San Pra ai Simeon Stylite Kaji a Poi Nhtoi (May 24)

San Pra ai Simeon gaw, san seng san pra lam hte asim sha nta ai myit jasat hpe alak mi rai nna hkan galaw let ngai lai wa ai, San Pra ai masha rai nga ai. Shi gaw, Yawhan mying ai Tawra Jau langai mi, yu gawn da ai aen kaw nna lak san ladat shaw nna tara shatup nga ai; wut shadaw zawn re ai hpe pung hkum shatai nna dai ntsa kaw tara shatup nga ai ladat galaw nna nga wu ai.

Shi gaw, A.D 521 ning hta Turkey Mungdan, Antioch Mare kaw shangai chying hkai wa ai rai nga ai. Shi a asak (5) ning hta chyinghkai kawa si mat ai. Dai hpang shi gaw, makau mayang na Bum Ga de sa nga mat ai. Jau Yawhan kawn shi hpe yu gaw ya ai kata kaw nga kaba wa sai. Jau Yawhan hte Simeon yang aw, Stylites ngu ai wut punghkum ntsa kaw tara shatup nga ma ai.

San Pra ai Simeon gaw, akyu hpyi shaja ai hte asim sha ndan ndawng ai sha tara shatup nna wenyi lam hta grai galu kaba jat wa ai. Shi a asak (20) ning du ai shaloi, masha ni n du lu ai Bum Ntsa kaw sa nga nna tara shaku tai. Dai shara gaw, shi a myit ra grai simsa ai shara mung rai nga ai.

Dai hpang (10) ning na ai shaloi, dai shara kaw Tawra Jau jawng langai mi gap nna tara shatup na matu wut punghkum shadaw galaw let shi a ngam nga ai sak hkrung ten (45) ning tup dai kaw tara shatup let nga kau da sai. Asak (30) ning du ai shaloi, Saradaw gaw, shi a wut punghkum ntsa lung nhtawm, shi hpe Jau shatai Sacremtu hkam ya sai. San Pra ai Jau Simeon gaw, dai Wut Punghkum shadaw ntsa kaw na, Missa Hkungga nawng jau ya ai majaw, shi a manang tawra ni gaw, lakang galaw n htawm dai wut punghkum ntsa de lung let Chyoi Pra Hkum hpe hkam la la rai ma ai.

 San Pra ai Jau Simeon gaw, A.D 597 ning, May shata (24) ya shani, Madu hta yup pyaw ban sa mat wa sai rai nga ai. Shi gaw, Mauhpa lamik kumla ni law law mung madun lai wa sai rai nga ai.

Shi n nga mat ai hpang, Nawku hpung gaw, shi hpe San Pra ai masha dang dat let, Shi a Poi Nhtoi hpe mung, May shata (24) ya shani, masat shagrau dat ya sai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)