Missa galaw hpang wa yang wajau gaw hpung masha ni hpang de yawng n na, baw gum ngut ai hpang, Missa tawn ka-ang yang hpe, apup ai hpe mu lu ai. dai gaw hpa lachyum rai kun?

San: Missa galaw hpang wa yang wajau gaw hpung masha ni hpang de yawng n na, baw gum ngut ai hpang, Missa tawn ka-ang yang hpe, apup ai hpe mu lu ai. dai gaw hpa lachyum rai kun? chye mayu ai majaw wajau chyeju hpe htai ya rit. Manmaw Saradaw ginwang, Namlimpa jau aseng, Maihkawng mare, San Petru lawk 5 kaw shanu nga ai Jacinta Lahtaw Ja Awng a ga san hpe htai ya na nngai. (Sign of liturgical service)

• Misa Hkungga nawng jau shagu Madu Yesu a hpang jahtum daw sha poi hte Calvary bum ntsa, Hkristu hkum nan nawng jau ai hkungga hpe myit dum ga ai.

Misa Hkungga nawng jau shagu, npawt rudi shingnang kumla mali (4) lawm nga ai hpe dum chye na ma ai: (1) Misa Hkungga nawng jau ai Hking Jawng (priest- Jau Daju), (2) Karai a Sagu Hkungga (victim-Yesu), (3) Nawku Tawn/ tawn hkungri (altar), hte (4) hkungga (sacrifice).

The Mass is a unifying event of the Last Supper and Christ's sacrifice on Calvary. The Mass contains the four essential elements of a true sacrifice: priest, victim, altar, and sacrifice.

Misa Hkungga nawng jau ai hta hkrang madun kumla law law nga ai. Dai hkrang madun kumla shagu hta, lachyum rawng nga ai.

Jau ni Misa nawng na matu, Nawku Tawn shawng de du ai shaloi, Chyoi Pra Hkum nga ai Nawku tawn de, man yawng nna, hput di hkungga jaw ai gaw, Muk a nsam hta rawng nga ai Karai Kasang (Yesu Hkristu) hpe, Nawku Hkungga ai lachyum rai nga ai. Dai kumla hpe shawng galaw ai gaw, Karai Kasang gaw, yawng a Madu re ai, yawng hta grau kaba ai Karai Kasang re ai majaw rai nga ai. Chyoi Pra Hkum n nga ai Nawku jawng ni hta gaw, baw gum na hkungga jaw ga ai. Lachyum gaw asan sha rai nga ai. Muk a n sam hta, Yesu Madu kaja wa nga nga ai hpe, grau shadan shalen ai rai nga ai.

De a hpang, anhte ni Misa tawn hte hpung shawa masha ni maga de, gayin wa nna, Misa tawn hpe apup ai. De a lachyum gaw San Pra ai masha ni hpe, shachyen shakram ai rai nga ai.

Nawku Hpung a makam masham sharin shaga ai hte maren, misa hkungga nawng jau shagu Sumsing lamu na San Pra ni hte rau, Karai Kasang hpe nawku daw jau ai ngu hkam la re. Dai re majaw Misa tawn hpe apup ai lachyum gaw, San pra ai ni hpe, shakram shachyan hkung ga jaw ai rai nga ai.

De a hpang hpung shawa masha ni hpe baw gum let shakram shachyan (greeting) ai rai nga ai.

By Fr. Patrick Gawmaw Hkawng Yae