Schiedam Mare na San Pra ai Lidwina a Poi Nhtoi (April 14)

Schiedam Mare na San Pra ai Lidwina gaw, Holland Mungdan, Schedam mare kaw na magm bungli galaw sha ai Kanu yan Kawa kaw shangai chyinghkai wa nna, shannau ni yawng marai jahku rai ma ai. Shi gaw, grai zet zang ai numsha rai nhtawm, shi a asak (16) ning hta hkyen prang kaw jawn ai Ice-skating jawn shapyawn hkawm ai kaw hkala hkrum mat nu ai. Shi a prat tup n mai hkawm mat hkra machyi hkrum lai wa nu ai. Shi hkam sha ai n ji n mu hpe shut hpyit mara galaw ai ni a malai hkam sharang kau ya ai.

San Pra ai Lidwina shing gyim masha yawng a malai, Madu Yesu hkam lai wa ai nni nkri yubak lam ni hpe ding yang myit sawn sumru yu let, aku hpyi ai, Chyoi Pra ai Hkum hpe mung grai hkungga manu shadan, kam hpa ai numsha rai nga ai. Shi gaw, shingran ni law law mu ai; Madu Yesu hkam lai wa ai nni nkri lam ni hpe mung hkam sha lai wa ai; Purgatorium ngu ai Nga-rai Mung Kaji hte Sumsing Lamu Mungdan de, San Pra ia masha ni hte rau sa du yu sai. Shi nsa grai nhtum yang, (19) ning tup shi gaw, Chyoi Pra ai Hkum hta lai nna kaga hpa mung n sha ai. Shi a jahtum (7) ning tup, myi kyaw mat ai.

San Pra ai Lidwina garai n si ai aten kaw nna shi a san seng san pra ai lam, ruyak jamjau hkam sharang ai lam, Karai Kasang a myit hpe hkan shatup ai lam ni hte seng ai Nawku Hpung Commission kaw nna madi shadaw ya sai. Shi gaw, 1433 ning hta, Madu kaw yup pyaw mat wa sai rai nga ai.

Nawku hpung a mying kaba ai Laika Ka Sara Thomas a Kempis gaw, A lu ai Lidwina a labau ka da ai.

San Pra ai Lidwina n nga mat ai hpang, 1890 ning, March shata (14) ya shani hta, dai aten na, Wa Sarabyin Leo (XIII) mung, shi hpe San Pra ai masha hku nna dang dat let, shi a Poi Nhtoi hpe mung, April shata (14) ya shani masat shagrau dat ya sai rai nga ai.

San Pra ai Lidwina gaw, hkum hkrang n tai n mai re ai ramma ni a matu, hkum hkrang n kung ai lam gaw, san seng san pra lam hte masha kaga hpe galaw daw ai lam hpe dingbai dingna jaw ai lam n re, ngu ai kasi kamang madun da ai nan rai nga ai.

Daini Nawku Hpung gaw, San Pra ai Lidwina a Poi Nhtoi hpe galaw nga ga ai aten hta, anhte marai hkum shagu mung, tinang prat hpe myit n dik dum ai lam ni nga wa shagu, San Pra ai Lidwina hkawm sa lam wa sai Prat Hkrun lam hpe bai myit dum n gun la let, matut shakut hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)