Wa Sarabyin: Kabu Pyaw Ai Lam Hpe Hkum Malap Mu

December 13, Du Sa Ladaw hta 3 ngu na laban shani, San Peter pa hta, “Madu A Lamu Kasa Akyu Hpyi” ngut ten, Wa Sarabyin Francis “Kabu pyaw ai lam hpe hkum malap ga” ngu shadum n gun jaw da ai.

Kam sham ai ni a matu Du Sa Ladaw gaw kabu pyaw ai myit mada lam hte hpring nga ai. “Dai gaw anhte tsaw ra dik ai masha langai sa du na hpe ala nga ai zawn rai nga ai.”

Du sa ladaw 3 gaw “Dai Madu hta nanhte tut nawng e kabu gara nga myit ga, bai ngai tsun nngai, kabu gara nga mu,” ngu San Pawlu n gun jaw da ai ga hte hpaw hpang ai.

Anhte a myit shamu shamawt myit rawt ai lam gaw Karai Kasang hte nihtep ai kumla rai nga ai. Karai Kasang hte nihtep grau magang kabu pyaw lam hpe hkam sha grau magang; Karai Kasang hte tsan gang magang, myit ru myit tsang hkrit tsang lam kaba magang rai nga ai.

Chyum Laika ka sara gaw Yawhan Baptista hpe ahkyak kaba tawn nna shachyen ya ai hpe mu lu ga ai. Yawhan Baptista gaw, Maria hte Yawsep hta lai nna, Yesu hpe shawng ningnan sakse hkam ai wa rai nga ai. Yawhan Baptista, shi a prat hta lam woi ningbaw langai rai nga ai. Shi hpe masha ni Hkye la Madu ngu mu wa ma ai rai tim, shi hkum hpe shi shagrit shanem ai hte Hkye la Madu a jat hpe madi madun dan ya ai. Shi hta hkrat ang wa ai agung alau hpe dang kau lu ai.

Hkristan kabu pyaw lam hpe mung Wa Sarabyin Francis shang lang dan ai. “Tinang hkum hpe duju ai lam hpe kau da, Yesu Madu hta daju ai gaw Hkristan kabu pyaw lam hpang ai shara rai nga ai. Hkristu hta daju ai gaw laksan sak hkrung nga ai lam n re ai. Hkristu gaw mungkan ga de yu sa wa ai gaw shinggyim masha ni hpe hkumtsup ai lachyum pru sak prat hpe jaw ai nhtoi rai nga ai.

Yawhan Baptista gaw Hkristu Madu hpe sakse hkam na matu hkrun lam galu aten galu shakut shaja lai wa ai. Nam pan sun hta lam hkawm ai zawn pyaw ai lam gaw n rai nga ai. Yawhan gaw shi a ma prat kaw na nan yawng mayawng hpe kau da nna, Karai Kasang hpe nambat langai tawn da let myit n gun atsam marai mahkra hte Kabu Gara Shiga hpe madat hkam la hkan sa ai.  Nam maling kata Wenyi lam woi ya ai hte maren mungkan pyaw hpa lam ni kaw nna koi yan let nga lai wa ai.

Hkristu hpe ndau shabra na matu shaga la hkrum ai ni a matu Kasi Kamang

Yawhan Baptista a lai nsam, kraw wang atsam gaw kadai hte mung n bung ai laklai ai rai nga ai. Raitim, shi a sakse gaw prat a lachyum hte teng man ai kabu pyaw lam hpe tam la matu ai ni a matu kasi kaja dik langai rai nga ai.  “Grau nna Nawku hpung masha ni kaga hpu nau ni kaw Hkristu hpe ndau shabra na matu shaga la hkrum ai ni a matu kasi la mai dik rai nga ai.

Shanhte gaw shanhte hkum nan hte mungkan lam kaw myit n-kap ai sha koi yan let, masha ni hpe mung tinang maga lawm hkra lau la, shalen la ai hku n re ai sha, Yesu Madu kaw daju wa na matu lam woi ya lu na rai nga ai.

Hpang jahtum hta Wa Sarabyin gaw kam sham ai masha yawng hpe Karai Kasang a hkye hkrang la lam jaw ai mungga hpe shi a masin salum hta simsa ai hku zing da lu na matu ala ding da nga ai Nu Maria gaw ndai lam yawng hkum tsup nga ai hpe mu mada lu mu ga Madu Lamu Kasa Akyu Hpyi ga tsun ai hta shang lawm na matu saw saga da ai.

Dai lam a majaw Nawku Hpung gaw “Nu Maria hpe anhte a kabu pyaw lam jaw ai wa” ngu shaga shamying ai rai ga ai ngu Wa Sarabyin sang lang let gingchyum dat mungga hpe shangut da ai lam Vatican Shiga Dap kaw nna ndau da ma ai.

Translated by Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-12/pope-francis-angelus-13-december-advent-christian-joy.html