Montreuil Mare na San Pra ai Opportruna a Poi Nhtoi (April 22)

San Pra ai Mama Opportuna gaw, tsa ban (8) hta sak hkrung lai wa ai rai nga ai. Asak grain aw kaji ai aten kaw nna, shi gaw, Francis Mungdan Almeneches mare kaw na, Benedictine Mama Wuhpung de shang mat wa ai.

Shi gaw, makam masham lam hta grai shakut shaja ai, Lusha gam ai hte shi chyu asim sha nga chye ai lam hta kasi kamang rai nga ai. Chyoi Pra ai Hkum hpe garan katsan ai lam gaw, shi a wenyi n gun atsam hpe shangang shakang ya lai wa sai. Chyoi Pra ai Hkum gawan yang na, asak ga ni gaw shi a matu, Nawku tawn a man e wan shaman zawn htoi tu shangun ai; shi a matu Madu Yesu hte ra kadawn nga ai hpunau ni hpe tsawra myit kaba jaw ya na, n gun atsam tai nga ai.

Shi Mama kaba lit shatsam ya hkrum ai hpang mung, Karai Kasang a ntsa shi a tsawra myit maju jung ai lam gaw, masha kaga ni a matu htoi tu ai wan shanan zawn tai ya sai.

Shi a kanau Saradaw Chrodegang sat kau hkrum ai hpang A.D 770 ning, April shata (22) ya shani hta, San Pra ai Opportuna mung, Madu kaw yup pyaw ban sa mat wa sai rai nga ai.

Shi gaw, lamik kumla law law madun dan ai hte Fransik Mungdan kaw na mying grai dan hkung ai San Pra ai masha tai wa sai.

Shi n nga mat ai hpang, Shi hpe Nawku Hpung gaw, San Pra ai Masha hku nna masat shagrau da let, shi a Poi Nhtoi hpe mung, April shata (22) ya shani masat ya nna, shaning shagu galaw ya nga ding yang rai nga ai.

Daini Nawku hpung gaw, Montreuil Mare na San Pra ai Opportruna a Poi Nhtoi hpe galaw nga ga ai hte maren, anhte hpung masha ni mung, anhte a wenyi grau nna n gun rawng nga na matu, Chyoi Pra ai Hkum hpe hkungga shakawn lu na atsam ni hpe lak san hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)