaw hpung masha marai mali si mat ai hpang, Myanmar mungdan na Cardinal Charles Bo e mungdan kaga ni hpe garum hpyi ndau laika shabra da ai majaw mung, ya na zawn Philippine mung dan na Kahtawlik hpung masha ni hpe woi awn taw nga ai Saradaw Hpawng kawn akyu hpyi garum na matu, mung shawa masha hpe garum hpyi da ya ai rai nga ai.

Bat masum ya shani mung shawa masha 50,000 a lahta, Sam mungdaw hte Kayah mungdaw ni de hprawng yen hkawm ra ma ai lam, hprawng yen ai ni law malawng gaw Ginwang Up Jau dung jawng wang, Ma Ma Jawng wang, hte nawku Jawng wang ni hta hprawng yen nga ma ai lam buga masha ni shana ya ai a marang e chye lu ai lam mung RVA kawn tsun da nga ai.

Sak kung dinggai dingla ni hte sasana ma ni gaw nawku jawng ni kaw sha machyu nga ma ai lam, dai nawku jawng shagu hta sumpan ahpraw ni hpe sharawt da ma ai lam, Myanmar Hpyen hpung ni kawn laknak kaba amyawk ni hte gap bang ya ma ai lam, asak 20 ning re ai ramma langai mi tsun dan ai majaw chyeju ai lam mung RVA kawn tsun da nga ai.

Laknak kaba ni gap ru bun ai lam gaw mung shawa masha ni, grau nna, myu shayi ni hte ma ni hpe jahkrit shama ai ai lam kaba re majaw majan hpaw ai lam hpe lawan jahkring mu, anhte akroi anoi hpyi nem ga ai, ngu Cardinal Charles Bo mung hpyi shawn da nga ai lam LiCAS shiga dap kawn ndau da ma ai.

May 30, Chyoi Pra ai Trinita poi laban shani, Philippine na Nawku Hpung masha ni hte rau anhte Myanmar Mung shawa masha ni mung akyu ja ja hpyi nga ga.

Myanmar mung shawa masha ni Simsa Rapra ai Myanmar Mungdan hpe lawan bai hkam la lu u!

By Fr. Patrick Gawmaw Hkawng Yae

#rvasia.org

#rvakachinservice

https://www.rvasia.org/church-asia/philippine-bishops-set-day-prayer-peace-myanmar