Wa Sarabyin: Sumsing Mungdan Hpe N-Hkring N-Sa Tam Nga Ra Ai

Wa Sarabyin: Sumsing Mungdan Hpe N-Hkring N-Sa Tam Nga Ra Ai

Wa Sarabyin Francis gaw pran wan ladaw 17 ngu na laban, July 26, San Jochaim hte Ann yan a poi shani na “Madu Lamu Kasa Akyu Hpyi” ten Madu Yesu a “manu dan sutgan rawng ai lamu ga hte manu dan hkachyi hpe tinang hta nga ai sutgan mahkra dut kau nna mari la ai” ga shadawn hpe lakap nna, “sumsing mungdana hpe n-hkring n-sa tam ai ni tai nga ga ngu  saw shaga da ai.

Ga shadawn lahkawng yan hta na masha lahkawng gaw manu dan dik ai sutgan lu la na matu shan hta nga manga yawng hpe dut kau ma ai. Shan lahkawng gaw hpang jahtum hta myit dik myit pyaw ai mani sai hte manu dan dik sutgan hpe madu la lu ma ai. Shan lahkawng zawn manu dan dik sumsing mungdan gaw gap ai hta shang lawm na matu anhte hpe mung saw shaga nga ai re.

Sumsing mungdan gaw gap ai ngu ai gaw Karai Kasang langai chyu sha hpe nmai ap da ai. Anhte lu malu mahkra hte manu dan sumsing sutgan hpe hkam la lu na matu, ngang gring ai hte myit daw dan let ta tut zet zet ja ja shang lawm na matu mung ra ga ai.

Madu a Kabu Gara Shiga hpe myit kaba hte hkap la na matu anhte saw shaga hkrum shaga ai. Rai jang she, anhte, Karai Kasang a sumsing mungdan hpe hkamja ai hte n-hkring n-sa tam la lu na rai ga ai. Shaloi jang she, Ga shadawn kaw na zawn sha, manu jahpu a matu arang shaw shakut ai tai na ga ai.

Anhte mungkan lam hte seng ai lam ni hpe jahkring kau ra ai; mungkan sutgan madu la mayu ai lam ni hpe kau da ra ai; Arawng ana power a matu shakut ai lam ni hpe kau da ra ai; tinggyem a matu sha myit ai lam ni hpe tawn kau ra ai; dai lam ni gaw anhte manu dan dik sumsing sutgan tam ai lam hta hpang hkrat shangun ai.

“Manu Dan Dik Htum Sut Jat” hpe n’tam ai masha ni gaw yu maya prat hkrun lam hta hkawm sa na matu lam woi shadam ma ai. Sumsing sutgan tam ai ngu gaw dai zawn yu maya prat masa hta sha hkawm ai hta grau ai re. Sumsing sutgan tam ai gaw shani shagu rai ra ai rai nna, prat ningnan hta galoi mung zet zet ja ja rai nga ra ai. Grau dam lada ai prat hta hkawm sa na matu rai nga ai. Sumsing sutgan tam ai ngu ai gaw ningnan hpe sawn shalat, hpan shalawt chye ai myit masin rawng ai rai nna, Karai Kasang hte ni htep ai ni, bai tinang hkum hpe tsawra ai lam ningnan de hkawm sa ai lam rai nga ai.

Ga shadawn hta na manu dan sutgan hte ja hkachyi  rai nga ai Yesu gaw mungkan ting hpe myit ngwi myit pyaw lam jaw ya lu ai; jasan jaseng shachyoi shapra ya lu ai; Prat a lachyum hpe tam la lu shangun ai; San seng san pra ai hta hkawm sa na matu garum ya lu ai.

Wa Sarabyin Francis shi a mungga hpang jahtum ginchyum dat hta, karai Kasang a tsawra myit hte Madu Yesu a marang e, anhte sumsing mungdan hpe shani shagu tam la lu u ga, Chyoi Pra ai Nu Maria garum ya na rit ga akyu hpyi let mungga hpe jahkring da ai.

26 July 2020, 12:20

Source : Vatican News