San Pra ai Paschal Baylon a Poi Nhtoi (May 17)

“Ngai gaw matsan let shangai wa ai; dai majaw matsan jamjau hkam nna si wa na matu myit daw dan da n ngai.” nga nna ayan tsun ai San Pra ai Paschal Baylon gaw, Aragon Hkawhkam a mungdan na Torre mare hta e, 1540 ning, May shata (16) ya shani hta shangai chyinghkai wa ai rai nga ai.

San Pra ai Paschal Baylon gaw, ma kaji aten hta kawng ntsa hkan sagurem let, laika hti hkaja hpang wa ai. Shi gaw, Sagurem hkawm timung, laika buk ding gun hkawm nna, laika chye ai ni kaw na sharin la la re ai. Shi hti ai laika ni gaw, makam masham hte seng ai laika buk ni rai nga ai. Dai majaw, shi a wenyi rawt jat lam a matu grai akyu pru shangun nga ai. Laika ni hti nna, myit sumru yu ai lam ni aten nan a galaw lu ai majaw, shi a san seng san pra lam a matu n gun shajat ya ai; asim sha rai nga chye shangun ai.

San Pra ai Paschal Baylon gaw, shi a asak (24) ning du ai shaloi Reformed Franciscan Magam Gun Wuhpung kaw na, Lay Brother “Jau n tai ai sha, Prat tup Brother sha tai ai wuhpung” de shang mat wa ai. Shi gaw, akyu hpyi shaja ai hte matsan mayan rai nga chye ai; shan ten malawng maga hpe akyu hpyi nna Nawku Tawn a man kaw aten shama ail Shi gaw, Chyoi Pra Hkum hte Nu Maria hpe alak mi rai nna hkungga tsawra kam hpa chye ai wa mung rai nga ai. Bai nna, makam masham hte seng nna, shingra ni law law hpe mung shi mu ga ai.

San Pra ai Paschal Baylon hpe Mungdan ting hte seng ai Chyoi Pra Hkum Poi a laksan kam hpa shamyet ai San Pra ai wa (Patron of Eucharistic Congress) nga nna shakawn shagrau ai rai nga ai.

San Pra ai Paschal Baylon gaw, 1592 ning, May shata (17) ya shani, Madu kaw yup pyaw ban sa mat wa sai rai nga ai.

Shi n nga mat ai hpang, 1618 ning, October shata (29) ya shani, dai aten na Wa Sarabyin Pawlu (V) gaw, shi hpe A lu ai masha masat shagrau dat ya sai.

Dai hpang, 1690 ning, October shata (16) ya shani, dai aten na Wa Sarabyin Alexander (VIII) kawn, shi hpe San Pra ai Masha dang dat let, shi a Poi Nhtoi hpe mung, May (17) ya shani masat shagrau dat ya sai rai nga ai.  

By;

Sister Rose Angeline Maran Nang Doi (SFX)

RVA-Kachin Service (Myitkyina)