San Pra ai Alferius a Poi Nhtoi (April 12)

San Pra ai Alferius gaw, Italy Mungdan, Salemo Mare kaw na, lu sha nga pyaw ai masha kaba Pappacalboni a htinggaw kaw na rai nga ai. Shi gaw, A.D 930 ning hta shangai chyinghkai wa ai rai nga ai.

Shi gaw, Fransik mungdan de, sa du ai aten hta Salerno ginwang up du Gisulf hpe sa kawan ai kaw nna ana shakap la hkrup nu ai. Dai majaw, shi a ana ahkya mai jang, Jau tai na ngu nna ga sadi tawn akyu hpyi wu ai. Shi hpyi ai hte maren, mai mat wa nu ai. Dai hpang, up hkang du Gisulf gaw, shi hpe Salerno ginwang na Tawra Jau hpe shadum jahprang na matu lit shatsam ya sai. Raitimung, shi woi awn nna galaw ai gram shading sharai ai lam ni nau wa n awng dang ai.

Dai hpang, shi gaw, Salerno mare shinggan kaw Tawra shakut nna nga ai. Dai aten kaw nna, shi a tara shadik ai, yak yak hkak hkak hkam sharang ai kasi ningli ni a majaw, masha law law myit galai shai wa nna, shi nga ai Tawra Jau jawng de shang wa ma ai. Dai zawn rai nna, shi a hpang de shang wa ai ni kaw na, marai shi lahkawng hpe shi lata la nhtawm, shanhte hte rau, myit dan dawng ai La Cava mare na, Benedictine Tawra Jau jawng hpe de hpang da nu ai. dai kaw nna, shanhte a magam yi ngam gaw, shara law law de chyam bra mat wa sai rai nga ai.

Ndai zawn rai nna, shi machyi makaw ana hkyak kawn mai tsai wa ai hpang, shaning law law, Karai magam gun hpai lai shakut lai wa let, A.D 1050 ning, shi a asak (120) ning hta gaw, Madu kaw yup pyaw ban sa mat wa sai rai nga ai.

Shi n nga mat ai hpang, 1893 ning hta, dai aten na, Wa Sarabyin Leo (XIII) gaw, shi hpe San Pra ai masha dang dat let, shi a Poi Nhtoi hpe mung, April shata (12) ya shani ngu masat shagrau dat ya sai rai nga ai.

Anhte mung, San Pra ai Alferius a Labau kadun hpe hti hkaja la let, tinang a prat hta nji nmu machyi makaw lam ni hkrum kadup wa ai raitim, Karai Kasang Wa a lata hta ap nawng akyu hpyi let, anhte myit ra sharawng ai hku nna n rai, Karai Kasang Wa myit ra sharawng ai hte sak hkrung hkawmsa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Serivice (Myitkyina)