Alu Ai Carlo Acutis a Labau Kadun ( 06 Oct, 2020 )

Hkungga ai Nuwa hpunau ni, Carlo Acutis hpe 1991 ning, May Shata praw (3) ya shani, England mungdan, London mare kaba hta Antonia Salzano the Andrea Acutis yen kaw na shangai chyinghkai wa ai rai nga ai. Shi a Kanu yen kawa gaw, London kaw bungli galaw nga ai raitim, shi hpe shangai chyinghkai ai shaning September shata hta gaw, Italy Mungdan Miland de htawt nawt shanu nga sai rai nga ai. Shi gaw, kaji ai aten kaw nna, Karai a Kanu Chyoi Pra ai Nu Maria hpe grai hkungga tsawra manu shadan ai wa rai nna, Nu Maria hpe kam hpa shamyet shanet ai kumla, Rosary hti akyu hpyi shakut lai wa sai rai nga ai.

Shi a shawng nnan lang na Chyoi Pra hkum hpe, asak (7) ning kaw, San Ambrogio ad Nemus Mama Jawng hta hkamla lai wa sai rai nga ai. Acutis gaw, dai shani kawn, shani shagu Chyoipra hkum sakramentu hpe nhprai ai sha hkam la ai, bat mi hta kalang mara raw sakramentu hpe hkam la ai. Bai nna shi gaw, tsaban (21) na ma rai nga ai hte maren, Computer Jak hpaji ni hpe grai myit lawm ai hte kung kyang ai wa mung rai nga ai. Shi gaw, Italy Mungdan na, Milan hte Istituto Leone XIII, Jesuit jawng ni hta mungkan hpaji ni hpe sharin hkaja la lai wa sai rai nga ai. Shi hpaji sharin hkam la ai aten, jawng hkan ntai nmai (Gaw Ning-Ja) manaw manang ni hpe kaga manang ni dang sha ai lam ni hpe mung ja ja ning hkap ya lai wa ai.

Shi gaw, kaji ai aten kaw nna, Sai Mawng Ana byin hkrum hkra ai wa rai nna, shi a hkamsha nga ai lam ni hpe aput a ngun n nga ai. Dai aten na, Wa Sarabyin Benedict XVI hte rau Nawku hpung hta hkam sha ra na tsin yam lam ni yawng hpe ngai hkam sha na matu saw shaga n ngai nga lai wa yu ai.

Shi a matu kasi kamang la ai, San Pra ai masha ni gaw, Asisi mare na San Pra ai Francis, shi sak hkrung nga ai ten A-Lu ai masha yen rai nga ai, San Francisco hte Jacinta Marto, San Pra ai Dominic Savio, San Pra ai Tarcisius hte San Bernadette Soubirous ni rai nga ai. Shi kam hpa ai San Pra ai masha ni law law nga ai raitim, shi du mayu ai dik ai shara gaw, Pin-tit Mungdan, Asisi mare na San Pra ai Francis a moi mang makoi da ai shara de rai nga ai.

Acutis gaw, kanu kawa ni hka mat ai manaw manang ni hpe mung grai matsan chye dum ai hte dai manang ni hpe mung shi a dum nta de sa du dam na matu saw shaga chye ai wa rai nga ai.

Shi gaw, Mungkan mungdan shara shagu na Mauhpa Lamik Kumla madun ai Chyoi Pra Hkum nga ai shara de sa du gawan hkawm mayu ai raitim, shi a hkamja lam a majaw yawng de gaw, nlu du kau da sai rai nga ai.

Raitimung, shi grai myit lawm ai Computer Hpaji hpe akyu jashawn jai lang nna, shi du kau da ai, Mauhpa Lamik Kumla Madun ai Chyoipra Hkum nga ai shara ni hpe Sumla dep gayet, laika ni hpe ka jahtuk bang rai nna, Internet hta manaw manang ni mung bai mu hti lu na matu, Website hpe 2005 hta hpaw dat sai rai nga ai. Dai Website kaw bang na matu Sumla hte Laika ngau ni hpe shi a asak (11) ning kawn mahkawng hpang sai rai nga ai. Bai nna, shi gaw, Video sumla hkrung Edit shatswam jahkuk ai lam ni hta mung grai myit lawm ai wa mung rai nga ai.

Shi a Website hta e, Chyoipra hkum hpe hkam la magang, Madu Yesu hte grau bung pre wa magang rai nga ai. Dai majaw, anhte gaw ndai dinghta ga ntsa kaw nga ai aten kaw nna pyi, Sumsing Mungdan a Namchyim hpe tau nau hkamsha lu nga saga ai, nga nna gam garan da nga ai.

Kalang mi na, Acutis hpe tsi tsi ya ai Tsidu wa gaw, nang grai machyi ai kun ngu san yang, shi gaw, ngai htan grau machyi makaw hkrum ai ni grai nga nga ma ai, ngu bai htan ya lai wa ai lam, shi a labau hta mu lu nga ai.

Ndai zawn rai nna, Acutis gaw, 2006 ning, shi a asak (16) ning October shata (12) ya jahpawt (6:45 AM) aten, Madu hta yup pyaw bansa mat wa sai rai nga ai. Shi a hkum tsawp moi mang hpe shi a myit ra sharawng ai hte maren, Asisi mare kaba hta makoi mayang da sai rai nga ai.

Shi n nga mat ai (7) ning na ai hpang, 2013 ning na, Lombard Nawku Hpung Hkrumra Zuphpawng (Lombard Episcopal Conference) hta Acutis hpe San Pra ai masha dang da na matu tang shawng ai lam galaw hpang wa sai.

Dai majaw, Saradaw ginwang kaw nna, Acutis hpe San Pra ai masha dang da na hkrun lam hpawng hpang ai lam hpe Cardinal Angelo Scola hte rau 2013 ning, February shata (15) hta hpang dat nna, 2016 ning, November shata (24) ya shani gaw, shangut shakre sai rai nga ai.

Dai hpang, May shata (13) ya shani gaw, Acutis gaw kaja wa sha nan, madu a n chyang mayam re ai lam hpe mying hkawt jawm masat hpang wa sai.

Bai nna, 2018 ning, July shata (5) ya shani hta mung, shi hpe shakawn gying ai masha hku nna, Wa Sarabyin Francis hkum nan masat dat sai rai nga ai.

San Pra ai masha dang da na matu ning gam langai mi rai nga ai, shi a marang e ana mai tsai wa ai lam hpe mung, tsi hpaji ning hkring ni kaw nna, 2019 ning, November shata (14) ya shani hta madi shadaw dat ya sai rai nga ai.

Wa Sarabyin Francis kaw nna mung, 2020 ning, lai wa sai Frebruary shata (21) ya shani hta Acutis a Sanpra ai masha dang masat ai hkrun lam ning gam langai hpe masat shagrin ya sai rai nga ai.

2020 Ning, October shata (10) ya shani hta gaw, Carlo Acutis hpe, Italy Mungdan, Asisi mare na, San Francis Nawku Htingnu kaba hta, Wa Sarabyin a gawng malai hku nna, Cardinal Agostino Vallini gaw, A-lu ai masha masat dang dat sai rai nga ai. Shi a Poi Nhtoi hpe gaw, shi n nga mat wa ai, October shata (12) ya shani sha masat dat sai rai nga ai. 

Hkungga ai Nuwa hpunau ni, Ramma sha naw rai nga ai, Acutis gaw, asak naw kaji ai aten kaw na, Chyoipra hkum sacramentu hpe hkungga tsawra manu shadan ai, nawku makam masham lam hta kang ka let shakut shaja lai wa ai, ya ndai tsan ban (21) a matu kasi la hpa Ramma langai mi, ya kade nna ai aten hta, Alu ai masha masat dang dat sana rai nga ai.

Dai majaw, anhte marai hkum shagu mung, Acutis a sak hkrung lai wa sai lam ni hpe kasi yu la nna, anhte a makam masham hpe mung shangang shakang la nga ga ngu, gam garan ya dat lu n ngai law.

Ka lajang ai;    Mama Rose Angeline Maran Nang Doi

                               RVC, Ginjaw Rung, Aung Nan

                               Myitkyina.