Brindisi mare na San Pra ai Lawrence (July 21)

Lawrence gaw, Italy Mungdan, Brindisi mare hta 1559 ning hta July shata (22) ya shani hta shangai chyinghkai wa ai rai nga ai. Shi a asak (16) ning hta Verona mare na, Capuchin Fransiscan Tawra Jau wuhpung de shang wa ai. Padua Dakkasu kaw hpaji sharin nga ai aten hta, ga hpan law law the chyum Mungga hpe alak mi chye la nu ai. Shi Jau tai wa ai hpang, Wa sArabyin Clement (VIII) gaw, shi hpe Roma mare na Yauda masha ni, makam masham de gale shang wa na matu lit shatsam ya sai.

1598 ning hta, Lutheran hpung gaw, Germany mung hte Austria mung masha ni hpe jahkrit shama wa ai. Dai shaloi, San Pra ai Lawrence hte kaga Capuchin Jau marai (11) hpe dai mung hkan na Capuchin ni hpe woi zin lum na matu lit shatsam ma ai. Jau Lawrence a myit jasat, atsam marai, mahkrum madup, woi awn atsam hpe mu chye ya ai hkaw hkam Emperor Rudolf (III) gaw, mungdan de htim shang wa nga ai Turk tai hpyen ni hpe ning hkap na matu, Kaga Kahtawlik Hkawhkam kasha ni hpe zinlum nna woi awn na lit Jau Lawrence hpe jaw ya wu ai. Turk tai hpyen ni hte gasat hkat ai Stuhlweissenburg majan hta Turk tai hpyen n gun jaw shadawn n lu hkra law la ai. Rai timung, shadum mungga tsun ngut ai hpang hkum nan gumra jawn nhtawm Wudang Sumla Jum let hpyen hpung ting a shawng kaw sa wa ai Jau Lawrence a majaw, tai hpyen ni hpe dang kau lu ma ai.

Jau Lawrence gaw, Italy mung kaw asim sha tara shakut nga na matu, bai nhtang du wa ai shaloi shanhte a wuhpung na lit hkam madung, Minister General shatai kau hkrum ai. San Pra ai Jau Lawrence gaw, Naples mare masha ni Spain mungdan na hkawhkam Philip (II) hpe tang shawn ai lam, madi shadaw lawm na matu 1619 ning, July shata (22) ya shani hta rawt sa wa yang, Portugal mung, Lisbon mare du ai shaloi, Madu a Lahpyn hta yup pyaw ban sa mat wa sai rai nga ai.

Shi hpe 1783 Ning hta Alu ai masha hku nna, dang dat let, 1881 ning hta, Wa Sarabyin Leo (XIII) kawn San Pra ai masha dang dat nna, poi nhtoi hpe July (21) ya shani masat dat sai rai nga ai.

1960 ning hta  shi a san seng san pra ai myit jasat hte nden ja ai myit a majaw sha n-ga, shi a machye machyng lam hta alak mi rai kung kyang ai majaw Nawku hpung kawn, shi hpe Hpaji Ninghkring nga nna masat shagrau ya sai rai nga ai.

Dai majaw, Nawku hpung kaw nna, San Pra ai Lawrence a poi nhtoi July (21) ya shani, shaning shagu galaw ya nga ai rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)