Jinghpaw Wunpawng Myusha ni Mat wa na. ( 04 Nov 2018 )

Jinghpaw Wunpawng Myu Sha Ni mat Wa Na !

        Hkungga tsawra ai shiga madat Nu Wa hpu nau ni, n’dai lamang hta gaw MKA Edin kaw shanu nga ai Sara kaba Paul Lahpai Zau Htang ka lajang shagun dat ai, “ Jinghpaw Wunpawng Myu sha ni Mat wa na “ ngu ai htunghkring hte seng ai, ga shagawp hpe htawn shana ya mayu n’ngai law.

        Chyurum jinghpaw Wunpawng  sha ni galu gaba wa, Mai gan mungdan shagu du sa nga, Karai Kasang a chyeju rai. Chyurum jinghpaw laika galaw shapraw ya, latsa ning hpring ai ten ni lai wa hkra. Roma laika si hkum hte , bung nna ka sha praw ya, English laika sharin la na mung grai mai kaja, Chyurum wunpawng sha ni a gam maka, Karai jaw ya ai sut masa, mau hpa maka kumla she rai sa. Karai chyeju kaba la ai. Shanhpyi laika ju sha , Wunpawng My sha ni mat wa na , Sara kaba Hawnsan du sa, Chyurum jinghpaw laika shapraw ya. myu tsaw shayi shadang sha ni, hpung tang hpa ji madang dai nil u la, hpu nau nang ngai myit yu yang mai sai. mau dung nga na a’ten n’nga sai.

        Myit yu nna lawan rawt, shawng maga de sa wa nu, chyaru Ka ni, nang hpam my baw sum hpa hpe , malu masha kaja hku shatai, Christan arai alai hpe jahtum n’yai. hkristan masat pyi n’nga , shat sha kyu hpyi gaya wa nga, Nlu n’sha mai ai malu masha hpe sha a’raw, tsu lam num she de she dagraw. Nang hpam malu masha hpe sha, n’se n’sa bungli hpe galaw nga. Prat asak (25) ning she du, ga n’hkrun kata de si taw nga, Kanu yen Kawa hkrap myi prwi pru nga. Prat asak n’galu Karai mungga mung n’lu, Sumsing Mungdan n’mu, Ngarai Mung de she du.

        Karai a Mungga, n’hkan yang hkrit hpa kaba. shing re ai n’kaja lam ni hpe , ya kau tawn da, Karai a  Mungga kata shang wa ra. Ten shagu myit yu, Myu  tsaw myit hpe shamu ra ai lu. Asu ya magam dap kaw mung galaw ai nga ra, Sut su nga mai lam mung tam bram sa. Asuya magam hkring htawng hpe gaw n’da graw, Nam sum wum kata de No. 4 htu nna majaw, Galu kaba wa na gaw nang ngai a lit, Myu sha Mungdan hpe myit, dai hku nga yang n’mai sai, hkan sa ladat galai ra sai.

        Chyurum Jinghpaw Wunpawng laika wa, hti chye ai myu  ni law wa n’nga, Chyurum laika hpe chye hkra, sharin ya ra nga. Asuya jawng kaw sharin ya na n’tai, my sha Jinghpaw Wunpawng ni n’chye yang n’mai, buga hpung shagu Ma shalet jawng hpaw ra sai, asak 5 ning n’hpring ai ma kaji ni hpe , sharin ya na rai. Chyurum jinghpaw Wunpawng laika, hkum dek shagu chye ra sai. Chyurum jinghpaw Wunpawng laika mat wa n’mai, Myu  sha ni yawng a ahkyak laika she re ai oi.

“ Matut nna , sung sung myit yu ra sai “ngu ai hpaji jaw n’gun jaw ai lam hpe bai madat yu ga.

        Chyurum wunpawng sha ni, tinang amyu hpe gaw chyasam shatai, kaga mai gan wa hpe she kam hpa manoi rai. Myit dum ra ai gaw….Ga kaw du tim, lung din gaw lung din sha rai nga ai. kahpu kanau hpa n’seng, n’se n’sa lam hpe she grau shareng, na bai hpe mung hkan shagyeng. Amyu htung hkring hpe pi n’shareng, shawa num shawa la tai nna kan bau ai hpe hkak dum nga, myu sha sari kanang ta?

        Myusha shada zing ri sat hkat, a myu hte htung hkring hpe mung shamat. Rau shada mara hkrai tam, manang wa hpe matai tai na hkrai gyam, matsan mayen ni hpe gaw loi pyi n’shai, tinang nga pyaw jang ram dum nga ai hkrai. Kaja ai lam hta shing jawng na hpe gaw hkrit, n kaja ai lam hpe galaw na hkrai marit, manang wa hpe gung lau na hkrai myit, lu lu sha sha n’sin chyip.

        Anhte hpu nau shada lapran, tsa dan kanu gawan. Myit hkrum ai lam n’lu, tsa dan kanu hpe kabu shangun nga ga ai lu.Shing rai nna galu kaba lam mung pat, hpu nau shada sha mayam yam sha hkrat, myi prwi hkrat tsin yam, Myu sha ni a ka-ang du nga sai rai.

        Ndai zawn,  nang ngai a majaw, amyu hpu nau ni a hpu ging la ai , myi prwi si ni, n’gaw n’hpra , lanam marang zawn, lwi hkrat wa nga ai. Hkrat sum mat wa ai myi prwi ni a matu gaw, hpa hte shadawn lu na ga ta? Shing rai, Nu wa hpu nau ni, “Kawa mung wa gang n’nga yang gaw hka gara hku n’shang ai da !” Anhpu annau ni mung shada da tsawra myit hkrum gahkyin gumdin, n’daw n’hka nga ai rai yang, n’kaja ai tsin yam tsin dam gaw shang lu na n’rai.

Ya na zawn, Shawang tsawra myit kaba hte hpa ji jaw n’gun jaw let wunpawng myu  sha ni yawng hpe manu dan ai matsun maroi hte rau, htung hkring gaw anhte Myusha ni marai hkum shagu a matu kyu rawng ai  hte manu shadan jai lang sa wa ra ai lam ni hpe ga shagawp hte shagrau la sai Sara kaba Paul lahpai Zau Htang hpe shiga madat ni yawng a malai anhte RVA magam gun ni hku nna, n’dang tsun hkra chyeju dum dat ga ai law.  

Ka Shagawp ai; Sara Kaba Paul Lahpai Zau Htang

                          Edin, Myitkyina.