Akyu Hpyi Ga Gaw Hpu Nau Ni Hpe Wenyi Lam Yan Hku Garum Shingtau Ya Ai Hta Lagawn Lamawn Ai Kaw Nna Shalawt Ya Ai

  February 28, laban ya shani, San Peter pa hta, “Madu A Lamu Kasa Akyu Hpyi” ten Wa Sarabyin Francis gaw Madu Yesu a hpraw nsam galai ai Chyum daw hpe sumru woi let, Hkristan masha ni akyu hpyi ai mahkrum madup hte mungkan ga hpe myit mada shara jaw ga ngu  n-gun jaw shadum da ai.

  Kabu Gara Shiga Chyum daw gaw Mk 9:2-10 hta na rai nga ai. Madu Yesu, Shi a Sape ni hpe bum ntsa garai n woi lung shi yang tsun dan ai lam hpe shawng sumru woi da ai. Dai gaw Madu Yesu si hkam ra na raitim, bai sharawt la ai hkrum na ra ai ngu tsun shadum da ai lam rai nga ai. Ndai ga gaw n-gun atsam rawng nna awng padang hkam la na Hkyela Madu “Messiah” ngu shanhte myit mada kamhpa ai lam hpe myit ung ang shangun ai lam tai wa ai. Sat hkrum ai ngu ai gaw n kaja ai lam galaw ai ni hpe si ari jaw yang she byin wa ai hpe shanhte chye na da ai rai nga ai.

  Madu Yesu tsun dai lam ni hpe Sape ni shanhte a masin salum hta aru yu let Yesu Madu a hpraw nsam galai ai bum ntsa de Shi hte rau lung wa ma ai. Yesu Mung Si du hpe dang kau na lam shanhte hpe tau nau tsun da sai. Yesu Madu a myi man gaw htoi tu nga ai. Jan shingkang zawn htoi tu nga ai rai nna, hkrit tsang nna kajawng nga ai ni a myi shawng kaw htoi lai mat ai.

  “Rabbi, Sara e, ndai shara gaw anhte nga na matu manu dik nga ai,” ngu Petru Madu Yesu hpe hpaji jaw wa ai. Kasa ni a hkam sha lam hpe n sin ka-up mat na hpe Madu Yesu n ra sharawng ai. Anhte ni hta htum ngu n nga ai chyam dinglik hkrum wa yang ningmu kaja hpe sumru la chye ra ai: Nhtoi shingkang gaw anhte a prat hta sung dik hta jahtoi ya nga ai rai nna, dai gaw ndai mungkan hta anhte hkrum ang ai mayak lam ni hpe la kau ya lu ai. Madu Yesu Paska awng padang hpe hkam la ai a marang e, anhte a prat ni hta dai nhtoi shingkang hpe hkam la lu na matu Yesu Madu hte rau bum ntsa de lung wa na ra sharawng nga ai.

  Madu Yesu a hpraw nsam galai ai gaw anhte hpe wenyi lam hta langawn lamawn shangun na matu n rai nga ai. Yesu Madu kadik layang pa de woi sa ai zawn, anhte a shani shagu na prat hkrum lam hta hpu nau ni lapran hkawm sa na matu anhte hpe Madu lam woi ya nga ai. Wenyi lam hta lagawn lamawn ai gaw hpu nau ni hte hku hkau ganawn mazum lam hte garum shingtau lam hta shakut shaja nna lu la ai anhte a myit dik myit pyaw lam hpe jahkring kau ya ai.

  Bum ntsa de lung wa ai ngu ai gaw teng mai masa lam hpe malap mali di kau na matu n rai nga ai. Akyu hpyi ai ngu ai mung anhte a prat hta yak hkak jam jau ai lam ni hpe koi yen kau na matu gaw n rai nga ai. Dai hpe hkam jan lu na hte awng dang lu na matu she rai nga ai. Anhte Hkristan Sasana galaw ai masha shagu hta nga ai n’htoi gaw n law la ai. Dai majaw Madu Yesu a Kabu Gara Shiga a n’htoi hpe hkam la lete tsawra lam hte myit mada lam hpe shalaw jahtam nga ra ga ai.

  Hpang jahtum mungga hta, Hkristan masha ni akyu hpyi ai mahkrum madup hte mungkan ga hpe myit mada shara jaw ga; Kanu Nu Maria anhte hpe garum ya ai a marang e Madu Yesu a n’htoi hpe hkam la gun hkawm let hpu nau ni hta Madu Yesu a lam garan kachyan nga ga ngu akyu hpyi let n-gun jaw da ai hpe Vatican Shiga Dap kaw nna ndau da ma ai.

Source; Vatican News