Smyrna Mare na San Pra ai Polycarp a Poi Nhtoi (February 23)

San Pra ai Polycarp gaw, Kabu Gara Shiga hpe ka ai Kasa Yawhan kawn makam masham de woi bang la ai tara maigan masha langai mi rai nga ai. Dai hta n-ga, Kasa Yawhan kawn, Simina (Smyrna) Mare na Saradaw dang da ai hpe mung hkrum sai.
San Pra ai Polycarp a hpang hkang langai mi rai nga ai, San Pra ai Irenues gaw, Florinus hpang de ka ai laika hta San Pra ai Polycarp hte seng nna, “San Pra ai Polycarp dung nna Karai Kasang a Mungga hkawn tsun ai shara, ngai nang hpe madun ya lu ai; sari shingkang hte rai nna gara shara hkan shi pru shang hkawm ai mung ngai shingran raw raw mu lu ai. Shi a asan apan re ai myi man, gawng shingyan, sari hte rai tsap hkawm ai, masha ni hpe tsun sharin shaga ai, san pra ai ga si ni hpe shingran pra pra mu lu, na lu nga ai. Madu Yesu hte rau nga kau da ai Yawhan hte kaga masha ni rau shi kaning rai nga nna shaga bawngban ai nsen ni, ngai pra pra naw na lu nga ai. Shanhte kaw na shin a lu ai ga ni hte seng nna tsun hkai nga ai nsen ni mung na lu nga ai.” nga nna ka shalawm da nga ai.
San Pra ai Polycarp hpe sat kau na matu Roma mre de woi wa ai shaloi, Symrna mare hku lai wa ma ai. Shaloi San Pra ai Ignatius hpe gyit hkang ai hpri sumri ni hpe Polycarp pup kau da nu ai. Karai Kasang a dingman ai tara hpe gale galau rai galaw ai ni kaw nna tsan tsan hpawng yen mat wa ra ai lam Kasa Yawhan kaw nna shi sharin la lu ai.
Lani mi hta San Pra ai Polycarp gaw, Roma mare na lam nmaw langai mi kaw makam masham kaw na htak mat wa ai Marcion hpe mu timung, n shaga ai sha lai kau da ai. Shaloi Marcion gaw, shi hpe “Nang ngai hpe chye nni?” ngu san dat ai, shaloi San Pra ai Polycarp gaw, “She chye law, nang gaw satan a ma shawng re ai hpe ngai chye ai le” ngu nna bai htan ya dat wu ai.
A.D 155 ning hta Nawku Hpung hpe Marcus Aureleus hkawhkam gaw, zingri shamyit wa sai. shi hpe rim na matu shangun da tai hpyen la ni hpe San Pra ai Polycarp gaw, shana shat atsawm sha hkap jaw sha ngu ai hpang, shi a akyu hpyi ga ni hpe shanhte na lu ma ai majaw, hpye la malawng gaw, myit gale mat wa ma ai. Tara agyi wa gaw, shi hpe makam masham gale na matu jahkrit shagwi wu timung, San Pra ai Polycarp gaw, ‘Hkye La ai Madu Yesu hpe n nyet kau ai sha n-ga, si du hkra sadi dung nga na” ngu nna bai htan ya ai. Dai majaw, Polycarp hpe nhkye hte galu sat kau nhtawm jen noi da ma ai. Dai hpang wa n-ga tai mat hkra shi hpe nat sa kau ma ai.
San Pra ai Polycarp chyawm gaw, jahtum ga hku nna, “Wa e, ngai hpe ndai aten ndai zawn hkam sha lu ai ahkaw ahkang jaw ya ai majaw, chyeju dum dik rai nga nngai. Ndai ahkaw ahkang a majaw, makam masham a sakse tai nna si hkam ai ni hte rau ngai mung, Madu yesu a gawm kaw nna wa lu lu na rai nga ai law.” ngu akyu hpyi chyeju dum shakawn let, nsi hti mat wa sai rai nga ai.
Shi n nga mat ai hpang, Nawku Hpung gaw, San Pra ai masha dang dat let, shi a Poi Nhtoi hpe mung, February shata (23) ya shani hta masat shagrau dat sai rai nga ai.
Daini, San Pra ai Polycarp a Poi Nhtoi hta, anhte hpung masha ni rai shagu a makam masham myit ni grau nna ru jung nga kang wa lu u ga matu, lak san akyu hpyi la nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)