San Pra ai Nicolas a lam. ( 30 October 2018 )

San Pra ai Nicholas a lam

          Hkawp hkungga tsawra ai Nuwa hpu nau ni,  San Pra ai Nocholas a lam hte seng nna, sawk sagawn hka ja lu ai made mi gam garan ya dat n ngai.

          Nu wa hpu nau, San pra ai Nicholas a poi hpe shaning shagu, December shata praw (6) ya shani galaw ai hpe mu lu nga mali ai re. Mying dan hkung ai, San Pra ai masha kaw mung lawm ai re. Shi hpe jawng ma ni, ma kaji ni, sang hpaw hkan ai la ni, muk galaw ai ni, rung rai shading: sha ai ni hpe, makawp maga ai san pra ai masha hku nna, masat da ma ai re. Dai majaw, shi kaw akyu hpyi la mai nga ga ai. San pra ai Nicholas gaw, Karai kasang a chyeju atsam hte, mau hpa lamik kumla amyu myu  madun dan lu ai, san pra ai masha hku nna mung, mying dan hkung ai wa rai nga ai. Shi a mau hpa lamik kumla a lam hpe, San pra ai John Hkistaw-stone hte, San pra ai bonar-ven-ture gaw, mungga hkaw tsun ai aten hta, tsun shalawm lawm re lam nawku hpung a labau hta ka matsing da ai hpe chye lu nga mali ai re. San pra ai Bonaventure hkaw matsun ai mungga hta, tsun shalawm ai langai gaw, lani mi na ten hta, saradaw Nicholas gaw, Asia, maina, dingdung sana daw na, Naisia mare kaw galaw ai nawku hpung zuphpawng kaba de, sa lawm na bu hkawm sa wa ai. Lam kaw, shi gaw shat seng langai de shang wu ai. Dai seng a jut shara mi hta, shadun shanat da ai, n htung langai hpe mu hkrup dat nu ai. Dai nhtung kata hta la kasha lahkawng hpe sat nna, jum hte tsing da ai seng madu gaw, dai hpe shan ngu masu dut na matu re hpe, san pra ai Nicholas gaw Karai kasang a lak san shaman chyeju hte mu chye wu ai.

          San pra ai Nicholas gaw, dai n hkru n kaja ai myit masa hte bungli galaw sha ai madu hpe, daru sharin nna, sat hkrum ai la sha lahkawng hpe, bai jahkrung dat ya ai lam mau hpa nan rai nga ai. Masha sat n hkru n kaja ai seng madu mung, dai shani kaw nna myit malai let, prat tup mai kaja ai myit hte hkawm sa lu nu ai. Nu wa ni, San pra ai Nicholas a matsan dum lama ai myit hte hpring tsup ai lam, shadan shaleng ya ai mabyin law law hta na, kahtawng ning chyawng langai hta, grai matsan ai shanwa ni nga ma ai. Asak ram sai shayi sha masum mung lawm nga ai. Shanhte a kawa gaw, nau matsan hpyau ai majaw, shi a kasha shayi sha ni hpe, hkungran mayaw htinggaw de na matu, lam matsun n lu nga nu ai. Sharung shakau Ja n lu jaw ai majaw mung, shi a kasha shayi sha ni, marai masum hpe hkungran mayaw htinggaw de na, n gun jaw na mung n byin mai nga ai. Dai shiga hpe, masha ni hpe grai matsan dum chye ai, San pra ai Nicholas na nna, garum ya wu ai. Ya na zawn San pra ai Nicolas dai matsan ai htinggaw hpe garum ya ai lam gaw, n dai hku rai nga ai. Shanwa ni yup pyaw nga ai aten, chyinghka hku-wawt hku, gumhpraw majaw gabai bang ya ai da. Jahpawt manap shanwa ni yup rawt wa yang, dai gumhpraw majaw hpe mu nna hpaw yu ai shaloi, gumhpraw ding-ga hkrai hpring tup rawng ai mu nna, mau n ma rai masai da e. Shingrai kade n na yang, kasha kaba ma kaw wa madaw, mayaw htinggaw de lu sai rai nga ai. Dai hpang gumhpraw majaw langai bai, shawng na hte maren, mu ma ai. Dai shaloi mung ma lu wa bai, hkungran htinggaw de lu nu ai. Kawa ngu na wa gaw, ndai gumhpraw majaw, gadai wa sa gabai bang ya ai kun? Nga nna, chye mayu nga sai. Dai majaw, shana tup n yup ai sha, shanwa ni hpe matsan dum garum la ai wa hpe, shana tup mayun yu nga yang, gumhpraw sum pum sa gabai bang ya ai San Pra ai Nicholas hpe yup mang zawn, shingran zawn, mu dat nu ai. Dai shaloi, kawa gaw, hkrap let chyeju dum ga tsun nu ai. Daizawn San pra ai Nicholas gaw, matsan kasha ni hte ma kaji ni hpe, gadai nmu nchye hkra garum ya ya re ai da.

          Nu wa ni, San pra ai Nicholas a labau hpe, matut nna mu lu ai gaw, shi gaw Madu a shaning (280) ning hta Asia Mai-na, li-sayan, sang hpaw daru mare na, Par-hta-ra ngu ai, buga kaw shangai chyinghkrai wa ai wa rai nga ai. Shi shangai dai daw ai ndai bu ga gaw, daini na aten, Tu-ra-ki mungdan re lam chye lu ai. Shi gaw, Ma kaji ten kaw nna Chyoi Pra ai Lamu ga, Palestine mung hte, Igyip mung ni de, jahkring hkring sha du yu ai wa rai nga ai. Dai ten hta, Roma Hkawhkam Dio-clay-cian a lak htak rai nga ai. Dai ten hta sha , San Pra ai Nicholas gaw, htawng hta rim bang hkrum yu ai wa mung re. Nocholas gaw, Hkristu a Jau tai wa ai gade n na yang, May-ra mare na Saradaw kaba aya dang da hkrum sai rai nga ai. Ndai May-ra mare gaw, Asia Mai-na a dingdung daw na mare kaba langai mi re nga ma ai. San Pra ai Nocholas gaw asak hkrung nga ai aten hta, Madu Yesu a teng man ai mungga hpe, n gup a ga hte hkaw tsun sak se hkam ai sha n ga, ta tut mung katsi madun sharin lai wa ai wa re. Ra gadawn ai ni hpe myit masin n gun a tsam yawng hte garum ya ai wa mung  rai nga ai. Dai majaw, Karai kasang gaw, mau hpa lamik kum la amyu myu hpe, San Pra ai Nicholas hku nna madun lu ai atsam jaw ya ai.

          San Pra ai Saradaw Nicholas gaw, Madu a shaning (343) ning daram hta, December shata (6) ya shani, Madu Yesu hta yup pyaw ban san mat wa sai rai nga ai. Madu a shaning (1087) ning hta, Italian sang hpaw la ni gaw, nhten n yat ai, shi a hkum tsawp moi mang hpe, Italy mung Bar-ri mare de la wa ai kawn nna, San pra ai Nicholas gaw, grau gumhkawng wa sai rai nga ai. Dai ni du hkra, Italy mung, Bar-ri mare gaw, San Pra ai Nicholas hpe shagrau gaw gap da ai, San Nicholas ngu shamying ai nawku htingnu kaba hpe mu lu ai lam mung chye lu nga mali ai re. San pra ai Nicholas hpe Ra-sha mungdan hte, Grace mungdan ni hpe makawp maga ai san pra ai masha ngu nna, masat da nga ma ai. Grau nna, anhte aloi sha chye lu mai ai gaw, shaning shagu Hkrismat aten hta, Ma kaji ni hpe kumhpa garan jaw nga ai palawng ahkye galu hpun, nhka mun galu re ai hkrang hpe mu yang, San pra ai Nicholas hpe myit dum nna, shi zawn tsawra matsan dum ai magam lam hta shakut akyu tam sa wa ga ngu htet shana let, lamang hpe naw jahkring sai rai.

Ka lajang ai;    Mama Rose Angeline Maran Nang Doi

                          RVC, Ginjaw Rung, Aung Nan

                          Myitkyina.