Wa Sarabyin: “Madu Lamu Kasa Akyu Hpyi” ngut ten, Karai Kasang gaw Shi a hkungran daw shapoi hpe masha hkum shagu a matu lajang da ya ai

Wa Sarabyin Francis gaw, October 11, Laban ya shani, San Peter pa hta “Madu a lamu kasa akyu hpyi” ngut ten, Shinggyim masha ni hpe hkye hkrang la ai Karai kasang a masin hpe madung da sumru woi da ai.

Madu Karai a Hkungran poi shang lawm na matu saw shaga ai hpe hkap la lu ai hte sha n hkum tsup shi ai; anhte a masin salum hpe galai shai ya lu ai myit malai nna kaja ai de galai shai ai lam hta hkawm sa ra ga ai.

Dai shani hti ang ai, Mt 22:1 – 14 hta Madu Yesu a “Hkungran Poi” ga shadawn hpe sumru woi da ai. Ndai ga shadawn gaw shinggyim masha ni a ntsa tawn da ai Kawa Karai Kasang a shawang tsaw ra  myit hte lak lai mau hpa chyeju hpe shadan shalen ya ai.

Hkungran Poi saw shaga ai hpe ahkyak dik ai masha ni hkum nan n hkap la ma ai. Karai Kasang n shaga shi ai kaw nna nan, anhte myit lawm ai lam nga ra ai hte arung arai ni hpe tau nau hkyen lajang da ra ga ai.

Hkawhkam gaw sumsing chyeju sut gan jaw na matu sharawng awng ai myit kaba rawng ai. Shi a shangun ma ni hpe lam ntsa kaw nga ai ni yawng hpe saw shaga shangun ai.

Karai Kasang a saw shaga ai lam gaw masha ginhkra ai lam nnga ai. Kadai hpe mung ginhkra da ai lam nnga ai. Yawng hpe saw shaga ai.

San Mahte ai Kabu Gara Shiga Laika hta “Lam ntsa kaw hkrum mahkrum” ngu tsun ai gaw dum nta nlu ai ni, matsan mayan ni ngu lachyum pru nga ai. Dai majaw shinggyim wuhpung wuhpawng shingan de nga ai ni mung shi a daw sha poi hta shang lawm na matu Karai Kasang ra sharawng ai hpe dum ra ga ai.

Nawku Hpung gaw myit mada shara n nga ai, lamu ga masa hku yu yang mare jut hkan nga ai, hpyen yen camp hkan nga ai shinggyim masha ni hpe saw shaga nga ai re.

Sasana magam hta, nau na shada mai kaja bungli galaw ai hta, anhte a masin salum chyinghka hpe hpaw da let wuhpung wuhpawng kata, Kabu Gara Shiga hpe shachyam shabra ra ga ai.

Karai Kasang shi a daw sha poi hta masha hkum shagu hpe shaga nga ai; tara lang ai ni hte mara lu ai ni, kaja ai ni hte n kaja ai ni, hpaji chye ai ni hte hpaji n chye ai ni yawng hpe shaga ai.

Hkungran poi shang lawm lu na matu hkawhkam masat shadang tawn da ya ai lam nga ai. Shanhte gaw hkungran poi shang palawng hpe bu hpawng mawn sumli da ra ai.

Hkungran poi ga shadawn hta hkungran poi shang hpun palawng n lawm ai masha langai hpe hkawhkam mu hkrup ai majaw shinggan de gawt shapraw nna n-sin htawng hta bang kau ai.

Dai hkungran poi shang palang gaw Karai Kasang anhte hpe matsun dum myit kaba hte shabri shabrai n la ai sha jaw da ai kum hpa rai nga ai. Saw shaga ai lam hpe lu la ai hte sha n ngut shi ai; masin salum hpe galai shai shangun ai myit malai lu kayin wa ai lam anhte hta nga ra ai ngu Wa Sarabyin Francis Madu a Lamu Kasa akyu hpyi ngut ten tsun da ai hpe Vatican kaw nna ndau da ma ai.

Translated by

Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2020-10/pope-francis-angelus-catechesis-conversion-peripheries.html