Pope Francis:

Laudato Si ngu ai lamang (ga baw) n-pu e, Francis Mungdan na Saradaw ni a Ginjaw Rung hte Grupyin Shingra Tara hte seng nna, kunghpan ai hpaji ninghking ni a bawngban hpawng hta Wa Sarabyin Francis shadum jahprang, n-gun jaw mungga hte numhtet ga ni tsun lai wa ai.

“Shinggyim masha a myit masin nnan bai galai shai ai lam n nga ai rai yang, shingra tara ningnan hte bai matut mahkai lu na lam n nga ai.”

“Anhte yawng gaw dinhku langai a daw chyen ni rai nga ga ai hte maren, shinggyin shingra tara grit nem hten za wa ai lam ni hpe mung rau hkam sha nga ai Mungkan nta lan gai hta na dinghku masha ni rai nga ga ai.”

Masha langai ngai gaw shi a rudi hpe shamat kau ai rai yang shi a tingkyeng maka ,tinang kadai re ai ngu ai hpe sum shamat kau wa lu nga ai. Dai re majaw, shinggyim labau, de a ginru ginsa labau hte shinggyim prat pra lam hpe sung sung li li ginhtang sumru yu ra nga ga ai.

Shinggyim masha ni hkrum katut hkam sha nga ai hkamja lam mang hkang ni gaw anhte shinggyim masha ni a hkumhkrang gawng kya ai lam hpe madun nga ai.

Shinggyim masha ni gaw langai hte langai sha n ga, anhte nga pra ai lamu ga shingra tara ni hte mung matut mahkai mahkri shawn nga ai lam hpe mung chye na ra ga ai. Shing n rai yang makau grupyin shingra tara  hte sha n ga, shinggyim masha, shinggyim kanawn mazum lam ni hten za ai mabyin ni hpe hkam sha ra wa na ga ai hpe mung Wa Sarabyin kaw nna madi madun da lai wa  ai.

Catholic Nawku Hpung kaw nna mung ndai shawa yawng hte seng ai nta ngu ai mungkan ga hpe makawp maga ai lam hta myit dating let shang lawm nga na  hpe mung tsun shana lai wa sai.

Ndai ecological conversion hte seng nna, Sarabyin tsun ai hta,

“Mungkan ga gaw shi hkrai shi prat pra wa ai n rai, Kawa Karai Kasang a tsawra myit hte dawdan ai lam hta sha prat pra wa ai re."

Hkristan hpung masha langai mi hku nna lamu ga a madu n rai, yu reng gawn hkang ai wa sha rai nga nna dai yu reng gawn hkang nga ai lamu ga a matu ra ang ai lit ni hpe mung hkam la ra nga ai.

Nammak lawhpa ai myit, htingkyeng myit hte myit shadang ai lam ni gaw shinggyim masha shada sha n ga makau grupyin shingra tara ni hpe jahten saza ya lu ai.

Grupyin shingra tara manghkang gaw, ndai prat a shinggyim arawn alai, htunghking, wenyi lam ni hta manghkang nga sai  lam hpe shadan shadawng ya nga taw sai hte maren anhte shinggyim masha ni a myit masin salum ni hpe shawng gram lajang nna grupyin shingra tara hte matut mahkai let anhte yawng a dum nta rai nga ai lamu ga hpe tsi gawn lajang makawp maga nga ra ai.

Shinggyim masha ni a myit masin salum hpe tsi lajang da lu jang she Mungkan shingra tara hte grupyin tara ni hpe gawn lajang makawp maga lu na rai ga ai,” ngu Wa Sarabyin Francis n-gun jaw shadum da ai hpe RVA Jinghpaw Nsen Shapoi dat ga ai.

Source: Vatican News