San Pra ai Emerentiana a Poi Nhtoi (January 23)

San Pra ai Emerentiana gaw, San Pra ai Agnes hpe naw kaji ai ten yu gawn ya lai wa ai amyu shayi rai nga ai. Shi sak hkrung nga ai ten hta Nawku Hpung masha ni gaw, makam masham hte seng nna grai rai zingri zingrat hkrum ai aten mung rai nga ai. Dai majaw, shanhte a makam masham hpe n dan dawng ai hku nna, lagyim let sha hkan sa shatup nga ra ma ai. Raitimung, shanhte nkau mi gaw, n hkrit n tsang ai sha, shanhte a makam masham hte maren dan dan leng leng rai hkan shatup let lai wa ma ai.

Makam masham hte akyu hpyi ga ni sha naw sharin la nga ai San Pra ai Emerentiana gaw, shi yu gawn nga ai, San Pra ai Agnes baw kahtam sat kau hkrum ai lahkawng ya na ai hpang, Agnes a lupwa kaw akyu sa hpyi nga ai. Shaloi n hkru n kaja ai masha ni gaw, shi hpe dai shara kaw nan nlung hte sa kabai sat kau ma ai. Shi gaw, mahkawn kasha sha naw rai nga timung, tinang a hkum hpe Karai Kasang a matu, sat kau hkrum ai san pra ai num sha rai nga ai. San Pra ai Emerentiana a moi  mang hpe Roma mare masha ni gaw, Via Nomentana lam kaba makau kaw lup makoi da ma ai. Raitimung, hpang daw de shi a nrut nra ni hpe shi hpe makoi maang da ai shara hte loi mi din kaw na, San Pra ai Agnes a Nawku Htingnu, Basilica de htawt nna lup makoi mayang da ya sai.

Shi n nga mat wa ai hpang, Nawku Hpung gaw, shi hpe San Pra ai masha dang dat let, shi a Poi Nhtoi hpe January shata (23) ya shani masat shagrau dat sai rai nga ai.

Daini Nawku hpung gaw, San Pra ai Emerentiana a Poi Nhtoi hpe galaw nga ai aten, anhte a myit masin hta mung, makam masham nli rung jung nga kang lu na atsam jaw ya rit ga matu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)