Tolentine mare na San Pra ai Nicholas (September 10)

San Pra ai Jau Nicholas gaw, Italy mung mungdan, St. Angelo shara kaw 1245 ning hta shangai chyinghkai wa ai rai nga  ai. Ma kaji ten kaw nna sanseng sanpra ai myit jasat ni a majaw, Saradaw kaba a "Hkye La Madu Nawku Jawng" the Church of Pur Savior, kaw na lit gun Jau ni hte rau lit shatsam da hkrum ai. Sarabyin uphkang ai ginwang na mare kaji rai nga ai, Toletime kaw na Augustinian Tawra Jau wughpung de shi shang ai. Ndai mare kaw shi a sakhkrung ten malawng amu gunhpai ai majaw Tolentine ngu ai mying lu la ai rai nga ai.

Shi a sumnung shingdi ai myit hte shagrit shanem ai sat lawat ni a majaw, shanhte wuhpung hte seng ai shara shagu de shangun hkrum ai. Cingole Jau tawra jawng kaw Osimo mare na, Saradaw gaw Nicholas hpe amu hpe shakut shaja nna shi galaw gunghpai ai, Wenyi hkye la ai amu hpe shi grai sharawng shara, atsam dat nna gunhpai ai.

Jau Nicholas gaw, amu galaw shaja ai hte akyu hpyi ai myit jasat ni a majaw, shaman chyeju law law hkam la lu ai. Machyi makaw amyu shagu hkrum timung, shi a law la ai bungli ni hpe n hprai ai sha galaw ding yang rai nga ai. San Pra ai Nicholas hpe "Sanghpaw amu gun ni a makawp maga wa" ngu nna hkungga jaw shagrau nga ai re. Shi a Asak 61 ning, 1306 ning September shata (10) ya shani San Pra ai Jau Nicholas gaw, Madu hta yup pyaw ban sa mat wa sai rai nga ai.

Jau Nicholas hpe 1446 ning hta, Wa Sarabyin Eugene (IV) kaw nna, San Pra ai masha dang dat sai rai nga ai.

Daini, San Pra ai Wa Jau Nicholas a poi nhtoi hpe Nawku hpung kawn galaw nga ai hte maren, anhte hpung masha ni mung, sumnung shingdi, shagrit shanem let, makam masham lam hta shakut lu na chyeju jaw ya rit ga matu, akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)