San Pra ai Thomas Becket a Poi Nhtoi (December 29)

San Pra ai Thomas Becket gaw, lai wa sai 1118 ning, December shata (21) ya shani, England Mungdan, London mare kaba hta shangai chyinghkai wa ai rai nga ai.

Shi gaw, Italy mungdan, Bologna mare hta, Nawku Hpung a Hkansa Tara “Canon Law” hpaji hpe sharin la sai. Dai hpang, daidaw buga de bai du wa ai shaloi, shi a asak (25) ning hta Deacon aya dang ai hkrum nna, Canterbury mare na Saradaw hpe garum shing tau lai wa nu ai.

Dai hpang, (10) ning na ai shaloi, English hkawhkam Henry (II) gaw, shi hpe Hkawhkam a “Amu Madu” lit shatsam ya sai. Matsat ning dai lit magam gun ai aten, shi a kangka ai myit jasat hpe mu lu ai majaw, Canterbury mare na, Saradaw hkang galai lit shatsam ya hkrum sai. Dai ahkang aya gaw, Kahtawlik Nawku Hpung a matu, England mungdan kaw na lu la ai atsaw dik ai ahkang aya rai nga ai.

Saradaw kaba Thomas Becket hte English hkawhkam Henary a lapran manghkang byin pru wa sai. Wa Saradaw gaw, hkawhkam Henry a n shawp ai myit sat lawat ni hpe n hkap la ya ai. Shan hpe jahka shabra ai lam madung gaw, 1164 ning hta hkawhkam a “Clarendon Ritkawp Tara” (Constitution of Clarendon) hte “Nawku Hpung a Hkansa Tara” (Canon Law) yan a lapran n htan shai ai lam ni nga ai majaw, Saradaw n madi shadaw ya ai manghkang lam ni a majaw rai nga ai.

Ndai mang hkang a majaw, Saradaw Thomas gaw, Sarabyin Alexander (III) nga ai, Francis mungdan de, sa htawt yen nga mat ai. Dai mungdan kaw, (6) ning yen nga ai hpang, 1170 ning hta Saradaw gaw, England mugndan de bai nhtang wa ai. Sara Thomas gaw, England mungdan de du wa ai kade nna yang, December shata (29) ya shani, shi a asak (52) ning hta hkawhkawm a masha marai (4) gaw, shi hpe Nawku jawng kata kaw sa htau sat kau ma ai.

Saradaw Thomas sat kau hkrum ai (3) ning na ai hpang, 1173 ning, December (29) ya shani, dai aten, Wa Sarabyin Alexander (III) hkum nan, San Pra ai masha dang dat let, shi a Poi Nhtoi hpe mung, December shata (29) ya shani masat dat ya sai rai nga ai.

Bai nna shi a hkum tsawp moi mang makoi mayang tawn ai, Canterbury mare na, Lupwa gaw, ya daini na ten hta, Uropa mungdan na akyu hpyi sa ai shara byin tai wa sai rai nga ai.

Daini, Nawku hpung gaw, San Pra ai Wa Saradaw Thomas Becket a Poi Nhtoi hpe galaw ya nga ai aten, anhte a myit masin hta mung, tinang a makam masham hte seng nna, gwi gwi sak se hkam, tsun shaga hkawm sa lu ai ni byin tai lu u ga matu, lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)