Villanova Mare na San Pra ai Thomas (September 22)

San Pra ai Thomas gaw, mungkan arung arai ni hpe tsep kawp ndang kau nna laja lana tara shaja let nga ai. 1488 ning hta Spain Mungdan, Castile mare kaw shangai chyinghkai wa ai. Kanu yen Kawa gaw, grai myit su ai ni rai nna, Thomas hpe matsan masha ni a ntsa matsan dum myit tawn na matu myit jasat dawk bang ya kau da ma ai. Villanova mare kaw laika sharin kaba wa ai majaw shi a myit kaw shalawm da ma ai.

Shi a asak (15) ning, du ai shaloi Cardinal Sara Kaba Zimenez hpaw da ai Alcafa mare na Dakkasu kaw laika matut sharin la ai hpang Ildefonso College kaw na M.A Janmaw gup la lu sai. Hpang de shi gaw, Philosophy “Myit kung zet hpaji” Sara mung tai wa sai rai nga ai.

1518 ning hta Salamanca mare na, Augustinian Jau wuhpung de shang mat wa nna, 1520 ning hta jau tai wa sai. Shi gaw, bungli galaw shaja ai Sara langai mi mung ria nga ai. Mungkan arung arai ni hpe koi lu ai mare koi nna, matsan mayan rai shanu ngai lai wa sai. Saradaw aya dang da hkrum ai hpang mung, shi gaw grai kam ram ai wa re majaw, shi a manang Saradaw ni shi hpe grai tsawra kamhpa ma ai. Shi gaw masha kaga ni a matu, sumnung shingdi myit, shagrit shanem ai myit jasa ni a kasi majing tai wa sai.

1544 ning hta Valencia ginwang na Saradaw Kaba tai wa sai. Hkamja lam n kaja mat ai majaw, Trent Zuphpawng kaba hta nlu lawm nna, shi a malai Huesca ginwang na Saradaw hpe lit shatsam dat wu ai. 1555 ning hta Saradaw Thomas gaw, Madu hta yup pyaw ban sa mat wa sai rai nga ai. Shi hpe “Spain Mung a Kasa, Apostle of Spain” nga nna masat shagrau ga ai.

Daini Nawku hpung gaw, San Pra ai Saradaw Thomas a Poi Nhtoi hpe galaw nga ga ai hte maren, anhte a myit masin hta mung, shagrit shanem ai myit jaw ya myit matu alak myit akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)