Constantinople Mare na San Pra ai Tarasius a Poi Nhtoi (February 25)

San Pra ai Tarasius gaw, Byzantine hkawhkam a hkaw kaw na magam gun langai mi rai nga ai. Mung up hkawhkam ni shada da a lapran nab yin ai majan a majaw, Roma ginjaw “Holy See” hte Constantinople “Istanbul” kaga ga rai hka bra nga ai aten hta sak hkrung ngai wa sai. Shi gaw, Saradaw hte hkawhkam Constantine a tsaw di kai hpaji jaw “Consul” lit magam gun mung rai nga ai sha n-ga, Constantinople hkawhkam hte shi a kanu Irene a amu madu mung tai lai wa sai.
San Pra ai Tarasius gaw, Constantinople mare kaw na Saradaw kaba rai nga ai hte maren, Roma mare hte Istanbul “Sinpraw dan hte Sinna dan Hkristian Hpung) a lapran kaw na mang hkang hte seng ai lam hta mung, a sumla ni hpe hkungga jaw ai lam hte seng nna ning dang hkat ai mabyin lam hte seng nna mung, lapran kaw hparan ya ai wa tai lai wa sai. Raitimung, hkawhkam Constantine gaw shi a tara shang hkungran num hte hka na lam hta myit n hkrum ai majaw, hkawhkam gaw shi hpe grai n ju n dawng mat nu ai.
Saradaw Tarasius gaw, Byzantine Hkawhkam ginwang ting kaw byin nga ai n shawp ai sat lawat ni hte hten mat maw ai kasi kaja ni hpe (21) ning e shata (2) tup ja ja rai makawp maga ya lai wa sai. Shi gaw, Constantine hkawhkam hpe kanu hkum nan e gyam sat kau ai mabyin hte hpang jahtum, kanu hpe mung shi yaw shada ai lam n awng dang ai sha hkrat sum mat nna up hkang aya hpe Nicephorus kawn kashun la kau ai hpe ta tut mu kau da ai. Shi a masha ni akyang lai len galai wa lu mu ga nga nna akyu hpyi shaja ai, ruyak jam jau hkam sharang nna, amu magam ni hpe gari galaw shaja wu ai. Nta htinggaw shagu hte tsirung ni hpe hkum nan gawan katsan ya sai. Ndai zawn, Matsan masha ni hpe gam jaw ai amu galaw nna sak hkrung nga lai wa sai rai nga ai.
San Pra ai Saradaw Tarasius gaw, A.D 806 ning, February shata (25) ya shani hta, Madu kaw yup pyaw ban sa mat wa sai rai nga ai.
Shi n nga mat ai hpang, Nawku hpung gaw, shi hpe San Pra ai Masha dang dat let, shi a Poi Nhtoi hpe mung, February shata (25) ya shani masat galaw ya sai rai nga ai.
Daini Nawku hpung gaw, San Pra ai Saradaw Tarasius a Poi Nhtoi hpe galaw nga ai hte maren, anhte a sak hkrung lam hta mung, tinang a makau grup yin hkan shanu nga ai matsan masha ni hpe shingdu n gayin kau da ai sha, dang lu ai daram garum madi shadaw la lu hkra shakut nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)