Hkrismas Gaw Shing Gyim Masha Ni Yawng Hpu Nau Ni Hkrai Re Lam Shadum Ya Ai

Urbi et Orbi: Anhte Shinggyim Masha Ni Yawng Gaw Hpu Nau Hkrai Rai Nga Ai Ngu Hpe Madu Yesu Shangai Chyinghkai Wa Ai Christmas Gaw Sha Dum Ya Nga Ai.

Anhte a Sagu rem wa rai nga ai  Wa Sarabyin Francis a 2020 Hkrismas Mungga hta, “Anhte shinggyim masha ni yawng gaw Hpu nau hkrai rai nga ai ngu hpe Madu Yesu shangai chyinghkai wa ai Christmas gaw shadum ya nga ai lam “Urbi et Orbi” shaman ga hte shi a Mungga hpe htawn tsun lai wa ai.

Covid-19 a majaw Mungkan ting Hkristmas Poi hpe masha law law hpawng let n mai galaw mat wa ai. Wa Sarabyin mung shi a Hkrismas Mungga hpe  St Peter’s Basilica Nawku Jawng kaba na Benediction gawk kata kaw nna sha htawn shapoi ai lam galaw lai wa ai.

 “Karai Kasang gaw Mung Kan shinggyim masha ni yawng a matu, Ma Yesu hpe jaw ya sai,  “Shangai chyinghkai ai ngu gaw Myit mada lam a matu n pawt n hpang rai nga ai , Madu Yesu gaw anhte yawng a matu mai kaja ai lam ni yawng hpe galaw ya nga ai.

Ma Yesu gaw, buga ginra garan hkinghka ai lam nnga ai sha anhte yawng a matu shangai chyinghkai wa sai. Ma Yesu hpe lak san chyeju dum nga ga” Anhte ni yawng dai Daw Buga, Ga hpan, Htunghking n bung hkat ga  ai raitim, yawng gaw Hpu nau ni ngu nna shaga mai nga ai. Kahpu Kanau Majing zawn shada da magyep kap let nga ga, Hpu Nau ni ngu ai gaw teng man ai tsawra myit hta madung maju jung nga ai re “nga nna Mungkan ting hpe htawn tsun dat nga ai. (Isaia 9:6).

Machyi Makaw Hkrum Nga Ai Ni A Matu Kyu Hpyi Ya Nga Nna, Simsa Lam A Matu Amu Galaw Nga Ga

Wa Sarabyin a Mungga hta, tsin yam hkrum nga ai yawng Karai Kasang  a myi man hpe mu nna, shan hte hpe garum na matu Karai Kasang ra sharawng nga ai. Myit mada lam, shalan shabran ai lam hte garum shingtau ai lam hpe, dai masha ni hpang la sa wa ga.

Madu Yesu  anhte hpe tsun ai gaw, Jamjau jamhkau ai lam hte n hkru n kaja ai lam ni gaw anhte yawng a prat jahtum nre. Tsin yam hkrum ai ni a matu hte myit kaji garen hkrum nga ai ni a matu, Myit mada shara jaw lu na matu a-mu galaw nga ga, shalan shabran ya nga ya ga, shada garum shingtau nga  na matu rai nga ai lam Wa Sarabyin tsun dat nga ai.

Christmas hku nna anhte yawng hpe  kalang bai mu chye shangun ai lam gaw, Kun dinghku ngu ai gaw makam masham hte asak hkrung na matu gaw hpang ya ai shara rai nga ai, tsawra myit hte hkap la chye ai shara, dinghku kata shada tsun shaga gamung dup shara, mara raw dat ya ai shara hte Shinggyim masha ni yawng a simsa lam a matu n pawt n hpang rai nga ai lam matut shadum da ai.

Corona a ni zinli makawp maga tsi lu hkra shakut ai lam hta, shada shing jawng ai lam hku nre sha, ta gin dun let ra ai masha yawng lu na matu shakut ga”

COVID-19 VACCINE

Bai nna,  Wa Shara Byin Pope Francis gaw, Coronavirus ana makawp maga tsi (vaccines) hpe shinggyim masha ni yawng rap ra hkra lang lu na matu Mungdan ningbaw ning la ni hpe garum hpyi shawn dat ai.

“Dai ni na zawn, n dai corona ana zinli a majaw myit ru myit tsang ung ang nga ai a ten raitim, Corona makawp maga tsi (Vaccines) hpe mu tam sawk sagawn lu ai zawn re ai myit mada shara anhte yawng  hta dan dawng nga wa sai. Mungdan shagu na nignbaw ningla ni, Company kaba ni hte, Mungkan wuhpung wuhpawng ni hpang de, Corona a ni zinli makawp maga tsi lu hkra shakut ai lam hta, shada shing jawng ai lam hku nre sha, ta gin dun let ra ai masha yawng lu na matu shakut ga” nga nna hpyi shawn dat nga ai.

Source : CBCEW , CNN

Translated : Eliz

Edit - Thomas