San Pra ai Peter Armengol a Poi Nhtoi (April 27)

San Pra ai Peter Armengol gaw, lai a wa sai, 1138 ning hta, Spain  Mungdan, Catalonia mare kaw shangai chying hkai wa ai rai nga ai. Shi a ramma prat hta, shi gaw mare kahtawng hkan kashun sha hkawm ai ni hta malawm langai mi rai nga ai. Lani mi na nhtoi hta, shanhte gaw, hpaga la wuhpung langai mi hpe kashun sha maw yang, dai hpaga la ni gaw shi a kawa hpaga la ni re ai hpe chye yu kau dat ma ai. Dai aten kaw nna, shi myit malai lu mat ai. Dai majaw, Peter Armengol gaw, mara raw ya na matu hpyi nem wu ai.

Dai hpang, shi gaw, Mercedarian Wuhpung (Order of Marcedarians) de shang mat wa nu ai. Dai Wuhpung gaw, rim nna mayam shatai hkrum ai masha ni hpe hkye mawai la na matu hpaw da ai wuhpung rai nga ai. Dai hpang shi gaw, akyu hpyi shaja ai hte myit malai lu let nga mat wa nu ai.

Lani mi na aten hta, shanhte gaw mayam marai (18) hpe Moor amyusha ni a lata kaw nna hkye la na matu gumhpraw n law mat ma ai; shaloi shi a hkum hpe Moor ni hpe Ja Gumhpraw a malai ap kau wu ai. Moor ni gaw, shi hpe hpun gyit noi kau da ma ai. Raitimung, Peter n si ai hpe mu la ma ai majaw, mu ai ni shi hpe hpun kaw na bai shayu la ma ai. Peter gaw, Mercedarian wuhpung hte shi nsa hti ai 1304 ning, April shata (27) ya shani du hkra arau nga kau da wu ai.

Shi n nga mat ai hpang, 1686 ning, March shata (28) ya shani hta, dai aten na Wa Sarabyin Innocent (XI) gaw, shi hpe A-lu ai masha hku nna masat dang dat sai rai nga ai.

Bai nna, 1687 ning, April shata (8) ya shani hta gaw, Wa Sarabyin Innocent (XI) sha, shi hpe San Pra ai Masha hku nna dang dat let, shi a Poi Nhtoi hpe mung, April shata (27) ya shani ngu masat dat ya sai rai nga ai.

San Pra ai Peter Armengol hkrum ai mabyin gaw, shut hpyit mara galaw nna myit malai lu ai ni a matu, Karai Kasang a garum jaw ai shaman chyeju gaw, galoi mung a nga nga ai hpe shadum ya nga ai. Anhte mung, shani shagu anhte Hkristan sak hkrung aten hta, tinang myit ra ai hpe nyet kau nna, San Pra ai Peter zawn Sumsing Ja Mungdan de du lu na matu, Karai Kasang anhte hpe shadum ya nga ai re.

By;

Sister Rose Angeline Maran Nang Doi (SFX)

RVA-Kachin Service (Myitkyina)