Brogne Mare na San Pra ai Gerard a Poi Nhtoi (October 3)

San Pra ai Gerard gaw, A.D 895 ning hta shangai chyinghkai wa ai rai nga ai. Shi a kanu yen kawa gaw dinghku pyaw ai hte hpyendu htinggaw na ni rai nga ai. Lani mi hta shi gaw, Namur ginwang up du a malai Belgium Mungdan de, hpyen ma ni hte rau sa du ai. Dai hkrun lam hta shi gaw San Pra ai Denis hpaw da ai Tawra Jau jawng na, shanhte a nga sat nga sa lam hpe sa mu nna grai yu sharawng mat nu ai. Dai majaw, dai hkrun lam kaw nna nta de bai nhtang du wa ai shaloi, shi lu tawn da ai mungkan a ahkang aya nih pe rap shingdu tawn kau nna Tawra Jau jawng de sa mat ai, dai hpang shi mung Tawra Jau tai wa sai rai nga ai.

Jau Gerard gaw, Nawku Hpung kata na shading sharai ra ai lam ni hte seng nna, akyu hpyi shaja ai hte kaja ai kaja ai kasi hte ram gram lajang ya lu wu ai. Shi Jau tai ai (11) ning na ai hpang, shi a Jau kaba gaw, shi hpe Brogne mare hta Jau jawng langai mi sa hpaw shangun wu ai. Shi a Kanu yen Kawa e kumhtaw jaw da ai lamu ga shara kaw e, jaw sa gap ya ai; dai jawng kaw shi lit hkam Jau kaba tai wa sai. Shi a rau rum manang Jau ni hpe hkansa rit kawp tara hte seng nna, n-gup aga hte kasi kamang hte sharin matsun ya ai majaw, jawng dai gaw grai myit kaba wa sai rai nga ai.

Shi a sak hkrung aten tup, Jau jawng ni hte seng ai galai gram ra ai amu ni hpe galaw lai wa sai. Shi a prat tup akyu hpyi shaja ai hte azim sha nga chye ai sat lawat hte kasi madun nga lai wa ai.

Ndai zawn, San Pra ai Jau Gerard gaw, Karai Kasang Wa a lit magam gun hpai taw nga ai ten, A.D 959 ning, October shata praw (3) ya, shi a asak (64) ning hta, Madu kaw yup pyaw ban sa mat wa sai rai nga ai.  

Daini Nawku hpung kaw nna, San Pra ai Gerard a Poi Nhtoi hpe galaw nga ga ai hte maren, anhte hpe Karai Kasang Wa gaw, kaning re ai lit magam gun hpai na matu saw shaga taw nga ai re kun? ngu ai lam hpe asan sha myit dum sumru lu na atsam jaw ya rit ga, San Pra ai Gerard gaw, Karai Kasang Wa hpang de akyu hpyi garum ya u ga matu, laksan garum akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)