Poland Mungdan na San Pra ai Casimir a Poi Nhtoi (March 4)

San Pra ai Casimir gaw, Poland myusha ni a laksan kamhpa mai ai San Pra ai masha rai nga ai. Shi gaw, hkawhkam Casimir (III) a kasha rai nna, lai wa sai 1458 ning, October shata praw (3) ya shani hta shangai chyinghkai wa ai rai nga ai. Hkawhkam hkaw kaw hpaji sharin nna nga kaba wa ai raitimung, akyu hpyi ai hte mara a  majaw, jam jau hkam sharang nna aten shama chye wu ai.

Shi gaw, Hkawnsek Nu Maria hpe alak mi rai nna kam shamyet ai wa re. Nu Maria hpe shakawn shagrau nna, “San Pra ai Casimir a Mahkawn Mangoi” hpe ka da ai; Shi a tengman ding hpring ai myit jasat hte gam garam jaw chye ai kasi kamang ni a majaw, shawa masha ni gaw, shi hpe Poland Mungdan a kamhpa mai ai San Pra ai masha nga nna kam shamyet nga ai re.

1471 ning hta, shi hpe Hungary mungdan na, hkawhkam aya tang da ya ma ai shaloi, Kawa a ga hpe n lai lu nna hkap la na maw ai. Dai shaloi, Hungary mungdan a hkawhkam a kasha gaw, Casimir hpe hpyen hpung laja lana hte ninghkap wu ai. Casimir chyawm gaw, du daw, sai hkaw na majan n kam shabyin mayu ai majaw, shi a dai daw buga Poland Mungdan de bai wa mat ai. Shi a myit hta mung htawm hpang de galoi mung, n ding n man ai hku nna lak-nak lang na lam n galaw na ngu nna myit daw dank au wu ai.

San Pra ai Casimir gaw, shi a shabrang prat hpe ra n rawng hkra asan apra rai makawp maga hkang da nu ai. Hkawhkam Frederick (III) a kasha jan kawn shi a n rum n tau shatai la na matu gyam ai kaw nna mung lawt lu hkra nga lai wa sai.

1484 ning, March shata praw (4) ya shani hta, San Pra ai Casimir gaw, sinwawp ana lu nna asak (26) ning sha naw rai yang, Madu kaw yup pyaw ban sa mat wa sai rai nga ai. Shi a hkum tsawp moi mang hpe gaw, “Shani shagu Maria hpe” nga ai mahkawn maisau hte rau Vilna mare na, San Pra ai Stinislaus Nawku Jawng kaw e, makoi mayang da sai rai nga ai.

San Pra ai Casimir n nga mat ai hpang, shi hpe e, Nawku hpung gaw, San Pra ai masha dang dat let, Shi a Poi Nhtoi hpe mung, March shata praw (4) ya shani masat shagrau galaw ya nga ai gaw, daini na aten du hkra rai nga ai.

Daini San Pra ai Casimir a Poi Nhtoi hpe, Nawku hpung galaw ya nga ai hte maren, anhte a myit masin hta mung, teng man ai makam masham, mai kaja ai asak prat hkrun lam ni hte hkawmsa lu na chyeju hpe laksan akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)