Hpung N bung Ai La Ni Kaw Num Wa Ai, Shayi Sharawt Akyu Hpyi Poi Hta, Kahtawlik Kaw Na Sara Ni, Hpa Rai Akyu N mai Sa Hpyi Ya Ai Kun?

San: wajau e anhte RC ni hpung n bung ai la ni kaw num wa ai Shy sharawt akyu hpyi poi hta RC kaw na Sara ni hpa rai akyu n mai sa hpyi ya ai ta? N Mawk Jau Ginwang n mok chye nan (mare n nan ka-ang) shanu nga ai Monica Maran Ah Dim a ga san hpe htai ya na nngai. (liturgy service about marriage)

Htai: Anhte Kahtawlik Nawku Hpung hta nawku dawjau hkrang hkan masa ngu ai nga ai. Dai hpe Liturgical rules/ norms ngu tsun ai. Liturgical law ngu ai mung nga ai. Madung gaw Canon law rai nga ai. Nawku hpung kata Sakramentu hte seng ai Canon law (Upadi) mung nga ai. Ndai tara ni hpe chyum laika (Biblical Law), kasa ni kaw nna sharing shaga hkrat wa ai sharin shaga lam ni (Traditional law), nawku hpung a sharin shaga ai lam ni (Megisterum) ngu ai nga ai. Kahtawlik nawku hpung gaw ndai hpan masum hpe madu madung da, mahta nna sha sharin shaga let hkan shatup sa wa ai re.

Kahtawlik Nawku hpung hta Num Hkungran ai masa lam myu masum nga ai. (1) Kahtawlik Nawku hpung shada hkung ran ai, (2) Kahtawlik Nawku Hpung masha hte hpu nau Hkristan Nawku Hpung masha langai ngai hte hkung ran ai (Mixed Marraige), (3) Kahtawlik Nawku Hpung masha hte makam n bung ai masha langai ngai hte hkung ran ai (Disparity of Cult) ngu ai lam masum nga ai.

Shawng de tsun dan sai Mixed Marraige hte Disperity of cult ngu ai kahtawlik hpung masha langai mi kaga hpung masha, shing n rai, makam n bung ai masha langai ngai hte hkung ran ai hta Kahtawlik nawku hpung masha hku nna tinang a makam hpe ding yang naw hkan sa na, bai, shi hte hkung ran na wa mung shi a makam hta matut hkawm sa na rai yang gaw, ahkaw ahkang lu ai jau hku nna hkungran mai ai masa hkrun lam hte hkrak hkung ran ya mai ai. Disperity of cult masa lam rai yang gaw Ginwang up Saradaw a hkaw ahkang lu jang she hkung ran ya mai ai.

Kahtawlik nawku Hpung masha langai a matu gaw Kahtawlik Nawku Hpung makam masham a tara shang hkungran Sakramentu hkam la na matu gaw ahkyak nga ai.

Nau na wa san da ai RC Kahtawlik Nawku hpung masha hpung n bung ai masha hte hkung ran ai shayi sharawt nawku daw jau akyu hpyi hpawng hpe sa woi awn ai rai yang shi kam lai mat ai makam hpung sara ni hpe n hkung ga ai mung tai nga ai.

Kaga hpung de shang mat sai masha langai mi gaw shi kam sham ai hpung woi ni nga sai rai nga ai. Dai majaw akyu hpyi shaga yang mung shi kam sham ai nawku hpung a akyu hpyi ya ai gaw shi a matu tara shang dik ai ngu mai tsun nga ai.

Hpa majaw nga yang Kahtawlik nawku hpung gaw makam hpung yawng hpe hkung ga ai manu shadan ya ai majaw rai nga ai.

Akyu Hpyi woi ai hpa awn hku n re ai sha, shinggyim hku hkau lai len hku sa shagrau lawm ai gaw manu dik rai nga ai.

Makam gale mat ai masha langai hpe akyu sa hpyi ya ai gaw tinang a makam masham kaw na gale mat ai hpe n gun sa jaw ai mung tai nga ai.

Makam n bung ai ni hte rau jawm akyu hpyi ai aten ni law law nga ai rai tim, dai zawn re ai aten hta gaw gara maga hku sumru tim, n htuk dik ai lam rai nga ai.

#askthepriests

#rvakachinservice