San Pra ai Lorenzo Ruiz a Poi Nhtoi (September 28)

San Pra ai Lorenzo Ruiz gaw, Filipino amyu sha ni kaw na, shawng nnan na San Pra ai masha ngu masat shagrau hkrum ai wa rai nga ai. Shi gaw, Manila Mare kaba na, Miwa amyu sha ni malawng nga ai Binondo  kaw, 1594 ning, November shata (28) ya shani shangai wa ai rai nga ai. Shi a kawa gaw, Miwa amyu sha rai let, shi a kanu gaw, Filipino amyu sha rai nga ai. Shi asak ram wa ai aten kaw na, shi a daidaw shara Binondo na nawku jawng hta Missa tawn hkyen lajang hte tara tau ai magam hpe gun hpai lai wa sai rai nga ai. Ndai zawn rai nna, kun dinghku de na asak du wa ai aten hta, grai tsawm Filipino amyu shayi hte ngwi pyaw ai hkristan kun dinghku gaw de nna, kashu kasha masum a Kawa mung rai nga ai.

1636 ning a Nhtoi lani mi hta, Shi gaw Binondo Nawku Jawng na chyare bungli galaw nga yang, Spain amyu sha langai mi hpe sai ai, nga nna, n teng n man mara shagun hkrum wu ai. Mara jaw hkrum ai kaw nna lawt lu na matu, Japan mung de sa ai Dominican Sasana Magam gun Jau ni hte rau yen sa mat wa ai. Shanhte a sang hpaw Japan mung, Okinava sanghpaw daru du ai hte makam masham a majaw rim hkrum ai hpang laja lana zingri ai hkrum ma ai.

Shanhte hpe hka-pung tup n-tup de ru bang nna, hpyen la nkau gaw shanhte a kan kabye ya ma ai. Dai majaw shanhte a na, n-gup hte ladi hku hkan, hka hte sai gayau pru wa ai. Shanhte a layung ni hpe samyit galu adip bang ai majaw, grai machyi tsin yam hkrum lai wa ma ai. Dai hpang Maza kaman re ai n hkun kata e nhtawng chyaw di gyit noi tawn nna, lawan nsi na hku zingri shatsang ai hpe hkrum lai wa masai. Ndai zawn zingri shatsang ding yang hta, 1637 ning, September shata (29) ya shani, shi a asak (43) ning hta, madu kaw yup pyaw bansa mat wa sai rai nga ai.

San Pra ai Lorezo gaw, garai nsi shi yang: “Ngai gaw, makam masham hte maren shatup ai Hkristian masha re; Hkristu Madu a matu si hkam na jin jin rai n ngai. Ngai she asak hkying hku lu yang, dai ni yawng Madu hpe jaw kau na sha re” nga nna tsun kau da ai. Japan mazut ni hpe ga lachyum htai ya ai Jau lahkawng gaw, Lorenzo a makam masham myit ja ai kasi hpe mu nna myit malai lu mat wa ma ai. Dai yan gaw, Manila de shawng pru wa ai sang hpaw hte Philippines mungdan de lawan wa mat nna, San Pra ai Lorenzo hkrum ai mabyin lam yawng hte hpe shiga wa jaw ma ai. Manila mare kaba na, Saradaw kaba gaw, San Pra ai Lorenzo hpe shagrau ai hku nna, mare tinang na nawku jawng dingsi hpe dum shangun ma ai.

Shi hpe, 1981 ning hta, San Pra ai Wa Sarabyin Yawhan Pawlu (II) Philippines mungdan de sa du gawan ai aten, Alu ai masha hku nna masat shagrau dat sai rai nga ai.

Dai hpang, 1987 ning hta, San Pra ai Wa Sarabyin Yawhan Pawlu (II) sha, Vatican, San Peter Pa kaba hta, San Pra ai masha hku nna dang dat let, shi a poi nhtoi hpe September (28) ya shani ngu nna masat dat ya sai rai nga ai.

San Pra ai Lorenzo hpe, Filipino Ramma ni kam hpa ai wa, maigan mungdan de bungli galaw nga ai ni a kam hpa mai ai wa hte Misa tawn hkyen lajang ai ni hte tara tau ni a kamhpa mai ai wa ngu masat shagrau hkrum ai wa rai nga ai.  

Daini, Nawku hpung kaw nna, San Pra ai Lorenzo Ruiz a Poi nhtoi hpe galaw nga ai hte maren, anhte hpung masha ni mung, anhte a prat hta makam masham a majaw, zingri zingrat, ru tsang lam ni byin hkrum wa tim, hkam jan lu na atsam hpe jaw ya rit ga matu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)