Cologne Mare na San Pra ai Heribert a Poi Nhtoi (March 16)

San Pra ai Heribert gaw, Germany mungdan, Worns ngu ai mare hta e, lai wa sai A.D 970 ning hta shangai chyinghkai wa ai rai nga ai. Lorraine mare na, Gorze Jau jawng kaw laika hpaji sharin hkam la lai wa ai. Jau tai nna asak grai naw kaji ai aten kaw nna hkawhkam Otto a hpaji jaw liet hkam tai wa sai. Saradaw ginwang na Jau kaba lit mung shatsam da ai hkrum lai wa ai. Dai hpang, Cologne ginwang kaw na Saradaw kaba tai wa sai.

San Pra ai Saradaw Heribert gaw, shi a ginwang kaw na Hpung masha ni a makam masham myit maju jung wa na hpe madung tawn nna sharin shadum ya ya re ai. Shut shai ai ni myit malai lu wa shajang na matu, akyu hpyi shaja ai sha n-ga, amu bungli galaw shaja let sak hkrung nga lai wa ai.

Dai sha n-ga, San Pra ai Henribert gaw, akyu hpyi ai lam a kasi kamang rai nga ai. Shi gaw, asak naw kaji nga ai aten hta lamu marang n htu ai majaw, hpa mung hkai sha n mai ai ladaw hpe hkrum lai wa yu ai. Hku kaba hkrum ai aten re majaw, hkai lu hkai sha tsep kawp n ma ai aten hta, shi a akyu hpyi dat ai majaw, marang kata htu wa nna, mung masha ni hpe hkye la ya lai wa sai rai nga ai.

San Pra ai Heribert gaw, hkansa tara grai ja ai wa rai nna, dingman ai lam hta mung kasi tai ai wa rai nga ai. Shi a Saradaw ginwang kata kaw na Jau ni a ntsa e mung, hkansa tara hte up hkang lai wa ai. Matsan mayan re ai ni hte masha ni e n kaw n law shingdu gayin da hkrum ai ni a ntsa hta grai chye matsan dum ai. Ja gumhpraw ni hpe mung, manu shadan chye ai, n tai n mai re ai ni hpe mung, ja gumhpraw ni rap rap ra ra garan jaw chye ai.

San Pra ai Saradaw Heribert gaw, ndai zawn rai nna, Sasana magam bungli hte matsan dum lam ai magam lam ni hpe pu ba lam n nga ai sha, shakut nga ai ten, 1021 ning, March shata (16) ya shani hta Madu kaw yup pyaw mat wa sai rai nga ai. Shi a sak hkrung aten hpe manu dan di kai hku nna sak hkrung nga lai wa sai rai nga ai.

Saradaw Heribert n nga mat ai hpang, Nawku Hpung gaw, shi hpe e San Pra ai masha dang dat nna, shi a Poi Nhtoi hpe mung, March shata (16) ya shani masat shagrau dat sai rai nga ai.

Daini Nawku Hpung gaw, San Pra ai Saradaw Heribert a Poi Nhtoi hpe galaw nga ga ai aten, anhte hpung masha ni mung, Wa Saradaw a mai kaja ai kasi ningli ni hpe yu la nna, anhte hkum nan mung, tinang a makau grup yin hkan nga ai ni hpe, matsan dum lama ai magam bungli ni hte galaw daw jau ai ni byin tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)